ԼՀԿ թիմը խորհրդատվություն է տրամադրում քաղաքացիներին
ԱԺ «Լուսավոր Հայաստան» խմբակցության ղեկավար Էդմոն Մարուքյանը ֆեյսբուքի ուղիղ եթերում ցույց է տվել, թե ինչպես են «Լուսավոր Հայաստան» կուսակցության ներկայացուցիչները պատասխանում քաղաքացիների հարցերին:
«Ո՞վ և ինչպե՞ս կարող է դիմել սոցիալական աջակցության ծրագրերին։ Զանգահարեք կամ գրեք և ստացեք Ձեր հարցերի առցանց պատասխանները»,- ուղիղ եթերին կից գրել է Մարուքյանը:
«Մենք գտնվում ենք «Լուսավոր Հայաստան» կուսակցության գրասենյակում։ Երեկ հայտարարել ենք, որ կուսակացության գրասենյակում կգործի մեր թիմը, ովքեր կպատասխանեն քաղաքացիների զանգերին ու կուսակցության ֆեյսբուքյան էջին ուղարկված հարցերին, խորհրդատվություն կտրամադրեն, թե ինչպես դիմել կառավարության կողմից հաստատված սոցիալական աջակցության ծրագրերին»,- ասաց Է. Մարուքյանը։
Նա նշեց, որ խորհրդատվությունն այսօր կարևոր է, քանի որ աջակցության համար մարդիկ պետք է դիմեն օնլայն, սակայն ոչ բոլորը կարող են օնլայն դիմել, պետք է ձևը սովորեցնել, ցույց տալ, նաև կան բազմաթիվ չափանիշներ, որոնց համընկնելու դեպքում հնարավոր կլինի ստանալ սոցիալական աջակցությունը։
«Որոշեցինք այս տարբերակով օգնել քաղաքացիներին»,- ընդգծեց Մարուքյանը։
Նրա խոսքով, իրենք նաև հավաքում են այն բազան, ըստ որի բազմաթիվ քաղաքացիների հասանելի չի լինի այս աջակցությունը։
«Հավաքած տեղեկատվությունը կուղարկվի աշխատանքի և սոցիալական հարցերի նախարարություն՝ պատգամավորական հարցման տեսքով, գրավոր, որպեսզի մենք ցույց տանք, թե ինչ ընտանիքներ կան, որոնք կարիքի մեջ են գտնվում, սակայն աջակցությունը նրանց համար հասանելի չի լինում»,- ասաց Է.Մարությանը։
Նա տեղեկացրեց, որ այսօր ու վաղը կաշխատեն մինչև ժամը 18։00-ն, երկուշաբթի օրվանից կվերսկսեն։
Հարակից հրապարակումներ`
- Ինչ կլինի այն քաղաքացիների հետ, ովքեր օգնության համար չեն դիմում սոցապին
- Սոցնախ. Գործարկվել է միանվագ դրամական աջակցության համար դիմումների ընդունման կայքը
- Նոր թեժ գիծ՝ աշխատանքի և սոցիալական հարցերի նախարարությունում
- Փաշինյանը հանձնարարել է արագացնել սոցիալական միջոցառումների իմպլեմենտացիան
- Սոցիալական աջակցություն ստանալու համար՝ զանգել 114 և գրել https://www.facebook.com/mlsa.am/