Ասողիկ աբեղա Կարապետյան. Հայոց Եկեղեցին վեր է ամեն տեսակ քաղաքական վայրիվերումներից
Մայր Աթոռ Սուրբ Էջմիածնի թանգարանների և արխիվի տնօրեն Հայր Ասողիկ աբեղա Կարապետյանը գրում է.
«Սիրելի հայեր, եղբարք և քույրեր,
Հիշեցե՛ք և առհավետ մի՛ մոռացեք, որ հայ հոգևորականի համար թե՛ իշխանությունը, թե՛ ընդդիմությունը նույն Ազգի հարազատ զավակներն են:
Հայ հոգևորականության համար չկա՛ որևէ բաժանում կամ դասակարգում, խտրականություն:
Հայոց Եկեղեցին եղել է, կա և լինելու է անխառն, կենդանարար ու հրաշագործ սիրո միա՛կ թթխմորը հայ կյանքում:
Հայոց Եկեղեցին հաշտության, համերաշխության ու համազգային միասնության աստվածային զոհասեղանն է, որի առջև պետք է կանգնեն ու ծնրադրեն գժտված ու խռովյալ հայորդիք՝ պարզ քաղաքացուց մինչև ամենավերին պաշտոնյան, այդ Սբ Սեղանին մատուցելով իրենց արժանի ընծաները՝ հայրենասիրությունն ու եղբայրսիրությունը՝ հանուն Հայրենիքի, Ազգի և մեր Գալիքի:
Հայոց Եկեղեցին վեր է ամեն տեսակ քաղաքական վայրիվերումներից. միմիայն օտարի սրի դեպքում է, որ Հայոց Եկեղեցու ամենահաղթ Սբ Խաչը դառնում է ամենազոր Սուր:
Հայ կյանքի բոլոր խնդիրները պետք է լուծվեն սիրով, հասկացողությամբ, ներողամտությամբ, ամենայն պատասխանատվությամբ և համազգային ու պետական շահերի բարձրագույն գիտակցությամբ: Իշխանություններն ու ընդդիմադիր բոլոր ուժերը, վերջապես, պե՛տք է հասկանան ու դադարեն միմյանց հարվածելուց: Սիրելիներ, մի՛ վտանգեք Հայոց ներկան, մի՛ քանդեք ամեն շինվածք, մի՛ ստեղծեք խորխորատներ միմյանց համար, այլ արժանապատվորեն իրար ձեռք բռնեք և համատեղ աշխատանքով Հայաստան երկիրը է՛լ առավել զորեղացրեք:
Վե՛րջ տվեք ամեն տեսակի «արյունալի» պայքարին և անմիաբան, սիրտն ու հոգին խոցոտող, միտքը փոթորկող այս վիճակին:
Հայոց Եկեղեցին, իր աստվածային իմաստությամբ և պատմական փորձառությամբ, միշտ հաղթականորեն է ընթացել ՃՇՄԱՐՏՈՒԹՅԱՆ մայրուղիով. այսօր էլ, վաղն էլ և հավիտյան նույն կերպ է հառաջ գնալու:
Իշխանավորներ ու ընդդիմադիրներ,
Սիրեցեք միմյանց, պաշտեցեք Հայրենին, խնայեցեք Սբ Արարատին և ջանացեք լինել Ազգի օրհնյալներ և ոչ երբեք նզովյալներ՝ այս կյանքում և ի հավիտյան»։
Հարակից հրապարակումներ`
- Քահանան՝ Արայիկ Հարությունյանի հայտարարության մասին. Դատարկաբանություն է
- Հույս ունեմ՝ Ազգային անվտանգության ռազմավարությունը մշակողներն անտեղյակ են եղել. Տեր Եսայի
- Ակադեմիկոս. «Հայոց պատմությունն» ու «Հայ եկեղեցու պատմությունը» ազգային նկարագիր ձևավորելու առումով բացառիկ նշանակություն ունեն
- Արթուր Ղամբարյան. Ճանաչել Հայ Առաքելական եկեղեցուն որպես հանրային իրավունքի իրավաբանական անձ
- Գևորգ Դանիելյանը՝ «Հայ Եկեղեցու պատմությունը» դպրոցներում չդասավանդելու մասին
- Հայ եկեղեցականը ծնկել է միայն իր ժողովրդի համար
- Հայր Ասողիկ աբեղա. Չեմ կարծում, որ հայ եկեղեցում կգտնվի մեկը, ով կփորձի նման կերպ վարվել
- Միքայել Մինասյան. Հայ առաքելական եկեղեցին «ծնկի բերել» փորձողների ծնկներն են ջարդվելու
- Արա Զոհրաբյան. Եկեղեցականներին ծնկի բերելու վերաբերյալ վարչապետի մտքերը կասկածի տակ են դնում բարի նպատակները
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին