Ձեր վստահելի աղբյուրը

«Կարող եք նաև պարոն Ծառուկյանին մեղադրել, որ ասում էր՝ բարի մարդկանց վիրուսը չի կպնում, բայց հիմա նիստերի դահլիճ չի գալիս»,- խորհրդարանում ասաց ԱԺ փոխխոսնակ Ալեն Սիմոնյանը՝ դիմելով Նաիրա Զոհրաբյանին, ով անդրադարձել էր կառավարության՝ դիմակ կրել-չկրելու մասին հակասական հայտարարություններին։

Ա. Սիմոնյանը շեշտեց, որ համաշխարհային բժշկական կազմակերպությունը և աշխարհը նոր է նման խնդրի առերեսվում, ուստի պետք չէ մեղադրել կառավարությանն՝ ասելով, թե նախ մի բան էր ասում, հետո՝ այլ։

Նա նշեց, որ ոչ ոք չգիտի՝ ինչ իրավիճակ կլիներ, եթե, օրինակ ՀՀ առողջապահության նախարարը լիներ Ն. Զոհրաբյանը՝ ավելի վա՞տ կլիներ, թե՞՝ ավելի լավ։

«Կանգնել և ասել, որ ՀՀ քաղաքացու վրա այստեղ որևէ մեկը որևէ մեղք է գցում, արդար չէ։ Մենք պետք է օրինակ ծառայենք, որ ՀՀ քաղաքացին կարգապահ դառնա, ու դա անելու ենք։ Խնդրում եմ՝ ՀՀ գործող իշխանությանը պետք չէ քաղաքացուց առանձնացնել կամ պաշտպանել։ Սա պատերազմ է, որից մենք պետք է պաշտպանենք ՀՀ քաղաքացուն՝ նաև նրան օրինակ ծառայելով»,- ասաց Ալեն Սիմոնյանը։

ԱԺ «Բարգավաճ Հայաստան» խմբակցության պատգամավոր Արման Աբովյանն էլ, անդրադառնալով Ա. Սիմոնյանի ելույթին, խնդրեց ազնիվ լինել։

«Շատ լավ է, որ այսօր պարոն Ծառուկյանի ասածը վերարտադրեցիք, բայց ես էլ իր մի երկու այլ ասած հիշեցնեմ։ Դեռ մարտ ամսին նա զգուշացնում էր, որ պետք է հրատապ փակել Իրանի հետ սահմանը, ի՞նչ պատասխան ստացանք՝ ժպիտ։ Հետո, երբ ասում էինք՝ տնտեսական ճգնաժամ է գալիս, ի՞նչ էիք ասում, էկոնոմիկայի նախարարը ժպիտով նայում էր դեմքիս ու ասում՝ ինչ ճգնաժամ, սցենարը կա, բայց դե չգիտեմ, էլի։ Այսօր ի՞նչ ունենք մենք՝ օրական 500-ից ոչ պակաս հիվանդ, խայտառակ տնտեսական իրավիճակ, ու դուք գիտեք դրա մասին։ Մենք այսօր ունենք ծանրագույն սոցիալական իրավիճակ»,- շեշտեց Ա. Աբովյանը։

Պատգամավորը նշեց՝ չի կարելի պատասխանատվությունը բարդել ժողովրդի վրա. «Բա իշխանությունն ինչի՞ համար է։ Ամեն դեպքում, այսօր տեղի ունեցող զարգացումները վտանգավոր են, ու մենք բոլորս գիտենք դրա մասին։ Այո, պետք է րոպե առաջ քայլեր ձեռնարկվեն, որ այս անդունդային իրավիճակից դուրս գանք»։