Ձեր վստահելի աղբյուրը

«Կային ժամանակներ, երբ Նիկոլ Փաշինյանը դեռ չէր հասցրել ծանոթանալ Ադրբեջանի կիրթ ու կառուցողական նախագահի հետ։ Ադյ ժամանակ, երբ Նիկոլ Փաշինյանը դեռ չէր փորձում Հայաստանի ժողովրդի, Արցախի ժողովրդի ու Ադրբեջանի ժողովրդի շահերը հավասարեցնել, նա ԵԱՏՄ-ն որակում էր որպես թշնամի կառույց, նա հայտարարում էր, որ Հայաստանի ԵԱՏՄ-ականացումը ադրբեջանցում է»,-հերթական տեսանյութն այսպես սկսեց Սուրբ Աթոռում նախկին դեսպան Միքայել Մինասյանը։

Սակայն ժամանակները փոխվեցին, Փաշինյանը դարձավ վարչապետ, և եթե, ինչպես նշում է Մինասյանը, հարցը վերաբերում է անձնականին, ապա այն Փաշինյանը վեր է դասում պետական շահից։

«Նիկոլ Փաշինյանը ԵԱՏՄ-ում Հայաստանի քվոտայով  նախարար նշանակեց իր վաղեմի ընկերոջը, մի անձնավորություն, որ երբեք չի աշխատել Հայաստանում, Հայաստանի համար, չի եղել ՀՀ քաղաքացի։

Իր վաղեմի ընկեր Արտակ Քամալյանը։ Նրան արագ շնորհվեց ՀՀ քաղաքացիություն, ու Արտակը նշանակվեց նախարար»,-մանրամասնեց Մինասյանն ու նկատեց, որ Քամալյանը մեծացել է, աշխատել է, հասուն կյանքի գործունեությունն անցկացրել է մեզ համար հարազատ դարձած, հայկական բիզնեսի կենտրոն դարձած ռուսական քաղաքում՝  Վորոնեժում։

Նախկին դեսպանն ասաց, չի սպասել որևէ արձագանքի, փաստարկի, բացատրության չի սպասել, որ կհերքի իր ասածները, որ քանի որ դրանք 100 տոկոսով համապատասխանում են իրականությանը։

«Այն, ինչ ես ասում եմ, վստահեցնում եմ, 100 տոկոսով համապատասխանում է  իրականությանը, չեմ ասի մի բան, որի վրա վստահ չեմ կամ չեմ ստուգել 100 անգամ»,-նկատեց Մինասյանն ու ավելացրեց, որ ինքն էլ կարող է սխալ լինել, երբ կլսի փաստարկված խոսք, որ հերքում է իր ասածները, կխոստովանի՝ ինքը սխալ է եղել։

Մինասյանն ասաց, հույս ուներ, որ  Փաշինյանին իր ուսերին բերած ու վարչապետ սարքած ժողովրդին կտրվի բացատրություն։

«Այդ ընտանիքը, որ այսօր մինչև կոկորդը խրված է կոռուպցիայի մեջ, ոչ միայն չի բացատրում, այլև մունաթ է գալիս ժողովրդի վրա։ Ես իհարկե խոսում եմ Նիկոլ Փաշինյանի վերջին լայվի մասին»,-նշեց Մինասյանն ու թարգմանեց Փաշինյանի խոսքը՝ «ինչ ուզում եմ, անում եմ, լավ եմ անում»։

Նա նկատեց, միայն այդպես կարելի է  բացատրել պետական ապարատի տոտալ լռությունը, քրեական գործ չհարուցելը մաքսանենգ ծխախոտի արտահանման փաստով։ Պեկ նախագահն ասում է,  եթե Ռուսաստանում քրեական գործ չի հարուցվել, ապա մեզ համար խնդիր գոյություն չունի։

«Իսկ կարող է վախո՞ւմ եք, որ մաքսավորները սկսեն խոսել, իսկ կարող է վախո՞ւմ եք, որ մաքսավորները կոնկրետ տան Շուշաննա Ներսիսյանի անունը, ինքն էլ տա Աննա Հակոբյանի անունը։ Իսկ կարող է մաքսավորները կոնկրետ տան Սիփան Փաշինյանի ու Հրաչյա Հակոբյանի անունները։ Իմ մոտ տպավորություն է, որ քրեական գործ չի հարուցվում, քանի որ կա սարսափ, բայց դա չի խանգարում շարունակել բիզնեսը»,-ասաց նա՝ կրկին ընդգծելով, որ Հայաստանում կա մաֆիոզ համակարգ, ինչի հետևանքով կան լուրջ խնդիրներ։

Մանրամասները՝ տեսանյութում։