Ձեր վստահելի աղբյուրը

«Ես դատապարտել եմ Կապանում ոստիկանության գործողությունները և ասել եմ, որ մենք հերթական ձեռքբերումն ենք ջուրը գցում»,- այսօր լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով երեկ Կապանում տեղի ունեցած միջադեպին։

Պատգամավորի խոսքով, 2017 թվականից սկսած ոստիկանությունում բռնությունների մասին որևէ հաղորդագրություն չի եղել, վերջին նմանատիպ հաղորդումը եղել է 2016 թվականին։

«Հիմա եթե ինչ-որ մեկը ոստիկանություն է բերման ենթարկվել, և նրա նկարներից երևում է, որ նա խոշտանգումների է ենթարկվել կամ նվաստացնող անմարդկային վերաբերմունքի է արժանացել, ապա այս մասով ոչ թե պետք է ծառայողական քննություն լիներ, այլ անմիջապես պետք է քրեական գործ հարուցվեր ՀՔԾ-ում, ինչը չի արվել։ Այս մասով կա առերևույթ հանցագործություն, և պետք է քննություն գնա։ Չի կարելի խոշտանգման հետ կոմպրոմիսի գնալ»,- շեշտեց Է. Մարուքյանը։

Ըստ պատգամավորի, ոստիկանություն բերման ենթարկված անձի խոշտանգման հանգամանքը նաև մեծ ազդեցություն կարող է ունենալ երկրի միջազգային վարկի վրա։

«Հիմա իշխանական պատգամավորներն ասում են, որ ոստիկանության գործողություններն իրավաչափ են, բան չունեմ ասելու։ Մարդիկ կորցրել են պատճառահետևանքային կապը։ Իրենց հռչակած գաղափարների և ներկայիս գործողությունների մեջ խզում կա։ Մարդիկ մոռացել են՝ իրենք ինչի համար են իշխանություն։ Իրենք նրա համար են եկել իշխանության, որ ՀՀ-ում չլինի կոռուպցիա, չլինի խոշատանգում, չլինեն մոնոպոլիաներ, չլինեն թայֆաբազություններ և այլն։ Հիմա այդ բոլոր ուղղություններով մենք ունենք ռեգրեսներ։ Եթե մարդը կարող է բռնությունն արդարացներ, էլ խոսելու ոչինչ չկա այդ մարդու հետ, ի՞նչ պետք է խոսենք»,- եզրափակեց խոսքը Է. Մարուքյանը։