Կասեցման աշխատանքներ` առավելապես մարզերում
ՀՀ առողջապահական և աշխատանքի տեսչական մարմինն այսօր ուժեղացված ստուգայցերն անցկացրել է Արաբկիրում։ Երևանի այս վարչական շրջանում տասնյակ անակնկալ դիտարկումները չնչին խախտումներ են արձանագրել, որոնց մի մասը` տեղում վերացման ենթակա։ Այս մասին հայտնում են կառավարությունից։
Համաժամանակյա դիտարկումներ են անցկացվել, մասնավորապես, սուպերմարկետների խոշոր ցանցերի մասնաճյուղերում։ Ստուգայցերի մի մասի հիմքում եղել են քաղաքացիներից թեժ գծով ստացված ահազանգերը։ Այսուհանդերձ, տեսչական մարմնի մասնագիտական խմբերը փաստում են` խախտումները զգալիորեն նվազել են, որոշ տնտեսավարողների մոտ` անգամ բացառվել։
Զուգահեռ տարվել են նաև կասեցման աշխատանքներ` առավելապես մարզերում ու հիմնականում մանրածախ առևտրով զբաղվող անհատ ձեռներեցների մոտ։
ԱԱՏՄ ստուգայցերն անակնկալ են, ամեն օր և ողջ երկրում։ Տեսչական մարմինը հորդորում է տնտեսավարողներին` խստագույնս պահպանել կորոնավիրուսի տարածումը կանխելու նպատակով սահմանված անվտանգության նորմերը և հետամուտ լինում դրանց կատարմանը. քանի դեռ կորոնավիրուսը նահանջի հեռանկար չի ցուցաբերում, ԱԱՏՄ-ն շարունակելու է ուժեղացված հսկողությունը:
Այսօր ՀՀ շուկայի վերահսկողության տեսչական մարմինը մշտադիտարկում է իրականացրել Երևան քաղաքի Արաբկիր վարչական շրջանում: Շինանյութի առևտրի մի քանի կետերում դիտարկվել են խախտումներ: Մասնավորապես բացակայել են ջերմաչափերն ու ջերմաչափման գրանցամատյանները:
Դիտարկված խախտումների վերաբերյալ կազմվում են արձանագրություններ, որոնք ներկայացվում են պարետատուն: Տեսչական մարմինը ՀՀ ողջ տարածքում շարունակում է մշտադիտարկման աշխատանքները:
ՇՎՏՄ-ն պարետի՝ մայիսի 3-ի N 63 որոշման համաձայն մշտադիտարկումներ է իրականացնում առևտրի կենտրոններում, տոնավաճառներում, շինարարական խանութներում, հեղուկ վառելիքի, սեղմված բնական կամ հեղուկացված նավթային գազերի մանրածախ առևտրի կետերում՝ հակահամաճարակային նորմերի պահպանման առնչությամբ:
ՀՀ սննդամթերքի անվտանգության տեսչական մարմնի տեսուչներն այսօր հանրապետության մարզերում կասեցրել են սննդի շղթայում գործող մի շարք տնտեսավարողների գործունեությունը, որոնք խախտել են ՀՀ պարետի կողմից սահմանված սանիտարահիգիենիկ նորմերը: Երևանում կասեցումներ չեն եղել: Այս աշխատանքներին զուգահեռ իրականացվել են նաև ստուգայցեր, մշտադիտարկումներ ու կրկնայցեր մարզերում և, մասնավորապես, մայրաքաղաքի Արաբկիր վարչական շրջանում:
Արաբկիրի խանութներում, հանրային սննդի օբյեկտներում, սննդի արտադրություններում դիտարկումներն արձանագրել են ախտահանման աշխատանքների գրանցումների, 10-12-ը միայն թոշակառուներին սպասարկելու, մարդկային կուտակումների հետ կապված և մի շարք այլ խնդիրներ։
Հանրապետությունում իրականացվող ՍԱՏՄ ստուգայցերի ամփոփ պատկերը փաստում է, որ տնտեսավարողներն անվտանգության նորմերն այժմ առավել բարեխղճորեն են պահպանում։
Կորոնավիրուսով (Covid 19) պայմանավորված վերահսկողությունը ՍԱՏՄ-ն շարունակելու է:
Հարակից հրապարակումներ`
Լրահոս
Տեսանյութեր
Ի դեմս Ադրբեջանի՝ այսօր աշխատում է Թուրքիան, սա նոր երևույթ է, որը պետք է գիտակցենք. Դեմոյան
