Ձեր վստահելի աղբյուրը

«Խարույկ» արշավական ակումբի հիմնադիր-տնօրեն Գեղամ Օհանյանը ֆեյսբուքյան էջում գրում է. «Րոպեներ առաջ Նիկոլ Փաշինյանի նախընտրական խումբը, իր գլխավորությամբ Ջերմուկի ճանապարհին այցելել էր Ամուլսարի պոստեր։

Հանդիպման ժամանակ, երբ պոստ պահող մեր հայրենակիցները հարցրին, թե որքան պետք է ձգվի այս խնդիրը, բան ու գործ թողած եկել պետության գործառույթն են իրականացնում, Փաշինյանը պատասխանեց․

-Կներեք, բայց ձեր այստեղ կանգնելը հավասար է զրոյի․ Լիդիանը մինչև 2021 թվի նոյեմբերը չի կարող հանքը շահագործել, որովհետև դատական գործ է ընթանում։

Հիմա փորձեմ հիմնավորել, որ դուք մեղմ ասած իրավացի չեք, պարո՛ն Վարչապետ․

1․ Նախորդ տարի ձմռանը, երբ պոստի տղաները թույլ տվեցին, որ Լիդիանը ձնեպատրաստման աշխատանքներ իրականացնի սարի վրա, այսինքն փաթեթավորի իր եղած-չեղածը, բորսայում Լիդիանի ակցիաները անմիջապես բարձրացան։
Այս տարի տղաները թույլ չտվեցին նույն սխալը, և Լիդիանը ընդհանրապես դուրս մնաց բորսայից՝ ապաստան փնտրելով Կանադայի կառավարությունում։

2․ Դաշտային ճանապարհները բացելուն պես, Լիդիանը հայտարարելու է, որ այլևս վերսկսում է շինարարական աշխատանքները և իսկապես կսկսի, որովհետև մեկ այլ բան է հանքը շահագործելը, մեկ այլ բան է շինարարական աշխատանքներ վերսկսելը։ Իսկ դա բերելու է ստորև նշված հետևանքներին․

-Ակցիաները կտրուկ բարձրանալու են, և Լիդիանը թարմացնելու է իր քարոզչամեքենան՝ նոր ձեռք բերած ներդրումներով։

-Լիդիանը կրկին վարձելու է համայնքի որոշ մարդկանց աշխատանքներ տանելու համար, և համայնքում նորից սկսվելու են հակամարտություններ և անառողջ մթնոլորտ։

-Այս երկու տարվա ընթացքում պայքար տարած համայնքը հուսալքվելու է։

Այնպես որ, տղաների այնտեղ գտնվելը որակել զրո ադյունավետությամբ՝ մեղմ ասած ծիծաղելի է։

Կներեք, բայց այս հարցում տարած ձեր անդեմ քաղաքականությունը ոչ մի կերպ վստահություն չի ներշնչում։
Կարելի է ենթադրել հետևյալը․

1․ Դուք կամ գոնե ձեր թիմը դեռ աշնանը ասում էր, որ գարնանը պատասխաններ կլինեն բնապահպանական ասպարեզում, որովհետև քննչականը նոր թափով սկսել է իր աշխատանքները։ Բայց մենք հո գիտեինք, որ գարունը սարերի հետևում չէ, ահա գարունը եկավ և ոչ մի նոր փաստարկներ կամ հակափաստարկներ էլ չկան, վիճակը կրկին անորոշ է։ Բայց դե դուք ևս կռահում էիք, որ գարունը սարերի ետևում չէ և ձեզ պետք են քաղաքական պատասխաններ, խոսքը դրժածի կերպար չստանալու համար։ Եվ այստեղ թաքնված հրաշքն է, երբ որ ձեր թիմը հասկացավ, որ պոստերը բացող չկա, նոր մտքի փայլատակում ի հայտ բերեց, թե բա եթե պոստերը չբացեք այսպես էլ անորոշ կմնա, ողջ մեղքը բարդելով պոստավիկների վրա։ Բայց այստեղ մի հանճարեղ նրբություն կա․ տղաները ճանապարհը փակել են Լիդիանի առաջ, իսկ քննչականը միշտ էլ կարող էր մասնագետների հետ մտնել ստուգումների, այդ ինչպե՞ս ստացվեց, որ պոստավիկներն են մեղավոր քննչականի անգործության համար։ Հարցեր, հարցեր․․․

