Ձեր վստահելի աղբյուրը

«Այն մարդը, որը դրսևորում է ատելություն, առաջին հերթին իրեն է վնասում։ Նա գտնվելով այդ ատելության մթնոլորտում և դա հեռարձակելով դեպի դուրս՝ ձեռք է բերում հիվանդություններ»,- այսօր լրագրողների հետ հանդիպմանն ասաց հոգեբան Իրինա Ծատուրյանը։

Նրա խոսքով, այն մարդիկ, ովքեր ատելությամբ լցված բաներ են խոսում, պետք է հասկանան, որ վաղը, մյուս օրը հիվանդանալու են. «Եթե նրանք կատարում են ինչ որ պատվերներ, ավելի վատ։ Եթե հիվանդանում են, այդ ատելությունն առաջին հերթին սկսում է վնասել իրեն ու իր մերձավոր մարդկանց։ Կոչ եմ անում բոլոր մարդկանց դադարեցնել դա, հարաբերությունները բերել կոնստրուկտիվ դիալոգի դաշտ, հանգիստ շփվել ու Սարոյան եղբայրների իրավիճակը չբերենք մեր ազգի մեջ»։

Ասուլիսին ներկա մեդիա փորձագետ Սամվել Մարտիրոսյանն ասաց, որ այսօր ողջ աշխարհում  ատելության խոսքի աճ է դիտվում, դրա համար պարարտ հող է ստեղծել համացանցը, մարդության մեծ մասը ստացել է հանրային խոսքի հնարավորություն. «Այս ամենը բերել է նրան, որ շատ երկրներում իրավական կարգավորումներ են մտցնում։ Ակնհայտ է, որ ատելության խոսքն օնլայն հարթակից վաղ թե ուշ օֆֆլայն հարթակ է դուրս գալու»։

Նա նշեց, որ Հայաստանում կան մի քանի խնդիրներ, որոնք ավելի են բարդացնում իրավիճակը. «Հայերենը չի մոդերացվում, եթե մոդերացվում է, ապա պրիմիտիվ՝ հանելով հայհոյանքը։

Մյուս խնդիրը  ներքաղաքական անընդհատ պրոցեսներն են։ Մեզ մոտ արդեն երկու տարի է քաղաքական լարվածությունը չի նվազում։ Հայաստանում ատելության խոսքի տարածման հիմնական խնդիրը մեր քաղաքական վերնախավն է բոլոր կողմերից, քանի որ Հայաստանում առ այսօր չի ձևավորվել քաղաքական պայքարի քաղաքական մշակույթ։ Պայքարը հիմնականում գնում է բաժանելու վրա։ Խնդիրը նաև լրատվամիջոցներն են, որոնք բացարձակ չեն մոդերացնում իրենց սոցիալական ցանցերի հարթակները»։

Հարցին՝ երկրի առաջին դեմքի կողմից հաճախ լսվում  են արտահայտություններ՝ «ասֆլտին փռել», «շնաբարո վնգստացող դուրսպրծուկներ», որոնք, «Իմ քայլի» պատգամավորների խոսքով, ատելության խոսք չի սերմանում, արդյոք այդպես է, հոգեբանը պատասխանեց. «Դա խոսում  է դեստրուկտիվ էմոցիաների մասին,  պետական այրին հարիր չէ այդպիսի բառեր օգտագործել։ Ով այդպիսի բառեր է գործածում, առաջին հերթին պետք է մտածի, որ իր նկատմամբ հարգանքի շեմն իջնում է»։

Սամվել Մարտիրոսյանն ասաց, որ «ասֆալտին փռելը» սահմանային վիճակում է գտնվում, բայց այսպես թե այնպես պոզիտիվը չի ավելացնում։

«Ատելության խոսքը չի շատացել, պարզապես ներս է մտել։ 2016 թվականին շատ ավելի եռանդով էր ատելության խոսքը տարածվում, բայց ունեին կոնկրետ հակառակորդ՝ Ադրբեջանը, հիմա դա շուռ է եղել ու մտել է ներս»,- ասաց մեդիա փորձագետը։

Ս. Մարտիրոսյանի խոսքով, այս քաղաքական չափից դուրս էմոցիոնալ վիճակը բերել է նրան, որ երիտասարդները պարզապես Ֆեյսբուքից դուրս են գալիս, գնում Ինսթագրամ։

Փորձագետի համոզմամբ, խնդիրը պետք է կոմպլեքս լուծել, ծայրահեղ դեպքում նաև ինչ-որ մարդկանց մեկուսացնել, քանի որ կան մարդիկ, որոնք վտանգավոր են դառնում հասարակության համար։