Հայաստանը կարտադրի սեփական ինքնաձիգները
Հայաստանում բացվել է «Կալաշնիկով» ինքնաձիգների հավաքման նորաբաց արտադրամաս։ Այս մասին ֆեյսբուքյան իր էջում գրել է ՀՀ վարչապետ Նիկոլ Փաշինյանը։
Արտադրամասում վարչապետին հայտնեցին, որ իրենք նախագծելու և արտադրելու են տեղական պահանջներին համապատասխան օպտիկա-էլեկտրոնային սարքեր։
«Հականալու համար, թե ինչպիսի օպտիկա-էլեկտրոնային սարքեր են անհրաժեշտ մեր բանակին, մեր ինժեներներն աշխատել են առաջնագծում, եղել են տարբեր զորամասերում, մասնակցել են մի շարք քննարկումների։ Մեր հիմնական տեսականում կան ջերմային նշանոցներ, որոնց անվանել ենք «Մոնթե»։
Ամբողջական փորձարկումներն ավարտելուց հետո կսկսենք արտադրությունը։ Դա կլինի մեկ տարուց, որպեսզի ամբողջությամբ բավարարեն մեր նախարարության պահանջները։ Ունենք նաև նախագիծ «Մոնթե 2» ջերմային նշանոց ստեղծելու, դրա նախագծման աշխատանքները ևս արդեն ավարտված են։ Փորձնական նմուշը պատրաստում ենք»,- նշեց ընկերության ներկայացուցիչ Լևոն Հարությունյանը։
Նշվեց նաև, որ արտադրամասում տարեկան արտադրվելու է 50 հազար միավոր ինքնաձիգ։ Նախատեսված է նաև նանո մանրաթելերի, ինչպես նաև նանո մանրաթելից տարբեր իրերի արտադրություն։
Վարչապետ Փաշինյանն էլ իր հերթին կարևորեց երկրում «Կալաշնիկով» ինքնաձիգի արտադրության հիմնումը և այն գնահատեց Հայաստանի և Ռուսաստանի միջև ռազմարդյունաբերության ոլորտում սերտ համագործակցության արդյունք:
Այցի ընթացքում կառավարության ղեկավարը ծանոթացավ նաև «Նեյտրոն ԳԱՄ» ՓԲԸ գործարանի առաջիկա ծրագրերին։ Այնտեղ վարչապետին հայտնեցին, որ գործարանի կողմից փամփուշտների արտադրությունը Երևան քաղաքից տեղափոխվում է Կոտայքի մարզում գտնվող արտադրական տարածք։
Տվյալ տարածքները վերանորոգելուց և արդիականացված հոսքագծերով համալրելուց հետո, կսկսվի 7,62x39 մմ, 7,62x54 մմ, 12,7 մմ, 9x18 մմ և 9x19 մմ տրամաչափերի փամփուշտների արտադրություն, որի արդյունքում նաև կավելանան նոր աշխատատեղեր։
Մանրամասները՝ տեսանյութում։