Ձեր վստահելի աղբյուրը

«Երբ բռունցքներով հարձակվում են պատգամավորների վրա, բռնություն են գործադրում՝ ոչ մի պատգամավորի դուրս չեք չէ՞ հրավիրել՝ մեկ օրով, յոթ օրով, նախազգուշացում չեք չէ՞ հայտարարել»,-իր ելույթում նշեց Էդմոն Մարուքյանը՝ անդրադառնալով դիմակ չկրելու համար Գևորգ Պետրոսյանին նախազգուշացում հայտարարելու դեպքին:

Պատգամավորը շեշտեց, որ Սահմանադրությունը հնարավորություն չի տալիս խորհրդարանում «ԱԺ կանոնակարգ» օրենքի նորմերը նման ձևով կիրառել:

Մարուքյանը դիմակ դնելը դրական է համարում, բայց այդ քայլով իրականում ընկել են մեկ այլ ծայրահեղության մեջ:

Էդմոն Մարուքյանը փորձելով հասկանալ ԱԺ նախագահի սուբյեկտիվ վերաբերմունքն՝ անդրադարձավ Սասուն Միքայելյանի հետ տեղի ունեցած միջադեպին:

«Միջադեպից հետո վարչապետը ելույթ է ունեցել, արդարացրել է բռնությունը, դուք ծափահարել եք, պարոն Միրզոյան»,- հայտնեց պատգամավորը և նկատեց, որ ԱԺ նախագահը պետք է փորձի մնալ անաչառ, կամ գոնե երևա անաչառ:

Արարատ Միրզոյանն էլ նախ հայտարարեց, որ վաղ առավոտից շտապեցին քննարկել օրակարգի հարցը և մոռացան ողջունել «Լուսավոր Հայաստան» խմբակցության վերադարձը խորհրդարան:

«Ես հիշեցի, մամուլից առնվազն իմ մոտ տպավորություն էր ստեղծվել, որ մեր հարգելի գործընկերները հայտարարել էին՝ խորհրդարան կվերադառնան այն դեպքում, երբ կհնչի տեղի ունեցածի դատապարտում և կլինի քաղաքական գնահատական: Այսօր նիստերի դահլիճում տեսնելով մեր գործընկերներին, կարող եմ ենթադրել, որ այդ գնահատականը հնչել է և բավարարել է «Լուսավոր Հայաստան»-ին»,- հայտարարեց ԱԺ նախագահը և հավաստիացրեց, որ տեղի ունեցածը դատապարտվել է վարչապետի և «Իմ քայլը» խմբակցության պատգամավորների կողմից:

Պատասխանելով Մարուքյանի այն պնդմանը, թե միջադեպի պատճառով որևէ մեկին դուրս չի հրավիրել՝ ԱԺ նախագահը հիշեցրեց, որ այն ժամանակ հայտարարել է ընդմիջում, որի ընթացքում դահլիճից դուրս են հայտնվել 132 պատգամավորները: