Ձեր վստահելի աղբյուրը

Երևանի ընդհանուր իրավասության դատարանի՝ Էրեբունու նստավայրում, նախագահության դատավոր Դանիել Մխեյանի,  կայացավ  «բնապահպաններն ընդդեմ Տիգրան Ավինյանի» գործով դատական նիստը։

Նշենք, որ 15 հայցվորները պահանջում են պարտավորեցնել փոխվարչապետ Տիգրան Ավինյանին  հերքել զրպարտություն համարվող տվյալները։ Գործը վարույթ է ընդունվել 2019. թ. դեկտեմբերին։

Դատական  նիստին ցուցմունք տվեց հայցվորներից  Անի Խաչատրյանը։ Նա նշեց, որ  հանդիսանում է  «Հայկական բնապահպանական  ճակատ» քաղաքացիական նախաձեռնության կամավոր, այս տարիների ընթացքում բարձրաձայնել են բնապահպանական տարբեր խնիդրներ՝ ապօրինի անտառհատումներ, աղբահանություն, ՀԷԿ-եր, նաև Ամուլսար։

«Ամուլսարի պայքարն այսքան տարի ձգվել է, վերջին երկու տարի ակտիվ փուլ է մտել»,- ասաց նա։

Ա.Խաչատրյանը մոտավոր ներկայացրեց այն հայտարարություն, որի համար հայց են ներկայացրել ընդդեմ Տիգրան Ավինյանի. «2019 թվականի հոկտեմբերի 22-ին Թբիլիսում հայ համայնքի հետ հանդիպմանը հայտարարել էր, որ Ամուսլարի պայքարը ֆինանսավորվում է այլ հանքարդյունաբերող ընկերությունների կողմից, այդ պայքարի մասին չէիք լսի, եթե այդ ֆինանսավորումը չլիներ»։

Հարցին, երբևէ կատարվե՞լ են ձեզ ֆինանսավորում ուղղակի կամ անուղղակի եղանակով Ամուսլարի շահագործման դեմ պայքարի համար, նա ասաց. «Մենք կամավորներ ենք, գրանցված կազմակերպություն չենք, բոլոր այն միջոցները, որոնք օգտագործվում են պայքարի համար, միջոցառումներ կազմակերպելու համար,  գոյանում են տարբեր մարդկանց նվիրատվությունների միջոցով։ Լինում է նաև դրամահավաքներ։ Մենք Հայկական բնապահպանական ճակատի ֆեյսբուքյան էջում ներկայացնում ենք հաշվետվություն, թե ինչքան է փոխանցվել, ինչքան է ծախսվել, ինչի համար»։ 

Նա ընդգծեց, որ իրենք այդ գումարից երբեք իրենց անձնական  նպատակներով չեն ծախսել. «Մեզ մոտ ամեն ինչ թափանցիկ է։ Մեզ համար բնությունը պահպանելը փողերից ավելին է։ Ամեն ինչ անում ենք հանուն գաղափարի, հանուն մեր բնության։ Բնությունը պահպանելը իմ պարտքն է»։

Հարցին՝ արդյո՞ք «Ամուլսարի պայքարը ֆինանսավորվում է  այդ հանքարդյունաբերող ընկերությունների կողմից» արտահայտությունը երբևէ լսել եք կոնկրետ «Լիդիան Արմենիայի» կողմից, Ա. Խաչատրյանը պատասխանեց. ««Լիդիան Արմենիայի»  խոսքերն է ինքը միշտ կրկնում։ «Լիդիան Արմենիան» է պարբերաբար այդ արտահայտությունը կրկնում։ Հանքարդյունաբերող մի ընկերություն «Լիդիան Արմենիային» դատի է տվել զրպարտության համար, նմանատիպ արտահայտությունների համար։ Մի քանի ամիս ընթանում է այդ դատը»։