Աշխատակից. Հայկ Մարությանի կինն ամեն օր գալիս էր Կանաչապատման ՀՈԱԿ
Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի աշխատակիցներն ակցիան են իրականացնում. աշխատակիցները ազատման ծանուցագրեր են ստացել։ Աշխատակիցների ներկայացմամբ, երեք հոգի արդեն ծանուցագիր են ստացել։
«Մեկ ամիս է, ինչ պաշտոնավարում է նոր տնօրենը։ Ասում է՝ դիմում գրեք ու ազատվեք աշխատանքից։ Ասում եմ՝ ներկայացրեք պատճառը, թե ինչ հիմքով։ Ասում է՝ ՀՈԱԿ-ի անվտանգությունից ելնելով։ Ասում եմ՝ անձնական, աշխատանքային, մասնագիտական գեթ մեկ օրինակ նշեք, որ չենք կարողացել գոհացնել, ասում է՝ խնդիրը ոչ անձնական է, ոչ մասնագիտական»,- ասաց աշխատակիցներից մեկը։
ՀՈԱԿ-ի հասարակության հետ կապերի, լրատվության բաժնի ղեկավար Արթուր Աղաբեկյանն ասաց, որ վատ մթնոլորտը սկսվել է ապրիլի 28-ից, երբ ապրիլի 27-ից նախկին տնօրեն Արմեն Բեգոյանը հեռացվեց։
«Արա Աղայանին բերեցին նոր տնօրեն, ներկայացրեցին ու սկսվեց այն քաոսը, որ մինչև օրս շարունակվում է։ Առաջին օրվանից նա և իր բերած անձնակազմը՝ տեղակալ և այլն, անհասկանալի մարդիկ, սկսեցին չբարևել անձնակազմին։ Ինքը եկել է, մենք իրեն ժպիտով դիմավորել ենք։ Երևանի քաղաքապետարանի աշխատակազմի ղեկավարն ասել էր, որ կադրային ջարդ չի լինելու, շարունակելու ենք նորմալ աշխատանքը, բայց արհամարհական ու վատ վերաբերմունքը շարունավում է մինչ օրս», -նշեց նա։
Հարցին՝ կադրային ջարդ է տեղի ունենում, միգուցե նրա հետ է կապված, որ նախկին ղեկավարի կադրե՞րն եք, աշխատակիցներից մեկը պատասխանեց. «Ըստ հավանականության։ Անձնական ոչինչ չկա»։
Ա. Աղաբեկյան և ևս մեկ աշխատակից՝ կադրերի բաժնի պետը, ասացին, որ իրենք են ազատման դիմում գրել, քանի որ չէին կարող աշխատել նման պայմաններում։ Բացի հասարակայնության հետ կապերի բաժնից, նաև գործավարուհին է ազատման ծանուցում ստացել։
«Մենք կփորձենք ամեն տեղ դիմել, բայց այստեղ կանգնած յուրաքանչյուրը հիասթափված են և չեն հավատում, որ իրավական ճանապարհով այս հարցը կլուծվի։ Դիմում եմ վարչապետին, որ եթե այս երկրում կա արդարություն, ոտնահարված չեն մարդու իրավունքները, ընդամենը ժամերի ընթացքում նոր տնօրենը պետք է հրաժարական տա, ազատման դիմում գրի ու հեռանա»,- ասաց Ա. Աղաբեկյանը։
Նա նշեց, որ քաղաքապետի կնոջը տեսել են քաղաքապատերանի շենքում, իրենց ՀՈԱԿ-ում։
Մեկ այլ աշխատակից ասաց. «Ամեն օր գալիս էր ՀՈԱԿ։ Ես բավականին շուտ եմ գալիս աշխատանքի, մինչև ժամը 9-ը, եղել է, որ ես եկել եմ, ինքն արդեն ՀՈԱԿ-ում է եղել: Այո, առնչվել ենք որոշ հարցերում: Ինչ-որ բաներ հարցրել է, պատասխանել եմ: Հրահանգներ չի տվել, բայց խնդրել է դիմում ընդունել աշխատանքի մեկ անձից: Չեմ կարող ասել ում համար, որովհետև դա անձնական տվյալ է։ Դա եղել է հին տնօրենի օրոք»։
ՀՈԱԿ-ի հասարակայնության հետ կապերի, լրատվության բաժնի ղեկավարն ասաց. «Ըստ խոսակցությունների, Իվա Մարությանը որոշել է կադրային քաղաքականությունն ինքը վարի: Անգամ այն հաստիքը, որը ես եմ զբաղեցնում, դրա շուրջ վեջ է եղել, որ ինքն իր մարդուն պետք է բերի, նշանակի: Այդպիսի շատ հաստիքներ կան: Հին տնօրենը դրան դեմ է գնացել և պատճառներից մեկը, ըստ խոսակցությունների, դա է, որ լարվել են հարաբերությունները հին տնօրենի հետ: Այսինքն, հին տնօրենը նրա ձեռքում խամաճիկ չդարձավ»:
