Ոչնչացվելու են կարանտինի ընթացքում քաղաքացիների անձնական տվյալներով բեռնված սերվերները
Կառավարության մամուլի սրահում հրավիրված մամուլի ասուլիսում պարետ Տիգրան Ավինյանի խորհրդական Բագրատ Բադալյանին հարց ուղղվեց, թե արդյո՞ք պարտադիր է, որ քաղաքացիները ներբեռնեն «Կովիդ 19 Արմենիա» ծրագիրը և ինչպես է վերահսկվում այն ինքնամեկուսացված անձը, ով սմարթ հեռախոս չունի:
Բագրատ Բադալյան- Ինքնամեկուսացածներին մենք չեն պարտադրում ներբեռնել հավելվածներ: Քաղաքացին անցնելով ստացած հաղորդագրության հղումով՝ կայքում լրացնում է պահանջվող տեղեկատվությունը: Եթե պարետատունը ծանուցվել է, որ անցել է ժամանակահատված և քաղաքացին չի կատարել պահանջվող գործողությունը, ապա պարետատան ներքո գործող ԱԻՆ թեժ-գիծը զանգում է նրան: Եթե պարզվում է, որ անձը չունի սմարթ հեռախոս, ապա այդ տվյալները հավաքագրվում են մեխանիկական եղանակով՝ այսինքն՝ թելադրում-լրացում:
Մեր բջջային օպերատորները պատրաստակամություն են հայտնել ինքնամեկուսացվածներին տրամադրել բավական ծավալով ինտերնետ ամբողջ ինքնամեկուսացման շրջանի համար:
Հարց- Հավելվածն ունի՞ հնարավորություն տեղորոշելու քաղաքացու գտնվելու վայրը։
Բ.Բադալյան- Այո, հավելվածն ունի նման հնարավորություն: Մենք առաջին անգամ հղման միջոցով նշում ենք անձի գտնվելու վայրը: Հաջորդ անգամ, երբ հաղորդագրությունն ուղարկվում է և անձն իրեն տեղորոշում է այլ վայրում, ապա համակարգն ավտոմատ եղանակով ուղարկում է ծանուցում, որ այդ անձը չի գտնվում ինքնամեկուսացման վայրում:
Հարց- Ինչ ճշտությամբ են բջջային օպերատորները կարողանում տեղորոշել քաղաքացու գտնվելու վայրը:
Բ.Բադալյան- Կա տեղորոշման երկու մեթոդ. մեկը բջջային օպերատորի միջոցով, որի դեպքում, այո, շառավիղը այդքան էլ մեծ չէ: Սա մի մեթոդը: Երկրորդ մեթոդը տվյալ անձի կորդինատների ֆիքսումն է, որը շատ ավելի ճշգրիտ է, և բնակարանի լքման դեպքում հնարավոր է այդ տեղեկատվությունը փոխանցվի մեզ: Բնականաբար, հարևանի տուն բարձրանալը, կամ կողքի սենյակ մտնելը հնարավոր է չֆիքսվի, բայց մենք հույս ունենք, որ մեր հասարակությունն ունի այնպիսի ինքնագիտակցություն, որպեսզի պահպանի ինքնամեկուսացման կանոնները:
Հարց- «Արտակարգ դրության իրավական ռեժիմի մասին» օրենքում փոփոխություններ կատարելուց հետո ի՞նչ ծախսեր են նախատեսված քաղաքացիներին տեղորոշելու համար:
Բ.Բադալյան- Որևէ ծախս նախատեսված չէ, որևէ գումար չի ծախսվել ու չի ծախսվելու այն իրականացնելու համար: Ծրագիրը մշակվել է հայ ծրագրավորողների կողմից՝ կամավորական սկզբունքով, առանց որևէ փոխհատուցման:
Հարց. «Օրենքի ընդունումից հետո քանի հոգի է մեկուսացվել այդ գործիքի կիրառման արդյունքում և հավաքագրված տվյալները ոչնչացվելու են կարանտինից, թե՞ արտակարգ դրության ավարտից հետո, եթե ոչնչացվելու են, իհարկե:
Բ.Բադալյան- Համակարգը գործում է երեկվանից և ինքնամեկուսացվածներ դեռ չկան: Մենք ակնկալում ենք, որ այսօր կլինի ինքնամեկուսացվածների ցանկը: Տվյալները, համաձայն օրենքի, ոչնչացվելու են արտակարգ դրության ավարտից հետո երկշաբաթյա ժամկետում, ընդունված կարգով՝ հանձնաժողովով, որտեղ ընդգրկվելու են բոլոր այն կառույցները, որոնք ներգրավված են եղել այս համակարգի գործածման փուլում: Կառավարությունը դիմելու է ԱԺ-ին՝ խմբակցություններից ներկայացուցիչներ ներգրավելու համար: Ոչնչացումը լինելու է նաև սերվերների ֆիզիկական ոչնչացման եղանակով:
Հարց- Եթե ինքնամեկուսացված անձը հեռախոսը թողնի տանը և դուրս գա, ինչպե՞ս պետք է վերահսկեք։
Բ.Բադալյան- Մենք ունենք վերահսկման երկու համակարգ: Միայն բջջային օպերատորների կողմից ներկայացվող տվյալները չեն: Այդ դեպքում անձը կարող էր թողնել հեռախոսը տանը և դուրս գալ: Երկրորդ եղանակը՝ կարճ հաղորդագրությունների միջոցով է իրականացվում: Ստիպում է անձին ինքնալուսանկարվել, որի միջոցով կարող ենք տեսնել, ինքն է, թե ոչ: Հաղորդագրությունը տարբեր ժամանակահատվածներում են ուղարկում, որպեսզի ինքնամեկուսացվածը չիմանա դրանց ժամերը և այդ ընթացքում չլքի նախատեսված վայրը։: