Հանդիսավարները ուզում են աշխատել, ապրել «ժողովրդի նման»
«Եվս մեկ անգամ կփորձենք իշխանավորների հետ երկխոսության գնանք, եթե չէ, երևի ամսի 15-ից ավելի մեծ թափով կիրակականացնենք բողոքի ակցիա և այդ ժամանակ իրոք կլինենք պահանջատեր, որովհետև այսօր վիճակն օրհասական է»,- հրավիրված մամուլի ասուլիսում հայտարարեց հանդիսավար Եփրեմ Մարգարյանը՝ ներկայացնելով հանդիսությունների սրահները բացելու համար իրենց նախորդ բողոքի միջոցառումը և դրան հետևած զարգացումները:
Հանդիսավարը հարց ուղղեց կառավարությանը, թե ինչի համար է խտրականություն դրվում՝ իրենք հիմա չեն աշխատում, բայց կան ակումբներ, սրճարաններ, «Տաշիր պիցաներ», որոնք աշխատում են:
«Կառավարությունից ցանկանում ենք հասկանալ, թե ինչու գնացին այդ քայլին, եթե փակում են՝ ուրեմն՝ փակվում են բոլորը, եթե ոչ՝ ուրեմն աշխատում են բոլորը»,- նկատեց Եփրեմ Մարգարյանը:
Հանդիսավարը ներկայացրեց նախորդ բողոքի ակցիայի ժամանակ վարչապետի օգնական Նաիրի Սարգսյանի և Տիգրան Ավինյանի օգնական Վարագ Սիսեռյանի հետ ունեցած հանդիպման ընթացքը՝ հայտնելով, որ դրանից հետո ոլորտի ներկայացուցիչները մասնակիցների մեծ թվով ժողովներ են արել և պատրաստ են եղել զիջումների, որի վերաբերյալ համատեղ դիմում են մշակել և ուղարկել կառավարությանը: Ըստ բանախոսի, իրենց խոստացել են պատասխանել երեք օրվա ընթացքում, բայց մինչ օրս չեն պատասխանել:
Հանդիսավարը նշեց, որ իրենք չեն ուզում հարցը քաղաքականացնել, այլ նպատակ են հետապնդում խնդիրը հանրայնացնելու, և քանի որ բողոքի ակցիաները պարետի որոշմամբ արգելված է, դրա համար դիմել են մամուլի միջոցով բարձրաձայնելու ձևաչափին:
«Բազմահազարանոց ոլորտի անունից լիազորված ենք հայտարարելու, որ ընդամենը ուզում ենք աշխատել: Եթե հանրային սննդի օբյեկտներում պարետն թույլատրում է նստել առանց դիմակների, ինչումն է խնդիրը, որ հանդիսությունների սրահներն այսօր փակ են»,- նկատեց բանախոսը:
Հանդիսավարը շեշտեց, որ հազարավոր մարդիկ, ովքեր ներդրումներ են կատարել այս ոլորտում, այսօր սարսափելի խնդիրների առաջ են կանգնած՝ վարկեր են տալիս, վարձակալական հիմունքներով են աշխատում:
Ասուլիսին ներկա մյուս հանդիսավարը՝ Արա Սահակյանը նշեց, որ եղել են ֆեյք էջեր, որոնք առաջին ակցիայից հետո վիրավորել են իրենց՝ անվանելով պիցայակերներ, որ իբր իրենք անվճար խորոված են ուզում ուտել:
«Մենք ընդամենը ուզում ենք ուրախացնել հայ ազգին, ուզում ենք մենք էլ աշխատենք, ապրենք ձեզ նման, ժողովուրդ ջան, մի քաղաքականացրեք»,- հայտարարեց Արա Սահակյանը:
Վերջինս հորդորեց միմյանց չվիրավորել, այլ լինել ջանով և ջիգյարով, իսկ իրենք ընդամենը ցանկացել են իրենց աշխատանքի հարցը լուծել, քանի որ իրենց չաշխատելու պատճառով մի շարք ոլորտներ նույնպես չեն աշխատում:
Եփրեմ Մարգարյանը նշեց, որ կառավարությանը բացի առաջարկներից ներկայացրել են նաև լուծումներ, որ ռեստորաններում լինեն ոստիկաններ և բժիշկներ, համաձայնել են նաև ախտահանման սրահներ ստեղծել, բայց պահանջը, որ սեղանի շուրջ պետք է 5 -6 անձ նստեն, ռեստորանի սեփականատերերին ձեռնտու չէ, քանի որ ծախսերը չի փակվի:
««Տաշիր պիցան օրական 200-400 այցելու է ունենում և այնտեղ տարբեր մարդիկ են մտնում դուրս գալիս՝ մեկը մյուսին չճանաչելով, իսկ հանդիսության եկող մարդիկ իրար ճանաչում են»,- նկատեց բանախոսը:
Հանդիսավարը նշեց, որ մի շարք հանդիսությունների սրահներ կանխավճարներ են վերցրել և այսօր պատվիրատուներն ուզում են դրանք հետ վերցնել, բայց հանդիսությունների սեփականատերերն այդ գումարներն արդեն տնօրինել են և լարված վիճակ է ստեղծվել:
Եփրեմ Մարգարյանը հայտնեց, որ կդիմեն կառավարությանը, որ գոնե բանակցեն իրենց հետ ու եթե ասեն, որ ի զորու չեն որևէ քայլ անելու, ապա ոլորտի աշխատակիցները կհամբերեն:
«Բայց անորոշությունը մարդկանց մոտ արթնացնում է ջղայնություն, եթե լինի որոշակի վիճակ, իմանանք, որ մեկ ամիս էլ պետք է համբերենք, ապա կհամբերենք»,-եզրափակեց հանդիսավարը: