Քաղաքական գործչին ուզում են ազատությունից զրկել մի հոդվածով, որով տուգանք է նախատեսվում. պաշտպան
«ԲՀԿ առաջնորդ Գագիկ Ծառուկյանն այս ողջ ընթացքում դրսևորել է պատշաճ վարքագիծ, իսկ խափանման միջոցը կիրառվում է, որպեսզի կանխեն անձի ոչ պատշաճ վարքագիծը։ Թե թաքնվելու, թե խոչընդոտելու հանգամանքները բացառվում են»,- ՀՀ վերաքննիչ քրեական դատարանում պաշտպանության և դատախազության բողոքների քննությունից հետո լրագրողներին ասաց Գագիկ Ծառուկյանի պաշտպանական թիմի անդամ Սամվել Դիլբանդյանը։
Նա նշեց, որ գործ ունեն միջին ծանրության հանցագործության հետ, նախատեսված է տուգանք։
«2008 թվականից հետո մինչ այժմ 7 քրեական գործ է եղել Քրեական օրենսգրքի 154.2 հոդվածի (Ընտրողներին կաշառք տալը, կաշառք ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը) հետ կապված, որևէ մեկի նկատմամբ կալանք չի կիրառվել, կիրառվել է՝ ստորագրություն չհեռանալու մասին, այնուհետև՝ տուգանք։ Մեղադրում են անձին մի հոդվածով, որով նախատեսում է տուգանք, ուզում են այդ հոդվածով քաղաքական գործչին ազատությունից զրկել։ Արդյո՞ք նպատակահարմար է անձին ազատությունից զրկելու տեսանկյունից։ Իրականում հանրորեն վտանգավորությունն այնքան մեծ չէ, որ դրանով պետք է բովանդազրկվի նրա ազատության իրավունքը»,- ասաց պաշտպանը։
Նա նշեց, որ 2017 թվականից արդեն բավականին ժամանակ է անցել, իսկ այս արարքի համար 5 տարի վաղեմության ժամկետ է նախատեսված։
«Բացի այդ, այն բազմահազար ընտրողները, որոնք, ինչպես ասում են, հանցագործ են, կաշառք են վերցրել, նրանք 2018 թվականի խորհրդարանական ընտրություններին իրենց կամքն արտահայտել են, այսինքն՝ սոցիալական արդարությունը վերականգնվել է»,- ասաց Սամվել Դիլբանդյանը։
Նա կրկնեց, որ Գագիկ Ծառուկյանի դեմ որևէ ցուցմունք չկա. «Իհարկե, կան ցուցմունքներ, բայց բովանդակային առումով Գագիկ Ծառուկյանի դեմ որևէ ցուցմունք չկա, որն ուղղված լինի նրան, որ Գագիկ Ծառուկյանը հրահանգել է կամ ասել է, որ պետք է ընտրակաշառք բաժանվի։ Նման փաստական տվյալ քրեական գործում բացառվում է»,- ասաց պաշտպանը։
Հիշեցնենք, որ հունիսի 21-ին Երևանի ընդհանուր իրավասության դատարանը մերժել էր Գ.Ծառուկյանին կալանավորելու ԱԱԾ ներկայացրած միջնորդությունը։ Վերաքննիչ բողոքներ են ներկայացրել և պաշտանական թիմը, և դատախազությունը։ Դատախազությունը բողոքարկել է Գագիկ Ծառուկյանի նկատմամբ որպես խափանման միջոց կալանավորումը ընտրելու միջնորդությունը մերժելու մասին առաջին ատյանի դատարանի որոշումը՝ Վերաքննիչ դատարանից պահանջելով բեկանել այն և կալանավորել Ծառուկյանին։ Ծառուկյանի պաշտպաններն էլ մի քանի բողոք են ներկայացրել, այդ թվում հիմնավոր կասկածի հետ կապված։ Վերաքննիչ դատարանը հեռացել է խորհրդակցական սենյակ, որոշումը կհրապարակվի է հուլիսի 8-ին։
Գ. Ծառուկյանի պաշտպաններից Երեմ Սարգայանն ասաց, որ իրենք այսօրվա նիստում բավականին խորը վերլուծություններ են արել՝ կապված արդար դատաքննության իրավունքի խախտման հետ, քանի որ իրենց դիրքորոշումն այն է, որ օրենքի սահմանված կարգով դատավորները պետք է ընտրվեն պատահական ընտրությամբ, ոչ թե կոնկրետ դատարանի նախագահն իր ցանկությամբ մակագրության կատարի. «Այս կարգի խախտումն արդեն հանգեցնում է արդար դատաքննության իրավունքի խախտման»։
Նրա խոսքով, ներկայացրել են խնդիրներ քննչական ենթակայության կանոնների, հիմնավոր կասկածի, կալանավորման հիմքերի հետ կապված, ԱԺ ներկայացրած միջնորդության մեջ արարքի նկարագրության ու դրան տրված քրեաիրավական որակման և արդեն քննիչի կողմից առաջադրված մեղադրանքի տարբերության ու որակումների հետ կապված, որոնք մանրամասն քննության առարկա են դարձել։
«Հույս ունենք՝ դրանք կընդունվեն դատարանի կողմից, եթե չընդունվեն, կքննարկենք, ըստ նպատակահարմարության, Վճռաբեկ դատարան, նաև Եվրոպական դատարան բողոքներ ներկայացնելու անհրաժեշտությունը»,- ասաց ԵրեմՍարգսյանը։
Սամվել Դիլբանդյանը տեղեկացրեց, որ իրենց բողոքները վերաբերում էին նաև վարույթի իրավաչափությանը։
Նա նշեց, որ եթե քննչական ենթակայությունն է խախտվել, վարույթը բացառող, վարույթն անվավեր ճանաչելու հանգամանք կարող է հանդիսանալ, քանի որ ոչ պատշաճ սուբյեկտի կողմից է իրականացվել։
Հունիսի 16-ին ԱԺ «Իմ քայլը» խմբակցության 87 պատգամավորներ փակ գաղտնի քվեարկությամբ նախ զրկել էին Գ.Ծառուկյանին անձեռնմխելիությունից, ապա համաձայնություն տվել նրան ազատությունից զրկելու հարցին։ Ազգային ժողովում ՀՀ գլխավոր դատախազ Արթուր Դավթյանը հայտնել էր, որ քրեական գործով ձեռք բերված ապացույցների համակցությունը բավարար հիմք է տալիս ԱԺ պատգամավոր Գագիկ Ծառուկյանին մեղադրանք առաջադրելու ԱԺ 2017 թվականի ապրիլի 2-ի ընտրություններին մասնակցած «Ծառուկյան կուսակցությունների դաշինքի» և դրա կողմից առաջադրված թեկնածուի օգտին քվեարկելու համար կաշառք տալը կազմակերպելու համար։
Գ.Ծառուկյանը հարուցված քրեական գործը համարում է սարքած գործեր քաղաքական նպատակներով, քանի որ հետապնդումները սկսել են կուսակցության քաղխորհրդի նիստում իշխանություններին ուղղված քննադատություններից հետո։
Հարակից հրապարակումներ`
- Վերաքննիչ դատարանը Գագիկ Ծառուկյանի գործով որոշումը կհրապարակի վաղը
- Պաշտպան. Այն տվյալը, որը դրվել էր Ծառուկյանի մեղադրանքի հիմքում, այս պահին արդեն հերքված է
- Գագիկ Ծառուկյանի գործով վերաքննիչում դատական նիստը հետաձգվեց
- Ծառուկյանի պաշտպան. Մենք եկել ենք հենց այն նպատակով, որ դատական նիստը չհետաձգվի
- Ծառուկյանին չկալանավորելու որոշման դեմ բողոքը մակագրվել է Մխիթար Պապոյանին
- Գագիկ Ծառուկյանին կալանավորելու միջնորդությունը վերաքննիչ դատարանը կքննարկի վաղը
- Գագիկ Ծառուկյան.Փաստորեն բարի մարդկանց ևս կորոնավիրուսը չի շրջանցում
Լրահոս
Տեսանյութեր
Փաշինյան, «5-րդ շարասյուն», ներսի ցեցեր. Ըստ քաղաքացիների՝ ՀՀ-ի անվտանգության հիմնական սպառնալիքները