Սողոմոնյան. Միահամուռ ուժերով հաղաթահարենք կեղծիքների այս խայտառակ կծիկը, որն առկա է «Մարտի 1»-ի գործի վերաբերյալ
«Շուրջ երկու տարի է ջանում ենք հանրությանը ներկայացնել այն իրողությունները, որոնք գոյություն ունեն «Մարտի 1»-ի գործի վերաբերյալ»,- Ռոբերտ Քոչարյանի ազատության հանձնախմբի կողմից կազմակերպած «Մարտի 1-ի գործը՝ հետհեղափոխական Հայաստանում» տեղեկատվական կոնֆերանսին ասաց ՀՀ երկրորդ նախագահի գրասենյակի ղեկավար Վիկտոր Սողոմոնյանը:
Նրա խոսքով, դրանք խիստ կարևոր են մի քանի պատճառով. «Հավատացեք, հարցը միայն այն չէ, որ այսօր նախագահն ապօրինի կալանավորված է, ըստ էության, քաղբանտարկյալ է հանդիսանում: Դա, իհարկե, ողբերգական էջ է մեր պատության մեջ՝ հաշվի առնելով նախագահի կենսագրությունը, Ռոբերտ Քոչարյանի ով լինելը հայ ժողովորիդ պատմության մեջ: Հավատավեք, խնդիրը միայն իր ապօրինի կալանքը վերացնելու մեջ չէ, խնդիրն այն բանի մեջ է, որ մենք պետք է, իմ խորին համոզմամբ, միահամուռ ուժերով հաղաթահարենք կեղծիքների այս խայտառակ կծիկը, որն առկա է «Մարտի 1»-ի գործի վերաբերյալ: Առանց այս կեղծիքների հաղթահարման, վստահ եմ՝ ոչ միայն չենք կարողանալու հաջողությամբ շարժվել առաջ, ոչ միայն չենք կարողանալու ասել, որ Հայաստանում իրավակարգ կա, Հայաստանում հարգվում են փաստերը, այլ ոչ թե բամբասանքները, մենք չենք կարողանա նաև հաջող պետություն կառուցել: Ըստ էության, ի՞նչ են ասում. ասում են, որ պետությունն իրավունք չուներ պաշտպանել սահմանադրական կարգը, ամբոխն ինչ ուզում էր, այդ օրը պետք է աներ, մարդիկ, ովքեր հրահրում էին բախումներ, անկարգություններ, ինչ ուզում էին, պետք է անեին, որևէ դիմադրություն դրանց չպետք է ցուցադրվեր: Այսպիսի իրողություններով, փիլիսոփայությամբ, երբեք հաջող, հաջողակ, զարգացող պետություն չեն կարող կառուցել, գերի կմնանաք այս բազմաթիվ կեղծիքներին»,- ասաց Վ.Սողոմոնյանը:
Նախագահ Քոչարյանի ազատության հանձնախմբի համակարգող Աղվան Վարդանյանն իր խոսքում նշեց, որ «Մարտի 1»-ը տարիներ շարունակ ներկայացվել է միակողմանի, և դա արվել է ուղղակի բացարձակ բարոյական որևէ սահմանումներից դուրս՝ հարմարեցնելով իրենց քաղաքական նպատակներին:
«Եթե մենք փորձեինք նման մի միջոցառում իրականացնել 1,5 տարի առաջ, հասարակության ընկալումը, տրամադրությունը, էյֆորիան բոլորովին այլ վիճակում էր, և ուղղակի անհնար կլիներ խոսել իրականության ու ճշմարտության մասին, թե ինչ է կատարվել մարտի 1-ին: Սա վկայում է, որ կատարած աշխատանքն արդյունք է տվել, հասարակության շատ ավելի լայն շերտեր են տեսնում ճշմարտությունը, վստահեցնում եմ, որ այդ ճշմարտությունն ամբողջովին ջրի երես է դուրս գալու, արդարությունը հաղթելու է առաջին հերթին նախագահ Քոչարյանի պարագայում:
Իսկ որ նախագահ Քոչարյանն այսօր զուտ անձնական ու քաղաքական շարժառիթներով է կալանավորված, և այս գործին զուգահեռ այլ գործեր դադարեցնում են Հայաստանը որպես իրավական պետություն լինելուց, ակնհայտ է»,- ասաց նա՝ հիշեցնելով Սահմանադրական դատարանի շուրջ ստեղծված իրավիճակը:
Ա. Վարդանյանի խոսքով, իր համար ակնհայտ է, որ եթե այդ օրը արտակարգ դրություն չհայտարարվեր, համապատասխան քայլեր չձեռնարկվեին, ավելի շատ զոհեր կլինեին, Երևանի առնվազն կենտրոնը կլիներ գուցե օրեր շարունակ այն իրավիճակում, ինչը տեսել են այդ մի քանի ժամվա ընթացքում:
«Երբ մարտի 1-ի դեպքերի ժամանակ 10 զոհերից երկուսը ոստիկաններ են և 187 ոստիկաններ մարմնական տարբեր վնասվածքներ են ստացել, տուժել են, և խոսել խաղաղ ցուցարարների մասին, ուղղակի անհեթեթ է: Բայց խնդիրն այն է, որ 187 ոստիանները, տուժող քաղաքացիներն այսօր կարծես անմասն են այդ բոլոր գործընթացներից: Իրենց տանը հանգիստ նստած են, իրենց մասնակցությունը չբերելով՝ միայն պատմության խեղաթյուրմանը, կեղծիքին են նպաստում»,-ասաց Ա.Վարդանյանը:
Հարակից հրապարակումներ`
- Լ.Քոչարյան. Մարտի 1-ի զոհերի հարազատները փորձե՞լ են հարցրել այսօրվա վարչապետից՝ ինչու թողեց ու փախավ այդ օրը
- Լևոն Քոչարյան. Նախկին վարչապետների հետ համաձայնություն կա, նրանք պատրաստ են գալ դատարան
- Սարգիս Գրիգորյան. 2008 թ. մարտի 1-ին առկա էր հուժկու վտանգ ներքին անվտանգությանը
- Միկոյան. Վիլիսի հետ կապված լուրը ԱԺ ամբիոնից շրջանառած Ստյոպա Սաֆարյանը ՀՔԾ-ում ասել է, որ անձամբ չի տեսել
- Խուդոյան. Եթե ցուցարարը մարտական նռնակ կարող է ունենալ, ինչո՞ւ չի կարող ունենալ հատուկ միջոց
- Ռ.Քոչարյանի պաշտպան. Չի կարող անմեղության կանխավարկածով հարուցված ընթացող գործն ունենալ արդար ավարտ
- Հայկ Ալումյանը՝ «Մարտի 1»- ի իրադարձությունների ու միֆերի մասին
- Օրբելյան. Ռոբերտ Քոչարյանի և մյուսների գործն այն գործը չէ, որտեղ զոհերի մահվան հանգամանքը պետք է պարզել
- Լևոն Քոչարյան. Չեմ կիսում փաստաբանների լավատեսությունը