Ձեր վստահելի աղբյուրը

Կառավարության այսօրվա նիստում վարչապետ Նիկոլ Փաշինյանը հետաքրքրվեց, թե ինչ իրավիճակ ունեն շուկայում, մարդիկ անհանգստանում են, հաճախ բողոքում են գնաճային երևույթներից։

Տնտեսական մրցակցության պաշտպանության հանձնաժողովի նախագահ Գեղամ Գևորգյանն ասաց, որ ամենօրյա մոնիթորինգ են իրականացնում Երևանի և մարզերի խոշոր առևտրային ցանցերում։

«Այսօր արդեն դիտվում է գների նվազման որոշակի միտում, ոչ թե համեմատած փետրվարի, այլ մարտ ամսվա ընթացքում, երբ գինը փոքր ինչ բարձրացել էր, սկսել է նվազել։ Գների աճման միտումը տեղավորվում է 1-4 տոկոս սանդղակում, գների կտրուկ բարձրացում տեղի չի ունեցել»,-  նշեց նա։

Համեմատության համար օրինակներ բերեց  2018 թ նույն ժամանակահատվածի նույն առևտրային ցանցի ու նույն ապրանքատեսակի միջև.  շաքարավազն այս տարվա փետրվարին 230 դրամ է եղել, ապրիլի 8-ի դրությամբ՝ 255 դրամ է դարձել, 2018 թ. նույն ժամանակահատվածում՝  1 կգ-ն արժեցել է 338 դրամ։ 1 կգ կարագը փետրվարին եղել է 3730 դրամ, ապրիլի 8-ի դրությամբ՝ 3790 դրամ, 2018 թ. նույն ժամանակահատվածում՝ 4430 դրամ։

«Այս տրամաբանությամբ որ նայում ենք, բավականին գնանկում կա։ Մենք նայում ենք գների տեմպը, վերցնում ենք ամենաբարձր կենտրոնացված շուկաները։ Այս թվերը ցույց են տալիս, որ շուկայում կա մրցակցություն, որից, կարծես թե, օգտվում է սպառողը»,- ասաց Գ. Գևորգյանը։

Նա նաև նշեց, որ երեկվա դրությամբ բենզինի ռեգուլյար տեսակը եղել է 310 դրամ, պրեմիումը՝ 330 դրամ, դիզելը՝ 370 դրամ։ 2018 թ. նույն ժամանահատվածում եղել է 450, 470, 460 դրամ տրամաբանությամբ։

«Գների կտրուկ աճի մասին խոսք չկա, բայց անկախ ամեն ինչից պաշտոնական գործընթացներ ենք սկսել գրեթե բոլոր շուկաներում։ Արդեն հարուցված վարույթներ ունենք շաքարի, կարագի, հավի  ձվի շուկաներում, գործընթաց ենք սկսել ձեթի, հավի մսի, ալյուրի, ցորենի և մի շարք այլ շուկաներում։ Վստահեցում ենք, եթե որևէ տեսակի իրավախախտում հայտնաբերենք, իսկ մենք արդեն զգուշացում ենք տարածել, որ արտակարգ դրության ժամանակ իրավախախտումները հանձնաժողովի կողմից կդիտարկվեն որպես  ծանրացնող հանգամանք և անպայման պատասխանատվության կենթարկվեն»,- ասաց ՏՄՊՊՀ նախագահը։

Վարչապետ Փաշինյանը նշեց, որ 2019 թվականին և 2020 թվականի առաջին երկու ամիսներին  բազմաթիվ ուղղություններով գնանկումային երևույթներ են ունեցել։

Նա նշեց, որ կառավարությունը, պետական մարմինները պետք է ուշադիր լինեն գների նկատմամբ, բայց նաև դա բավականին ճշգրիտ պետք է անել. «Եթե հանկարծ, այդպիսի կոչեր էլ են հնչել, փորձենք արհեստական միջամտություն անել գների նկատմամբ, ապա շուկայում դեֆիցիտ կունենանք, որովհետև ուղղակի մարդիկ, գործարարները կդադարեն ապրանքներ ներկրել, եթե իրենց ձեռնտու չլինի այդ գործունեությունը։ Այստեղ կա այդ երկու եզրը՝ արհեստական միջամտություն չլինի և իրավիճակից գերշահույթներ ստանալու երևույթներ չլինեն»։

Վարչապետը նաև ասաց՝ ուզում է հիշեցնել, որ Հայաստանն այն փոքրաթիվ երկրներից է, որտեղ խանութների դատարկ ցուցափեղկերի երևույթներ չի նկատվել։