Ոստիկանները Լուսնից չեն իջել. ոստիկանապետ
«Ոստիկանությունը ուժ կիրառելու իրավասությամբ օժտված մարմին է, հետևապես, եթե դրա կարիքն առաջանում է, ապա ուժ պետք է կիրառվի»,- խորհրդարանում լրագրողների հետ զրույցում ասաց ՀՀ ոստիկանապետ Արման Սարգսյանը՝անդրադառնալով ոստիկանների կողմից դիմակ չկրող անձանց նկատմամբ ուժ կիրառելուն։
Հիշեցնենք, որ այսօր համացանցում հայտնվել էր մի տեսանյութ, երբ դիմակ չկրելու համար քաղաքացու նկատմամբ ուժ էր կիրառվում, և ոստիկաններից մեկն անգամ ոտքը դրել էր քաղաքացու վզին։
Ոստիկանապետի խոսքով, եթե քաղաքացին չի կատարում օրենքի պահանջը, ապա ոստիկանությունը պետք է ուժ կիրառի։
Հարցին, թե ինչպես է գնահատում քայլը, որ միջոցառման ժամանակ բեմադրություն է կազմակերպվել, որում ոստիկաններն ու ԱԱԾ աշխատակիցները դիմակավորված ներս են մտնում և սկսում պարել՝ Ա. Սարգսյանն ասաց՝ շատ վատ։
«Ցավալի է, որ այսքան հորդորներից հետո նման երևույթներ տեղի են ունենում։ Այսօր առավոտյան մենք պարզել ենք այդ տնտեսվարող սուբյեկտին և մեր կողմից կազմվել է արձանագրություն, այսինքն՝ արարքին տրվել է իրավական գնահատական, ու օրենքով սահմանված կարգով պարետատունը միջոցառումներ կսկսի»,- շեշտեց ոստիկանապետը։
Դիտարկմանը, որ կարծես թե համակարգի նկատմամբ անլուրջ մոտեցում կա, և դա ցույց տվեցին նաև Գավառի դեպքերը, երբ հենց ինքը ՀՀ ոստիկանապետը տարածքում էր, սակայն եղան սպանություններ, Ա. Սարգսյանն արձագանքեց՝ ոչ, դա անլուրջ վերաբերմունքի հետևանքով չէ։
Հարցին՝ արդյո՞ք ոստիկանությունը բացթողումներ չի ունեցել կորոնավիրուսի դեմ պայքարում, ոստիկանապետը պատասխանեց՝ չեմ կարծում, որ կա որևէ պաշտոնատար անձ, ով սխալներ չի ունեցել։
«Ւհարկե սխալներ ունեցել ենք, բայց ես չեմ կարող չպնդել, որ ոստիկանությունն իր ուժերի ներածի չափով ամեն ինչ արել է, որպեսզի պարետատան պահանջները պատշաճ կատարվեն։ Սակայն մենք ունենք համազգային խնդիր. ես դուրս եմ գալիս մեր ծառայությունները ստուգելու, և տեսնում եմ՝ որտեղ մենք անցակետեր ունենք, այնտեղ քաղաքացիները ծնոտների տակ դրված դիմակները բարձրացնում և իրենց բերանն ու քիթը փակում, ապա անցակետից հետո կրկին դիմակն իջեցնում են ծնոտի տակ։ Ես ուզում եմ այստեղ ոստիկանության մեղավորությունը գտնել, այն դեպքում, երբ մենք չենք կարող ամեն քաղաքացու կողքին ոստիկան կարգել։ Դա անտրամաբանական է, բայց մենք վարչական մեթոդներ կիրառել ենք, շուրջ 20 հազար վարչական իրավախախտման վերաբերյալ արձանագրություն է կազմվել։ Սկզբնական փուլում քաղաքացիներին բերման էինք ենթարկում բաժիններ»,- մեկնաբանեց ոստիկանապետը։
Նա միանշանակ կողմ է, որ համակարգը պետք է բարեփոխվի։ Ըստ նրա, ոստիկանները հասարակության անդամներ են և ՀՀ հասարակության մի մասն են կազմում, նրանք Լուսնից չեն իջել և ունեն նույն ավանդույթներով ապրելու ու գործելու տրամաբանությանը բնորոշ խառնվածք.
«Ես ինքս ոստիկանության կենտրոնական շենքում անընդհատ փորձում եմ պտտվել և տեսնել՝ դիմակ կրելու պահանջը ոստիկանների կողմից որքանով է կատարվում։ Լինում են դեպքեր, երբ մեր աշխատողներն էլ միջանցքում դիմակներն իջեցրած են լինում»։
Հարակից հրապարակումներ`
- Արման Թաթոյան. Դիմակ կրելը պարտադիր պահանջ է, սակայն ոստիկանների գործողությունները պետք է լինեն համաչափ
- Գևորգ Պետրոսյան. Էս ոստիկանները պետք է ազատվեն աշխատանքից