Ձեր վստահելի աղբյուրը

Երևանի ավագանու նիստում քննարկվեց «Հայաստանի ժուռնալիստների միություն» հասարակական կազմակերպությանը գույքահարկի արտոնություն սահմանելու մասին հարցը։ Նախքան հարցի քննարկմանն անցելը, Երևանի քաղաքապետ Հայկ Մարությունն ասաց. «Այ, սա հետաքրքիր է»։

Հիշեցնենք, որ նախքան այս հարցի քննարկմանն անցնելը, ավագանին արդեն քննարկել և ընդունել էր  ևս մի քանի ՀԿ-ների գույքահարկի արտոնություն սահմանելու մասին հարցերը։

Որոշման  հմնավորման մեջ նշվում է. «Հայաստանի ժուռնալիստների միություն» հասարակական կազմակերպությանը սեփականության իրավունքով պատկանող Պուշկինի փողոց 3/1 հասցեում գտնվող շինության 2017, 2018 և 2019 թվականների գույքահարկի գումարը 19.03.2020 թվականի դրությամբ կազմում է 6540987 /վեց միլիոն հինգ հարյուր քառասուն հազար ինը հարյուր ութսունյոթ/ դրամ: Հայաստանի ժուռնալիստների միությունը ստեղծագործական հասարակական կազմակերպություն է, որը միավորում է մամուլի, հեռուստատեսության, ռադիոյի, լրատվական գործակալությունների, հրատարակչությունների պրոֆեսիոնալ աշխատողներին։ Հայաստանի ժուռնալիստների միությունը լրագրողների միջազգային ֆեդերացիայի, լրագրողական միությունների միջազգային կոնֆեդերացիայի անդամ է։ Հիմնական նպատակն է նպաստել բազմակարծության զարգացմանը, մեդիա օրենսդրության բարեփոխմանը, զանգվածային լրատվամիջոցների և խոսքի ազատության սահմանադրական իրավունքի ամրապնդմանը։ Միության առաքելություններից է նաև լրատվամիջոցների աշխատողների մասնագիտական վարպետության բարձրացումը։ Ելնելով վերոգրյալից, Երևան քաղաքի ավագանու քննարկման է ներկայացվում «Հայաստանի ժուռնալիստների միություն հասարակական կազմակերպությանը գույքահարկի արտոնություն սահմանելու մասին» Երևան քաղաքի ավագանու որոշման նախագիծը`6540987 /վեց միլիոն հինգ հարյուր քառասուն հազար ինը հարյուր ութսունյոթ/ դրամի չափով»:

Ավագանու ԲՀԿ խմբակցության անդամ Հռիփսիմե Առաքելյանն ասաց, որ Ժուռնալիստների միության  նախկին նախագահի վատ կառավարման արդյունքում միությունը հայտնվել է դժվարին իրավիճակում, դատական պրոցեսներ են ընթանում,  վերջին երկու տարում հնարավորություն չի ունեցել Ժուռնալիստների միությունն իր ֆինանսական միջոցները բարելավել։ Նա նշեց, որ ինչպես մյուս ՀԿ-ների դեպքում, այս դեպքում էլ կողմ է քվեարկելու այս նախագծին։

Որոշումն ընդունվեց 19 կողմ, 7 դեմ, 11 ձեռնապահ ձայների հարաբերակցությամբ։