2․ Ձեր վարած քաղաքականությունից մարդ իսկապես բան չի հասկանում։ Եթե դեմ եք հանքին, բայց չեք կարող հայտարարել որպես առաջին դեմք՝ կաշկանդվելով միջազգային հարաբերությունների սրացումներից, ապա ինչո՞ւ քննչական մարմինը իսկապես չի աշխատում, ինչո՞ւ է անտեսվում համայնքի մեծամասնության կարծիքը, ինչո՞ւ է այսքան զզվանքով վերաբերմունքը լեռը պահողների նկատմամբ։ Թե՞ չեք նկատել, որ տղաները այս 2 տարվա ընթացքում ջանք չեն խնայել ձեր հեղափոխությանը սատարելու համար՝ հետևելով ձեր բոլոր կոչերին, իրականացնելով ձեր բոլոր խնդրանքները՝ դատարանի դռները փակելուց մինչև մարտիմեկյան ցույցերի մասնակցություն։

3․ Ի՞նչ ունեք վախենալու միջազգային հարաբերություններում, երբ որ Դուք լեգիտիմ առաջնորդն եք Ձեր երկրի։ Եթե չունեք, ինչպես բազմիցս նշել եք, ապա ինչո՞ւ չեք կատարում հանրության պահանջը և թողնում, որ ժողովուրդը ուղղակի վստահի Ձեզ։ Դուք չարաշահում եք Ձեր հանդեպ ունեցած վստահությունը և դա Դուք զգացիք այսօր, քիչ առաջ, հանդիպելով արդեն 2 տարի տուն-տեղ, աշխատանք թողած ու այս երկրի բարօրության համար պայքարող մարդկանց։

4․ Ասում են՝ միջազգային ներդրողները կհասկանան, որ Հայաստանը վստահելի երկիր չի բիզնեսի համար։ Սուտ է, սա միֆ է, հորինվածք․․․
Եթե ներդնողը չի տարբերում հանքերի ավերիչ բիզնեսը այլ կառուցողական բիզնեսներից, ապա աստծու սիրուն, թող նմաններն էլ այդպես մտածեն։ Իսկ խելացի ներդրողները, հակառակը, կգան Հայաստան, ես կասեի նոր Հայաստան, ոտեղ կկարողանան ապահով զարգացնել զբոսաշրջությունն ու ՏՏ ոլորտը, առողջարանային բիզնեսն ու գյուղատնտեսությունը։ Այն ոլորտները, որոնք Դուք հայտարարել եք գերակա ճյուղեր և որոնց բոլորի թշնամին նույն ինքը ՀԱՆՔՆ է։

Անվերջ կարելի է ծավալվել, բայց այս նախընտրական շրջանում, ուղիղ եթեր մտնելով ու միայն «Եվ այդ մեկ առաջնորդը դու ես» ասելով տեղ չեք հասնի։ Ամուլսարի խնդիրը հետաքրքրում է տասնյակ հազարավոր գրագետ ու կիրթ մարդկանց, որոնք հետևում են Ձեր մոտեցմանը այդ հարցում։ Եվ եթե թույլ չենք տալիս, որ այս խնդիրը որոշ ուժեր դարձնեն իրենց հաղթաթուղթը, Դուք դա պիտի ամենից լավը հասկանայիք։

Կանցնեն տարիներ, հետո կհիշենք բոլորով՝ Նիկոլի օրոք
կար մի խնդիր Ամուլսար անունով, որտեղ ժողովրդի պահանջի դեմ էր գնում թե՛ իշխանությունը, թե՛ ընդդիմությունը, բայց ժողովուրդը ի վերջո հաղթեց և հաղթեց նրա հետ ճշմարտությունը․․․»: