Ձեր վստահելի աղբյուրը

Թրամփ-Բայդեն ընտրապայքարը թևակոխում է նոր փուլ՝ չնայած համավարակի տարածմանը: Երկու քաղաքական ճամբարները փոխադարձ խստորեն քննադատում են միմյանց։ԱՄՆ նախագահ Դոնալդ Թրամփը սովորաբար չի հապաղում քննադատել իր քաղաքական հակառակորդներին, սակայն փոխնախագահ Ջո Բայդենի դեմ սեռական ոտնձգության մեղադրանքների հարցում նախագահը շատ ավելի զուսպ է: Այս մասին գրում է Ամերիկայի Ձայնը։

Վերջինս այս հարցին չի անդրադարձել մինչև ապրիլի 30-ը, մեկ ամիս անց այն պահից, երբ Տարա Ռիդը՝ Սենատի նախկին աշխատակցուհին մեղադրեց նախկին փոխնախագահ Բայդենին սեռական ոտնձգության մեջ: Բայդենը կտրականապես հերքեց այս մեղադրանքը:

Մեկնաբանելով այս հարցը՝ Թրամփն ասել է, որ որևէ բան չգիտի դրա վերաբերյալ ու գտնում է, որ Բայդենը պետք է պատասխանի մեղադրանքներին, որոնք կարող են լինել կեղծ: Նա նշել է, որ չափազանց լավ գիտի՝ ինչ են կեղծ մեղադրանքները, քանի որ ինքն անձամբ շատ հաճախ է կեղծ քննադատվողի տեղում հայտնվել: Նույնատիպ մեկնաբանություն նախագահը տվել է մեկ այլ հարցազրույցում:

Նախագահ Թրամփի այս վարքագիծը բացատրվում է քաղաքական նոր իրողություններով: Նախկինում նախագահը բազմիցս անդրադարձել էր Հիլարի Քլինթոնի դեմ պայքարի ժամանակ վերջինիս ամուսին Բիլ Քլինթոնի սեռական սկանդալներին: Այսօրվա Բայդեն-Թրամփ պայքարը նախագահի աթոռի համար ընթանում է արդեն #MeToo շարժման վերելքից հետո, որն ուղղված էր կանանց իրավունքների պաշտպանությանը: Բացի այդ, կառավարման իր օրերին, Թրամփի վարչակազմը առնչվել էր դատավոր Քավանոյին Գերագույն դատարանի դատավոր նշանակելու գործի հետ, որը մոտ էր ձախողման սեռական ոտնձգության մասին սկանդալի ու լսումների պատճառով:

Այդ օրերին նախագահը պնդում էր, որ Քավանոի նկատմամբ մեղադրանքները շինծու են: Այսօր Թրամփի քարոզչական թիմը փորձում է դեմոկրատներին ներկայացնել որպես կրկնակի չափանիշներ կիրառող ուժ ՝ սեռական ոտնձգության մեղադրանքների հարցերում: Սա է այն հիմնական ուղերձն է, որ փոխանցում է Թրամփի թիմն իր աջակիցներին այս հարցի վերաբերյալ:

Բայդենի նախընտրական թիմն իր հերթին հերքել է մեղադրանքը, սակայն պաշտպանել կանանց՝ մամուլի միջոցով սեփական փորձը հանրության հետ կիսելու իրավունքը: Ինքը Բայդենը մեղադրանքներին չի անդրադարձել մինչև մայիսի 1-ի հարցազրույցը, ուր նա կտրականապես հերքել է մեղադրանքները: Նա հերքել է դրանք նաև հաջորդ հարցազրույցներում:

Սակայն շաբաթների լռությունն այս հարցի շուրջ մտահոգություններ է առաջացրել Բայդենի կողմնակիցների ճամբարում: Կանայք հանդիսանում են նրա ընտրազանգվածի կարևոր հատված, և նրանց աջակցության նվազումը կարող է զգալի վնասել Բայդենի նախընտրական քարոզարշավին:
Այսօր Բայդենի թիմը փորձում է վերադառնալ համավարակի խնդիրներին ու վարչակազմի բացթողումներին այս հարցում: Ուրբաթ օրը Բայդենն իր ելույթում կենտրոնացավ տնտեսական խնդիրների վրա ընդգծելով, որ այս հարցում նախագահի քաղաքանությունը ձախողվել է և նա ուշացումով է արձագանքել համավարակին: