Դեռ մի երկու շաբաթ, տասը օր կդիմանանք, էլի. քաղաքացին՝ Փաշինյանին
Վարչապետ Նիկոլ Փաշիյանն արդեն երկրորդ օրն է՝ հեռախոսազանգեր է իրականացնում և զրուցում քաղաքացիների հետ՝ հասկանալու, թե ինչպես են նրանք «դիմանում» արտակարգ իրավիճակին։
Քաղաքացիներից մեկն, արձագանքելով վարչապետի հարցին, նշեց՝ հիմնական խնդիրն այն է, որ երեխաները փոքր են և դուրս ու ներս են ուզում անել։
Վարչապետի հարցին՝ արդյո՞ք որևէ սոցիալական խնդիր չունեն, քաղաքացին պատասխանեց. «Չէ, մենակ ամուսինս է աշխատում, էն էլ հիմա տանն է, մի քիչ հավաքած գումար ունենք, էդ ենք ծախսում։ «Գնունի» առևտրի շուկայում է աշխատում, բայց սնունդ առնելու խնդիր դեռ չունենք։ Դեռ մի երկու շաբաթ, տասը օր կդիմանանք, էլի։ Էդ գումարը լրիվ այլ նպատակով էր, բայց քանի որ պետք է հիմա, պիտի ծախսենք, երեխաները փոքր են, չեն հասկանում՝ ինչ է կատարվում, ուտել են ուզում, խաղալ են ուզում»։
Փաշինյանը հետաքրքրվեց նաև՝ արդյո՞ք զրուցակցի ամուսինը գրանցված է որպես անհատ ձեռնարկատեր, ՀԴՄ-ո՞վ է առևտուր անում, կինը պատասխանեց՝ այո։ Նա նաև տեղեկացրեց, որ արտակարգ դրության օրերին միայն ամուսինն է տնից դուրս գալիս, խանութ գնում։
Իսկ թե արդյոք զրուցակցի շրջապատում կա մարդ, ում մոտ սոցիալական ծանր վիճակ է այս պահին, կինն արձագանքեց՝ չգիտի. «Վարձով ենք ապրում, չենք ճանաչում»։
Շիրակի մարզի Մարալիկ քաղաքի 11-ամյա բնակչուհին էլ նշեց, որ ամեն ինչ լավ է, հեռավար դասեր են անցկացնում։
Փաշինյանը հետաքրքրվեց՝ արդյո՞ք ծնողները աշխատում են, աղջիկն էլ պատասխանեց՝ հայրը արտագնա աշխատանքի է, մայրն էլ՝ տնային տնտեսուհի. «Հայրս Մոսկվայում է, գնացել է, հիմա չեն աշխատում, բայց մեկ շաբաթից կսկեն գործը»։
Վարչապետի հարցրին՝ ինչպե՞ս է ապրում ընտանիքը, աղջիկը պատասխանեց. «Պապիկիս 41 հազար դրամ թոշակով ու հորս ուղարկած գումարով, էլի»։
Իսկ թե վերջին անգամ ե՞րբ է հայրը գումար ուղարկել, աղջիկը պատասխանեց՝ այս տարի գումար չի ուղարկել. «Անցած տարվա բերած գումարից դեռ կա»։
Վարչապետը հետաքրքրվեց՝ այդ 40 հազար դրամով այս պահին քանի՞ հոգով են ապրում, աղջիկն էլ պատասխանեց՝ 4 հոգով.
«Եղբայրս ուսանող է, բայց հիմա էստեղ է, 4 հոգով ենք։ Դե հայրիկի ուղարկած փողով էլ դեռ կարողանում ենք գոյատևել»։
Աղջկա եղբայրն էլ ասաց, որ ԵՊՀ-ի միջազգային հարաբերությունների ֆակուլտետում է սովորում, վճարովի հիմունքներով։ Ուսման վարձն էլ ինքն ու հայրն են հոգում։ Նա նշեց, որ «Դիջիթեյն»-ում է աշխատում, Փաշինյանն էլ հարցրեց՝ մեր Մարիամն էլ չի՞ այդտեղ աշխատում, տղան էլ պատասխանեց՝ այո, իրար հետ ենք աշխատում, նույն շենքում։
Փաշինյանը հետաքրքրվեց՝ ընտանիքի համար այս պահին ամենամեծ խնդիրը ո՞րն է, տղան էլ պատասխանեց՝ ընտանիքի միակ խնդիրն այն է, որ հայրը արտագնա աշխատանքի է մեկնում, Հայաստանում գործ չի գտնում։
Հարակից հրապարակումներ`
- Պետությունը, օգնելով տնտեսվարողներին, ոչ թե մեծահոգություն է ցուցաբերում, այլ օգնում է ինքն իրեն. Թունյան
- Պետությունը պետք է աջակցի փակված ընկերությունների աշխատակիցներին. Մարուքյան
- Ծառուկյան. Բայց խի՞ պետք է վճարեմ