Ձեր վստահելի աղբյուրը

Վարչապետի կողմից արտահայտված մյունխենյան սկզբունքներն ավելի համապարփակ կերպով արտահայտում են այն, ինչը խոսվեց Մյունխեում։ Դրանք համալրում են, քանի որ մյունխենյան սկզբունքների մեջ չի արտահայտված որևէ բան, որը վերափոխում է մեր ձևավորված դիրքորոշումը Լեռնային Ղարաբաղի խաղաղ կարգավորման գործընթացի ընդհանուր փաթեթի մեջ։ Այսօր մամուլի ասուլիսի ժամանակ ասաց ՀՀ ԱԳ նախարար Զոհրաբ Մնացականյանը, պատասխանելով հարցին, թե ինչ է ենթադրում «մյունխենյան սկզբունքները», արդյոք դա նշանակում է նախկիններից հրաժարում։

«Կարգավիճակի հարցը չի կարող անտեսվել, անտրամաբանական է նման կերպ գնահատել։ Հայաստանը եղել և մնում է խստորեն հավատարիմ հարցի խաղաղ կարգավորմանը՝ Մինսկի խմբի համանախագահության շրջանակներում, և այդ շրջանակներում մենք շարունակելու ենք աշխատել այնպիսի լուծումների ուղղությամբ, որոնք, ինչպես վարչապետ Փաշինյանն արտահայտեց, նաև մյունխենյան արտահայտված սկզբունքներում են։ Նրանք, ովքեր կանոնավոր հետևում են այս գործընթացին, վստահաբար, առաջին անգամ չէին լսել՝ լուծումներ, որ ընդունելի են բոլոր կողմերի համար, որը նշանակում է փոխզիջում, իսկ փոխզիջումը նշանակում է ճանապարհ, որն ունի երկու ուղղություն։ Միակողմանի զիջումների մասին որևէ խոսք երբևէ չի կարող լինել։ Այդ առումով ամենասուր հարցերը եղել և մնում են մեր հայրենակիցների ռեալ, իրական անվտանգության համակարգի ապահովումը, որից բխում է ստատուսի խնդիրը։ Խնդրում եմ, չխառնել և չենթադրել, որ մեկը մյուսից տարանջատված է»,-ասաց Զոհրաբ Մնացականյանը։

Փաշինյան-Ալիև հանդիպման ձևաչափի հետ կապված, նախարարը նշեց, որ ղեկավարներն են գնահատել՝ ինչպես իրենք կուզեն ներգրավվել այդ ձևաչափում։

«Երևույթը դրական է, որ մենք կարող ենք ղեկավարների մակարդակով նաև բաց զրույցի մեջ մտնել»,- ասաց ԱԳ նախարարը, նշելով, որ սա, միգուցե, կարևոր նշանակություն ունի միջավայրի ձևավորման համար ու հիշեցրեց հայ և ադրբեջանցի լրագրողների փոխանակման փորձը։

ԱԳ նախարարը Փաշինյան-Ալիև հանդիպման արձագանքների հետ կապված նշեց համակարգերի տարբերության խնդիրը։

«Այն մեկնաբանությունները, որ ես տեսա ադրբեջանական մամուլում կամ ադրբեջանական տարբեր պաշտոնյաների կողմից, որոնք պրոպագանդիստական ծայրահեղ մակարդակի էին հասցված, և որոնք հիշեցնում էին մոդելներ՝ բնավ ժողովրդավարական կամ ազատ քննարկման համակարգի բացակայութան արտահայտությունն է։ Դրանք, մեղմ ասած, օգտակար չեն, ավելի պարզ ասած՝ անընդունելի են։ Շատ ուրախ եմ, որ մեր հասարակության մեջ մենք ունենք ավելի բաց քննարկում, որտեղ մենք կարող ենք միասին գնահատել այս կամ այն իրադարձությունը, զարգացումը։ Այստեղ, միգուցե, համակարգերի տարբերության խնդիր կա, որը ևս պետք է հաշվի առնել»,- ասաց Զոհրաբ Մնացականյանը: