Գյուղատնտեսության մեջ ինչ վիճակ է՝ ոչ սերմ կա, ոչ տեխնիկա, ոչ պարարտանյութ. Ծառուկյան
«Կառավարության էս սկզբունքով, էս ծրագրով տնտեսական հեղփոխություն չի կարող լինել»,- այսօր խորհրդարանում լրագրողների հետ զրույցում ասաց ԱԺ «Բարգավաճ Հայաստան» խմբակցության ղեկավար Գագիկ Ծառուկյանը։
Նրա խոսքով, տնտեսական հեղափոխության համար անհրաժեշտ է առողջացման ծրագիր։
«Փոքր ու միջին բիզնեսի, գյուղատնտեսության, երիտասարդ ընտանիքների առողջացման ծրագիր պիտի լինի։ Գոնե մարդկանց ունեցվածքը, որ բանկերի վարկերի տակ է, պետք է վերադարձնեն, որ մարդը զգա հեղափոխություն ա եղել, առողջացման ծրագիր կա։ Էսօր գարուն է գալիս, հլը տեսեք, գյուղատնտեսության մեջ ինչ վիճակ է՝ ոչ սերմ կա, ոչ տեխնիկա, ոչ պարարտանյութ , ինչո՞վ պետք է մարդիկ զարգանան։ Ի՞նչ տնտեսական հեղափոխության մասին է խոսք»,- ասաց Ծառուկյանը։
Ըստ ԲՀԿ ղեկավարի, տնտեսական հեղափոխության մասին հայտարարելու պահին Հայաստանում 650 հազար ընտանիքում կար 1 մլն 500 հազար վարկառու, իսկ 1 տարի անց, տնտեսական հեղափոխության ֆոնին, պետք է այդ վարկառուների թիվը նվազեր՝ հասնելով միջինը 1 մլն 200 հազար. «Հիմա դարձել է 1 մլն 650 հազար։ Մարդը մտածում է՝ երբ պիտի մթնի, ու լույսը էլ չբացվի, որ հանկարծ էլ խնդիր չունենա, ունեցվածքը չկորցնի։ Էսօր մարդիկ չեք պատկերացնի՝ ինչ վիճակում են։ Կարող է՝ տնտեսական աճ կա, բայց այն չի ազդել մարդու առօրյայի, վարկերի վրա»։
Անդրադառնալով Փաշինյան-Ալիև մյունխենյան հանդիպմանը՝ Ծառուկյանը նշեց՝ Արցախի անկախ պետության հարցը Արցախի ժողովուրդը լուծել է։
«Արդեն 30 տարի մենք ունենք անկախ Արցախ պետություն, միայն պետք է համաշխարհային ճանաչում լինի։ Բանակցության հիմքում պետք է լինի Արցախի անկախության հարցը։ Այդ հարցից հետո արդեն կարելի է բանակցել այլ տարածքների, այլ խնդիրների շուրջ։ Ես ասում եմ՝ ժողովուրդը արդեն 30 տարի Արցախի անկախ պետության հարցը կարգավորել է, լուծել է։ Միայն մնում է համաշխարհային ճանաչում, որից հետո կարելի է մնացած ցանկացած հարց քննարկել»,- ասաց Ծառուկյանը։
Հարցին, թե ինչպես է գնահատում բանակցային գործընթացում ՀՀ իշխանության քայլերը, ԲՀԿ առաջնորդը պատասխանեց՝ ամենակարևորը՝ ուզում են անել, բայց մարդ պետք է լիարժեք պրակտիկ փորձ և ձեռքբերում ունենա. «Կամ ովքեր այդ փորձն ունեն, նրանց հետ հարկավոր է խորհրդատվական միջոցառումներ կազմակերպել։ 20 հոգու կարելի է լսել և վերցնել ամենալավը։ Ամենագետ մարդ աշխարհում չկա։ Մարդը պարտավոր է ցանկացած քաղաքական ուժի, վերլուծաբանի տեսակետը լսի, քննարկի, ապա էդ բոլորը համախմբի ու կլինի ընտիր բան։ Եթե այսօր մենք բոլորս ուզում ենք, որ մեր խնդիրները լուծվեն, ապա պետք է լսենք բոլորին, տեսնենք՝ ինչը օգուտ է երկրին, ժողովրդին, տնտեսությանն ու պետությանը, այն էլ ներկայացնենք։ Ես հիմա ասում եմ իմ տեսակետը, թող դրանից լավն առաջարկեն, մենք ընդունենք։ Իսկ իմ հարցին թող դիմացս նստելով պատասխանեն, ոչ թե ֆեյքերով-մեյքերով, ցեխ շպրտելով։ Թե չէ ֆեյքը ինչ-որ մեկին պաշտպանելով գրում է, տենց երկիր չենք կառուցի»։
