Ձեր վստահելի աղբյուրը

Երևան քաղաքի ընդհանուր իրավասության դատարանում  երեկ  կայացել է  ՀՀ փոխվարչապետ Տիգրան Ավինյանի դեմ ներկայացված 15 հայցադիմումի հիման վրա հարուցված գործով դատական նիստը։ Հիշեցնենք, որ հայցվոր կողմը պահանջում է պարտավորեցնել պատասխանող կողմին հերքել զրպարտություն համարվող  հայտարարությունը, որը նա արել է հոկտեմբերի 22-ին Թբիլիսիում հայ համայնքի հետ կայացած հանդիպման ժամանակ: 

Այն է. «Իրազեկեմ ձեզ, որ Ամուլսարի դեմ ծավալված արշավը միանշանակ չէ: Կան անկեղծ և ազնիվ մարդիկ, որոնք իրապես հավատում են, որ այս ծրագիրը աղետ է: Բայց նաև կան մարդիկ, որոնք ուղղակիորեն կապված են ՀՀ տարածքում հանքարդյունաբերական ոլորտի գործարարների հետ, որոնք բավական լուրջ ֆինանսական միջոցներ էին ներդնում, որպեսզի այս արշավը կազմակերպվի: Թե չէ, վստահեցնում եմ ձեզ, դուք Ամուլսարի մասին չէիք լսելու, որովհետեւ նման հնչեղություն հաղորդելու համար լուրջ ֆինանսական միջոցներ են պետք և լուրջ արշավ է պետք կազմակերպել, որը ինտենսիվորեն դեռևս 2016-2017 թվականից արվում է»։

Դատարանը մերժել է փոխվարչապետ Տիգրան Ավինյանին՝ որպես վկա հրավիրելու և հարցաքննելու մասին հայցվոր կողմի  միջնորդությունը:  Հայցվոր կողմի  փաստաբան  Գուրգեն Թորոսյանի պարզաբանմամբ՝  դատարանը բերել է հետևյալ  պատճառաբանությունը. «Դատարանն ասում է,  որ դա  հիմնական շեշտադրումը չէ ,որը էական նշանակաությունը ունի  գործի լուծման համար: Էական այն է, թե զրպարտություն եղել է,թե ՝ոչ: Եվ երկրորդը, ասում է, որ եթե հրավիրեմ՝ մրցակցության սկզբունքը կխախտեմ»:

Ինչևէ, հայցվոր կողմի համար պատճառաբանությունները  այդքան էլ ընդունելի չեն: Ավելին,  փաստաբան  Գուրգեն Թորոսյանի կարծիքով ՝ տպավորություն է,թե դատարանը  կաշկանդվածություն ունի: Panorama.am-ի հետ զրույցում  Թորոսյանը մասնավորապես նշեց. «Տպավորություն էր, թե դատարանը կաշկանդվածություն ունի փոխվարչապետ հրավիրելու, զուտ նրա համար, որ փոխվարչապետ է: Մի կողմից  դատարանը ապացուցման բեռ է դռնում, հետո երբ փորձում ես ապացուցել , ապա փորձում են շրջանցել ՝ չհրավիրելով: Մինչդեռ նորմալ դատավարական պրոցես կլիներ, եթե այն անձը, որը  կատարել է այդ հայտարարությունը, ներկա լիներ և ասեր՝ նկատի է ունեցել հայցվոր կողմին, թե՝ ոչ»:

ՀԲՃ ներկայացուցիչ Լևոն Գալստյան էլ, որը ևս 15 հայցվոր կողմի կազմում է, Panorama.am-ի հետ զրույցում ասաց, որ մինչ դատարավարական գործընթացի մեկնարկը, փորձել են փոխվարչապետից ճշտել,թե կոնկրետ ո՞ւմ է նկատի ունեցել:

«Երբ քաղաքակական գործիչը խոսում է, դա չպետք է զուտ բառակապակցություններ լինեն: Մենք մինչև դատարան դիմելը պաշտոնական հարցում ենք  ուղարկել պարոն Ավինյանին, թե արդյո՞ք դա վերաբերում է կոնտրետ ինձ ՝ որպես ՀՀ քաղաքացի, կամ ՀԲՃ-ին: Պատասխանը եկել  է այն, որ այդ հայտարարության վերաբերյալ լրացուցիչ մեկնաբանույթուն չունեն: Եթե նա հայտարարեր, որ հայտարարությունը չի վերաբերում նշված հայցվորներին, ապա  հայցադիմումը կարող էինք հետ վերցնել և խնդիրը կհամարվեր լուծված: Դա էլ չարեց: Բացի այդ, չի ուզում ասի,թե ո՞վ ո՞ւմ է ֆինանսավորել: Դա էլ չի ուզում ասի, այսինքն՝ ոչ մի բան չի ուզում ասի»,- ասաց Գալստյանը:

Նրա  խոսքով՝ այս ողջ դատական գործընթացը զուն նրա համար է, որ պետական պաշտոն ստանձնած անձիք պատասխանատվություն կրեն՝ իրենց արտահայտությունների համար: 

«Մենք կարծում ենք, որ նմանօրինակ հայտարարությունները վնասում են մեր պետական շահը, քանի որ այն կարող է օգտագործվել միջազգային դատարաններում Հայաստանի դեմ: Կներեք, մենք համաձայն չենք և ամեն ինչ անելու ենք, որ պետական պաշտոնյաններն անպատասխանատու հայտարարութուններ չանեն, կամ անելու դեպքում գոնե  հստակ նշեն,թե ո՞վ ո՞ւմ է ֆինանսավորել»,-նշեց ՀԲՃ անդամը:

Անկախ այն բանից, թե ինչ վճիռ կկայացնի դատարանը, ՀԲՃ ներկայացուցիչը  կարծում է, որ սա ինչ-որ առումով կլինի կանխարգելիչ գործընթաց՝ նմանօրինակ հայտարարությունները կանխելու մասով:

Բնապահպանները հույս ունեն, որ հետայսու պաշտոնյանները երկար կմտածեն, որևէ հայտարարություն անելիս: Հաջորդ դատական նիստը նշանակված է մարտի 13-ին: Փաստաբանի խոսքով՝ սա կլինի վերջին՝ որոշիչ նիստը: