Ձեր վստահելի աղբյուրը

«Որևէ երրորդ երկրի հետ Հայաստանի մասնակցությամբ զենքի վաճառքի գործարք տեղի չի ունեցել»,- խորհրդարանում լրագրողների հետ զրույցում ասաց ՀՀ պաշտպանության փոխնախարար Գաբրիել Բալայանը։

Նրա խոսքով, գոյություն ունի Լիցենզավորման մասին օրենք, որի 12.1 հոդվածով սահմանվում են ռազմական արտադրանքի ներմուծման, արտահանման և տարանցիկ փոխանակման հետ կապված իրավահարաբերությունները, և այդ օրենքում փոփոխություն է տեղի ունեցել այն պարագայում, երբ ՀՀ-ի վարկանիշն իջնում էր՝ կապված զենքի առևտրի հետ։

«Ներկայիս պաշտպանության նախարարի ներկայությամբ ու մասնակցությամբ է դա տեղի ունեցել։ Ուստի նման գործարքների գնալը ոչ միայն անիրական ու անհիմն է, այլ նաև անհնար է։ Ես պաշտոնապես հայտարարում եմ՝ դատարկ խոսակցություններ են, 2018 թվականի կառավարության ձևավորումից հետո որևէ նման գործարք չի եղել»,- նշեց Գ. Բալայանը։

Հարցին՝ արդյո՞ք զինված ուժերը ձեռք է բերել այնպիսի տեխնիկա, որն անպիտան է բանակի համար, Գ. Բալայանը պատասխանեց՝ զինված ուժերի սպառազինությունը, ռազմական տեխնիկան ձեռք է բերվում համաձայն ԶՈՒ զարգացման պլանի և մի շարք այլ ծրագրերի.

«Դա խորը պլանավորվող գործընթաց է, ես չեմ կարող այստեղ հայտարարություն անել, որ դա անթերի գործընթաց է։ Հնարավոր է՝ եղել են ձեռքբերումներ, որոնք տեխնիկապես բարեփոխելու, վերափոխելու հնարավորություն ունեն։ Եվ սա նորմալ եմ համարում։ Այստեղ խնդիրն այդ ամենի իրավաչափության մեջ է»։

Գ. Բալայանը տեղեկացրեց նաև, որ կան բազմաթիվ քրեական գործեր, որտեղ կասկածներ կան վերոնշյալ հարցի հետ կապված, բայց քանի դեռ չկա մեղադրական դատավճիռ, պետք է ձեռնպահ մնալ որևէ կերպ մեկնաբանել՝ արդյո՞ք տեխնիկայի ձեռքբերման գործընթացը եղել է ոչ իրավաչափ։

Անդրադառնալով ՀՀ նախկին վարչապետ Հրանտ Բագրատյանի հայտարարությանը՝ եթե ինքը լիներ Ադրբեջանի ղեկավարը, մի երկու ամսից կհարձակվեր Հայաստանի վրա՝ Գ. Բալայանն ասաց, որ այդ հայտարարությունը բավականին ոգևորել է հակառակորդին։

«Մեր մարտունակության վրա դա որևէ ազդեցություն չի ունենում, եթե հակառակորդը փորձում է ոգևորվել դրանից, ապա տեղում ճնշվում է այդ ոգևորությունը։ Չեմ կարող ասել՝ հակառակորդի ոգևորության տեսակարար կշիռը որքանով է կապված այդ հայտարարության հետ»,- շեշտեց Գ. Բալայանը։

Հարցին, թե արդյոք հակառակորդին չի ոգևորում նաև այն հանգամանքը, որ ապրիլյան քննիչ հանձնաժողով է ստեղծվել, որ կասկածի տակ է դրվում հայկական կողմի հաղթանակը, խոսվում է անգամ պատերազմի շուրջ ներքին պայմանավորվածության մասին, պաշտպանության փոխնախարարը պատասխանեց՝ պատերազմ չի եղել, 4-օրյա մարտական գործողություններ են եղել.

«Եվ այն հայտարարությունների համար, որոնցով փորձ է արվում ստվեր գցել այն ծառայության վրա, մենք համապատասխան միջոցներ ենք ձեռնարկելու, որպեսզի այդ հայտարարության հեղինակները իրավական պատասխանատվության ենթարկվեն»։

Գ. Բալայանը տեղեկացրեց նաև, որ Ապրիլյան քննիչ հանձնաժողովը վաղն ավարտելու է աշխատանքը, և զինված ուժերի գործողությունների մասով շատ հետաքրքիր եզրահանգումներ են լինելու։

«Այն ինֆորմացիան, որ ես ունեմ, ինձ տեղ չի տալիս մտածելու, որ Զինված ուժերը որևէ կերպ թերացել է»,- շեշտեց Գ. Բալայանը։