Ծառուկյանը նաև անդրադարձավ մյունխենյան հանդիպման ժամանակ Ադրբեջանի նախագահ Իլհամ Ալիևի այն մտքին, թե Հայաստանի մեծ մասը ադրբեջանական տարածք է։ Ըստ ԲՀԿ ղեկավարի, Ալիևին իր խորհրդականներն ու օգնականները ճիշտ տեղեկություն չեն տվել։
«Նրանք պետք է համաշխարհային պատմություն կարդացած լինեին, որ հայերը հազարամյակների պատմություն ունեն, իսկ Ադրբեջանն ընդհանուր առմամբ 100 տարվա պատմություն ունի։ Եթե նա մեջ է բերում Հանքենդին, որ ասենք 1847 թվականին անվանափոխվել է, թող ինքն ասի՝ դրանից հազարամյակներ առաջ դա եղել է հայկական բնակավայր։ Երևանի 2800-ամյակն ենք նշում, իսկ նրանք խոսում են Երևանի մասին՝ իրենց 100 տարվա պատմությունը մոռանալով»,- նշեց նա։
Անդրադառնալով Արմավիրի մարզում իրականացվող համայնքների խոշորացմանը՝ Ծառուկյանը նշեց՝ եթե ժողովրդին նպատակահարմար է խոշորացումը, ապա իրենք կողմնակից ենք. «Այսօր ես այստեղ նստած չպետք է որոշեմ, այլ պետք է համայնքների խոշորացումը լինի ժողովրդին օգուտ տալու համար, մենք ժողովրդին չպետք է ցավեցնենք։ Իհարկե, իմ տեսակետով դա սխալ է, որովհետև գյուղը ասենք 150 կմ էն կողմ է, մի թղթի համար, մի դիմումի համար մեծ խնդիրներ են առաջանալու։
Գյուղացուն մենք մեծ ուշադրություն պետք է դարձնենք, ժողովրդին կերակրողը գյուղացին է, սահման պահողը՝ գյուղն է։ Ու պատկերացրեք, եթե այդ գյուղացին թողեց գնաց, էդ տարածքները չես կարողանա բնակեցնել՝ ոչ տարածքից գիտի, ոչ կլիմայից։ Դրա համար բոլոր քայլերը պետք է կատարվեն՝ մարդկանց մետք է գումար տրվի, որ իրենք գոնե իմանան՝ ինչի համար են այդ սահմանի վրա, ինչու են այդտեղ բնակվում, պահում, զարգացնում։ Գյուղը դատարկվեց, ոչ մի երևանցի չի գնա այնտեղ մնա, կարող է մի փախստական գնալ այնտեղ»։
Հարցին՝ ինքը դիմակների արտադրությամբ զբաղվում է, Ծառուկյանը պատասխանեց պետք է իր աշխատողներին հարցնել, իսկ ինքը զբաղվում է քաղաքականությամբ։
«Աշխարհում ամենահաջողակ քաղաքական գործիչները խոշոր գործարարներն են, ովքեր գիտեն՝ ինչից սկսել, ինչ անել, ինչ ստեղծել, որ ժողովրդի վիճակը լավանա։ Կարող եք Թրամփի օրինակը նայել, նրա օրոք և անշարժ գույքի գներն են բարձրացել, և գործազրկությունն է վերացել, և կյանքի բարելավում է եղել»,- ասաց Ծառուկյանը։
Հարակից հրապարակումներ`
Լրահոս
Տեսանյութեր
Արևմտյան Հայաստանի ու արդեն Արցախի հուշարձանները՝ «ցեղասպանված հուշարձաններ»
