Սեյրան Օհանյանի ու Յուրի Խաչատուրովի փաստաբանները պնդեցին քրգործի վարույթը կասեցնելու մասին իրենց միջնորդությունները
Պաշտպանության նախկին նախարար Սեյրան Օհանյանի փաստաբան Կարեն Մեժլումյանն ընթացող դատական նիստում առարկեց դատավոր Աննա Դանիբեկյանի գործողություններին, միջնորդեց քննության չառնել մեղադրող կողմի ներկայացրած միջնորդությունը, քանի չի քննվել անցած տարվա օգոստոսի 22-ին իր ներկայացրած միջնորդությունը։
Հիշեցնենք, որ հունիսի 23-ի նիստում մեղադրող դատախազ Գևորգ Բաղդասարյանը միջնորդություն էր ներկայացրել, խնդրելով դատարանին սահմանափակել պաշտպանական կողմի՝ տարբեր տեսակի միջնորդություններ ներկայացնելու դատավարական իրավունքը։ Ըստ նրա՝ պաշտպանների նման գործողությունները թույլ չեն տալիս իրենց ընթերցել մեղադրական ճառի եզրափակիչ մասը։
Նախագահող դատավորն արձանագրել էր, որ դատախազի միջնորդության մեջ առկա են այնպիսի հարցեր, որոնք անհնար է քննարկել առանց բոլոր պաշտպանների ներկայության և հետաձգել է դատական նիստը։ Հունիսի 23-ի նիստին ներկա չէր ԶՈՒ ԳՇ նախկին պետ Յուրի Խաչատուրովի փաստաբան Միհրան Պողոսյանը։
Օհանյանի փաստաբան Կարեն Մեժլումյանը հիշեցրեց, ինքը միջնորդել էր գործի քննությունը կասեցնելու և ՍԴ դիմելու մասին։ Նկատեց, այդ միջնորդությունը մնացել է առանց քննության քանի որ խափանման միջոցի փոփոխման միջնորդություններ են ներկաացվել, որոնք քննվել են հրատապության կարգով։
«Այդ միջնորդությունների լուծումը ստանալուց հետո, բնական է, որ պետք է քննարկվեր իմ՝ օգոստոսի 22-ի ներկայացրած միջնորդությունը, որի քննության վերաբերյալ գրավոր դատական ակտ կա»,-ասաց Մեժլումյանը։
Նա կարծում է, որ դատավորը մեղադրողների հետ ցանկանում է այնպես անել, որ իր ներկայացրած միջնորդությունը քննության չառնվի։
Դատավոր Դանիեբկյանն ասաց՝ առարկությունն արձանագրված է։
Յուրի Խաչատուրովի փաստաբան Միհրան Պողոսյանն էլ առարկեց դատախազի միջնորդության քննության դեմ նույն պատճառով։
«Ես ուզում եմ հիշեցնել, որ անցած տարվա օգոստոսին դատական ակտով որոշվել է պաշտպանական կողմի ներկայացրած միջնորդության քննության մասին։ Ու հիմա կասկածից վեր է, ու ես համոզվածություն ունեմ, որ մեղադրանքի կողմը տեսնելով, որ միջնորդությունը հիմնավոր է, և ենթակա է բավարարման, միջնորդություն է ներկայացրել պաշտպանական կողմին միջնորդություններ ներկայացնելու իրավունքից զրկելու համար։ Դուք այլ ելք չունենալով՝ բավարար եք մեղադրողի միջնոդությունը և այժմ քննարկման առարկա եք փորձում դարձնել պաշտպանության իրավունքը սահմանափակելու վերաբերյալ մեղադրողի միջնորդությունը։ Ես կարծում եմ, որ ձեր գործողությունները նախատեսված չեն քրեական դատավարության օրենսգրքով, դրանք անօրինական են, թույլ չեն տալիս, որ պաշտպանության իրավունքն ամբողջությամբ իրացվի»,-ասաց Պողոսյանը։
Նա նկատեց, որ ստեղծված իրավիճակով պայմանավորված, ինքն էլ ունի միջնորդություն Քրգործի վարույթը կասեցնելու վերաբերյալ, խնդրեց թույլ տալ, որ իր միջնորդությունը քննարկման առարկա դառնա։
Դատախազության միջնորդության դեմ առարկություն ներկայացրեց նաև Ռոբերտ Քոչարյանի պաշտպան Հովհաննես Խուդոյանը՝ ընդգծելով, որ այն զրկում է ամբաստանյալներին պաշտպանության իրավունքից։
«Չնայած միջնորդությունը վերնագրված է եղել այլ կերպ, բայց հենց դրա մասին է»,-ասաց Հ. Խուդոյանը։
Հարակից հրապարակումներ`
- Խաչատուրովի փաստաբանի թեստի պատասխանը բացասական է
- Ռոբերտ Քոչարյանի գործով նիստը հետաձգվեց
- Ռոբերտ Քոչարյանն առաջարկեց ընդմիջել նիստն ու ախտահանել դատարանի դահլիճը
- Յուրի Խաչատուրովի փաստաբանը հայտարարեց՝ շփվել է կորոնավիրուսով հիվանդի հետ