Ձեր վստահելի աղբյուրը

Հայաստանի քրեական դատավարության մասին օրենսգրքում փոփոխություններ  և լրացումներ կատարելու մասին օրենքի նախագծի քննարկման ժամանակ «Լուսավոր Հայաստան» խմբակցության ղեկավար Էդմոն Մարուքյանը իր մտահոգությունը հայտնեց խափանման միջոցների փոփոխման դրույթների վերաբերյալ:

«Մենք գիտենք մարդկանց, ովքեր իրենց խափանման միջոցը՝  կալանավորումը,  անցկացնում են հիվանդանոցում, ընդ որում՝ ամիսներով: Հիմա քանի կոպեկի արժեք ունի խափանման միջոցը կալանք ընդունելը, երբ որ մեկը միլիոնատեր է՝  հիվանդանոցում է պառկում, մյուսն էլ՝ ով քյասիբ է, նա էլ քրեակատարողական հիմնարկում է կրում պատիժը»,- հայտարարեց պատգամավորը և հարցրեց արդարադատության նախարարին . «Չկա՞ այդ վտանգը, որ ով փող ունի՝ էլի կմնա հիվանդանոցում, իսկ ով չունի՝ կմնա ՔԿՀ-ում: Սա փորձից եմ ասում, հիվանդանոցներում դոլարով միլիոնատերերի պարկելու մասին եմ ասում»:

Արդարադատության նախարարը Ռուստամ Բադասյանը  պատասխանեց. «Որևէ խափանման միջոց ինքնանպատակ չէ, հետևաբար, թե գրավը, թե կալանքը կիրառելիս պետք է հաշվի առնվի թե, որքանով է այն արդյունավետ դրված նպատակներին հասնելու համար: Քրեկատարողական հիմնարկներում քյասիբ չկա,  որովհետև կառավարությունն ամեն ինչ արել է նրա համար, որ նրանք բժշկի ցուցումով, համապատասխան կարիքի դեպքում քաղաքացիական հիվանդանոցում անցնեն  բժշկական օգնություն:

Ինչ վերաբերում է բոլոր հարուստներին, ովքեր կարող են չարաշահել և մնալ հիվանդանոցներում, ասեմ՝ այնպես չէ, որ նրանք հիվանդանոցներում գտնվելու ժամանակ ազատ շփվում են իրենց հարազատների հետ»:

Անդրադառնալով երևույթի կոռուպցիոն ռիսկերի խնդրին՝ նախարարը հայտարարեց. «Բայց ձեր ասածի ենթատեքստը հասկանում եմ, որ դա կարող է չարաշահվել, կամ կոռուպցիոն ռիսկեր պարունակել, մենք էլ պարտավոր ենք թույլ չտալ նման կոռուպցիոն ռիսկեր: Կարող եմ օրինակով ասել, որ մենք այսօր շատ աչալուրջ հսկում ենք, թե արդյոք մարդիկ ունեն նման կարիքներ: Բժիշկները զբաղվում են դրանով»:

Աժ նախագահը Արարատ Միրզոյանն  էլ նկատեց.  «Ես այնպես հասկացա, որ դուք կոնկրետ դեպքեր գիտեք, պարոն Մարության: Սա ուղղակի հաղորդում է հանցագործության մասին, այնպես որ խնդրեմ՝ բարձրաձայնեք առիթի դեպքում»: