Ձեր վստահելի աղբյուրը

Գյուղատնտեսության նախկին նախարար Սերգո Կարապետյանը, ով որպես մեղադրյալ է ներգրավված ՀՀ երրորդ նախագահ Սերժ Սարգսյանի և մյուսների գործով, դատական նիստից հետո չպատասխանեց լրագրողների հարցերին: Նա միայն ասաց. «Խնդրում եմ՝ հետևեք դատական պրոցեսին, ձեր բոլոր հարցերի պատասխանը կստանաք»։

Հարցին՝ ասում են քրեական գործը ձեր ցուցմունքի հիման վրա է կառուցվել, Ս. Կարապետյանն ասաց. «Ես արդեն ասացի՝ հետևեք դատական գործընթացին»:

Նշենք, որ  Երևանի ընդհանուր իրավասության դատարանի՝ Ավանի և Նոր Նորք նստավայրում դատավոր Վահե Միսակյանի նախագահությամբ այսօր տեղի է ունեցել ՀՀ երրորդ նախագահ Սերժ Սարգսյանի և մյուսների գործով առաջին դատական նիստը: Ս. Սարգսյանի պաշտպանական կողմը դատախազ Արսեն Մարտիրոսյանին բացարկ հայտնելու միջնորդություն է ներկայացրել: Դատարանը հեռացել է խորհրդակցական սենյակ, որոշումը կհրապարակվի փետրվարի 26-ին:

Այս քրեական գործով ընդհանուր առմամբ 5 մեղադրալ կա։ Սերժ Սարգսյանից ու Սերգո Կարապետյանից  բացի մեղադրանքներ են առաջադրվել նաև գյուղատնտեսության նախկին փոխնախարար Սամվել Գալստյանին, վարչության պետ Գևորգ Հարությունյանին, գործարար Բարսեղ Բեգլարյանին։

Սերգո Կարապետյանին մեղադրանք է առաջադրվել այն բանի համար, որ նա 2010թ․ դեկտեմբերի 31-ից մինչև 2016թ․ սեպտեմբերի 20-ն ընկած ժամանակահատվածում հանդիսանալով ՀՀ գյուղատնտեսության նախարար, այսինքն՝ ՀՀ կառավարության անդամ, պաշտոնատար անձ, «ֆլեշ» ՍՊ ընկերության սեփականատեր Բարսեղ Բեգլարյանի դրդմամբ, 2013թ․ ՀՀ գործող նախագահ Սերժ Սարգսյանի կազմակերպմամբ,իր տեղակալ Սամվել Գալստյանի և ՀՀ գյուղատնտեսության նախարարության բուսաբուծության վարչության պետ Գևորգ Հարությունյանի օժանդակությամբ անձնական այլ շահագրգռվածությունից ելնելով, իր պաշտոնեական դիրքը ծառայության շահերին հակառակ, օգտագործելով պաշտոնատար այլ անձանց հետ դիտավորությամբ խմբի կազմում կատարել է ՀՀ կառավարության պահուստային ֆոնդում գտնվող առանձնապես խոշոր չափերով պետական միջոցների՝ ընդհանուր 489,160,310 ՀՀ դրամի վատնում։