Երևանի ավագանու «Լույս» խմբակցության անդամ Թեհմինա Վարդանյանն ասաց, որ նույնիսկ իր համար էլ անսպասելի էր, որ չի անցնի մեկ ամիս և այս հիմնարկից այսքան դժգոհություններ կլինեն ու նոր տնօրենից։
«Ես մասնակցել եմ տնօրենի մրցույթին, որի ժամանակ երկու թեկնածու ընտրվեցին, ընտրությունն արդեն լինելու էր Երևանի քաղաքապետ Հայկ Մարությանի անձնական որոշումը։
Բոլորս գիտենք, ինչեր տեղի ունեցան վերջին 1-2 ամսում կապված «Թափառող կենդանիների վնասազերծման» ՀՈԱԿ-ի, հետագայում Կանապատչաման հիմնարկի տնօրեն Բեգոյանի և քաղաքապետի կամ նրա կնոջ միջև։ Վերջին նիստի ժամանակ քաղաքապետը շատ գռեհիկ, ցածրորակ արտահայտություն իրենց թույլ տվեց, երբ ԲՀԿ-ից տիկին Առաքելյանը հարցրել էր, թե ի՞նչ խնդիր կա, ասաց՝ դե աղջիկներն իրար մեջ ինչ-որ բան չեն կիսել։ Աղջիկներ ասելով՝ նկատի ուներ իր կնոջը ու Կանաչապատման ՊՈԱԿ-ի նախկին տնօրեն պարոն Բեգոյանին»,- նշեց ավագանու անդամը։
Թ. Վարդանյանի խոսքով, այստեղ խորը միտում է տեսնում այն աշխատակիցների հետ կապված, ովքեր պաշտպանել են նախկին տնօրենին, բայց այն, ինչ այս պահին է կատարվում, անթույլատրելի է։
«Ինչ վերաբերվում է քաղաքապետի և կնոջ կապվածություններին բոլոր նորաստեղծ հիմնարկների հետ, ևս ակնհայտ է, թող որևէ մեկը չփորձի սա մեկնաբանել որպես աշխատանք, նաև քաղաքապետը, որն ասում է՝ իմ կինն ինձ օգնում է։ Ուրախ ենք, որ ձեր կինը ձեզ օգնում է, բայց կլինի՞ քաղաքային խնդիրների մեջ, ներողություն արտահայտությանս համար, քիթը չխոթի, որովհետև մասնագետ չէ, պաշտոնյա չէ։ Արդեն երկու տարի լրանում է, մենք ամեն օր լսում ենք քաղաքապետի կնոջ ոդիսականների մասին։ Սա խնդիր է, աննորմալ եմ համարում, կարծում եմ, քաղաքապետը պետք է վերջիվերջո իր կնոջը որոշակի չափերի մեջ պահի, որովհետև քաղաքային տնտեսությունը մասնագիտական է, որևէ մեկն իրավասու չէ քաղաքապետից բացի հրանգներ տալ նրանց աշխատանքների հետ կապված»,- ասաց նա։
Թ. Վարդանյանն ասաց, որ ինքը տեսել է քաղաքապետի կնջը, որը քաղաքապետարանի շենք է գալիս. «Տեսել եմ, երբ մեքենան կայանում էր ծառայողական կայանատեղիում, որտեղ կայանում են միայն աշխատակիցները։ Մեկ տարի քաղաքապետը հերքում էր, բայց արդեն մեկ տարի քաղապետը սկսել է կցկտուր բաներ ասել, տեսավ, որ ամեն ինչ ակնհայտ է դառնում։ Ասում է՝ օգնում է իմ կինը, մի քանի միլիարդի ներդրումներ է բերում։ Այդ ներդրումների պատմությունն էլ կբացահայտվի, այդ ներդրումներն էլ հարթ չեն, այնպես չէ որ քաղաքապետի, առավել ևս քաղաքապետի կնոջ ձեռքբերում է։ Ես խնդրում եմ ամեն ոք մնա իր տեղում, ամեն մարդ իրականացնի իր գործառույթները, այդ թվում քաղաքապետն ու իր կինը»։
Թ. Վարդանյանը կրկնեց, որ ՀՈԱԿ-ի աշխատակիցներին աշխատանքից ազատելու հարցում հստակ միտում է տեսնում, քաղաքապետարան հասնելուն պես անմիջապես գրավոր պահանջելու է քաղաքապետից տրամադրել ազատման հստակ հիմքերը, որովհետև բազմաթիվ մարդիկ մնացել են գործազուրկ, հատկապես այս իրավիճակում։
Հարակից հրապարակումներ`
- «Ժողովուրդ». «ՀՈԱԿ-ը նորմալ աշխատել է, քանդվել է քաղաքապետի տիկնոջ թեթև ձեռքով»
- Հայկ Մարությանը՝ Արմեն Բեգոյանի հնչեցրած մեղադրանքների մասին
- ՀՈԱԿ-ը փնտրում է խնդրահարույց շներին
- «Մի հատ կարգի հրավիրվեք». Անի Խաչատրյանը՝ Բեգոյանին