Ձեր վստահելի աղբյուրը

«Բարգավաճ Հայաստան», Հայ Յեղափոխական Դաշնակցություն և Հայրենիք կուսակցությունների կողմից ստեղծված աշխատանքային խումբն այսօր գլխավոր դատախազություն ներկայացրեց հաղորդում հանցագործության մասին։

Աշխատանքային խմբի անդամ, «Հայրենիք» կուսակցության ներկայացուցիչ Արսեն Բաբայանը լրագրողների հետ զրույցում ասաց՝  հաղորդումը վերաբերում է իշխանության յուրացման ու սահմանդրական կարգի տապալման դեպքերին։

«Խոսքը վերաբերում է Սահմանադրական դատարանի երկու տարի առաջ սկսած լիազորությունների յուրացմանն ու ամբողջ գործընթացին»,-ասաց նա։

Դատախազություն էին եկել նաև աշխատանքային խմբի մյուս անդամներ ԲՀԿ-ական Նաիրա Զոհրաբյանը, Միքայել Մելքումյանը, ՀՅԴ-ական Լիլիթ Գալստյանը։

Հիշեցնենք, որ աշխատանքային խումբը տարածել էր  հայտարարություն, որում մասնավորապես ասվում էր.

«Բարգավաճ Հայաստան, Հայ Յեղափոխական Դաշնակցություն և Հայրենիք կուսակցությունները վաղը՝ հունիսի 30-ին, հանցագործության մասին հաղորդում կներկայացնեն ՀՀ գլխավար դատախազություն՝ պահանջելով քրեական գործ հարուցել օրենսդիր իշխանության ներկայացուցիչների և բարձրաստիճան պաշտոնատար այլ անձանց հանցակցությամբ առանձնապես ծանր հանցանքներ կատարելու փաստերի առթիվ:

Լիազոր ներկայացուցիչները հունիսի 30-ին, ժամը 10:00-ին ՀՀ գլխավոր դատախազություն առձեռն կհանձնեն երեք կուսակցությունների համատեղ հաղորդումը հանցագործության մասին։
Հաղորդման հիմքում դրված փաստերի և իրավական հիմնավորումների մասին մանրամասն տեղեկություններ ստանալու համար լրատվամիջոցների ներկայացուցիչներին նույն ժամին հրավիրում ենք ՀՀ գլխավոր դատախազության մուտքի մոտ»։