Երևանի քաղաքապետը կոռուպցիայի դեմ պայքարի համատեքստում «ֆիգուրատիվ» արտահայտություն է անում
«Եթե մինչև համաճարակը Երևանի մետրոն ունենում էր 75 հազար ուղևորափոխադրում, ապա այս պահին ունի՝ 15 հազար, այսինքն՝ 5 անգամ մետրոյի հոսքը պակասել է»,- այս մասին այսօր Հայկական միասնական տեղեկատվական կենտրոնում տեղի ունեցած ասուլիսում ասաց Երևանի քաղաքապետի տեղակալ Սերգեյ Հարությունյանը։
Նրա խոսքով՝ նույն վիճակն է արվտոբուսային փոխադրումների դեպքում. եթե նախկինում օրական կազմում էր 70 հազար ուղևորներ, հիմա 20 հազար է: «Նախկինում օրական մինչև 850-900 միկրոավտոբուս էր դուրս գալիս երթուղի, այս պահին՝ 500-ը: Այն վարորդները, որոնք 60 և ավելի տարիքի են կամ ունեն խրոնիկ հիվանդություն, ապա ինքնամեկուսացվում են, բնականաբար, տրանսպորտի պակաս կա: Քաղաքի բոլոր ուղղություններով կան գնացող տրանսպորտային միջոցներ, կա նաև դրանց քանակի անբավարարություն և հայցում ենք քաղաքացիների ներողամտությունը, անհարմարութունները ժամանակավոր են»,- նշեց նա։
Փոխքաղաքապետն անդրադարձավ նաև տրանսպորտային միջոցների աղտահանմանը. «Պարազապես ուզում եմ տեղյակ պահել, որ բոլոր տեսակի տրանսպորտային միջոցները՝ անկախ սեփականության տեսակից, աղտահանվում են: Հիվանդությունների վերահսկման և կանխարգելման կենտրոնի ցուցումով՝ համապատասխան ՓԲԸ-ի կողմից՝ միջազգային չափանիշներով է արվում այն ամեն օր»։
Ինչ վերաբերում է քաղաքացիների մեկուսացմանը, քաղաքապետարանի պաշտոնյան նշեց՝ հստակ թվեր չունի, թե տներում քանի մեկուսացված մարդ կա, բայց մարդիկ, որոնք ունեցել են երկրորդ կոնտակտը վարակվածների հետ, բայց չունեն ջերմություն՝ մեկուսացված են տանը.
«Վերահսկողությունը իրականացվում է առաջնային օղակի պոլիկլինիկայի մեր հարգելի բժիշկների կողմից, որոնք շաբաթ և կիրակի օրն էլ աշխատում են: Հորդորում ենք ցանկացած ժամանակ դիմել պոլիկլինիկայի բիշկներին»:
Լրագրողներից մեկը հիշեցնելով նախօրեին Հայկ Մարությանի այն հայտարարությունը, որ կկտրի այն մարդկանց գլուխները, ովքեր զբաղվում են կոռուպցիայով՝ հարց ուղղեց, թե արդյոք քաղաքապետը պատրաստ է կտրել նրանց գլուխները, ովքեր կվտանգեն հանրային առողջությունը քաղաքում: Սերգեյ Հարությունյանը պատասխանեց, որ ԱԺ-ն արդեն ընդունել է պատժի համապատասխան որոշում և ինքը կարծում է, որ բոլորն էլ դեմ կլինեն նրան, ով իր նեղ կարիքները բավարարելու համար վարակ կտարածի:
Հարցին միջամտեց Երևանի քաղաքապետի մամուլի խոսնակ Հակոբ Կարապետյանը. «Բոլորի համար էլ հասկանալի էր,որ քաղաքապետի արտահայտությունը կոռուպցիայի դեմ պայքարի համատեքստում ֆիգուրատիվ արտահայտություն էր և հենց քաղաքապետը հաջորդիվ ներկայացրեց, թե ինչի մասին է խոսքը, այնպես որ հասկանալի է՝ այն ինչ արվում է, արվում է օրենսդրության շրջանակներում»:
Քաղաքապետի տեղակալը նաև հայտնեց, որ խորհրդակցություններ են անցկացվել վարչական շրջանների ղեկավարների հետ և բոլոր տեղերում բազմաբնակարանների մուտքերը, վերելակները և աղբատարները աղտահանվում են:
Ասուլիսի ժամանակ քաղաքապետի մամուլի քարտուղարն ընթերցեց նաև քաղաքացու հարցը, թե ինչու չի աղտահանվում Քանաքեռ- Զեյթունի բազմաբնակարաների մուտքերը: Ասուլիսի ավարտին սակայն մամուլի սրահում գտնվող այդ վարչական շրջանի լրագրողն ասաց, որ իրենց շենքում աղտահանել են: