Ձեր վստահելի աղբյուրը

Սուրբ Աթոռում ՀՀ նախկին դեսպան Միքայել Մինասյանը ֆեյսբուքյան տեսանյութ է հրապարակել՝ անդրադառնալով անցած շաբաթվա ընթացքում ստացած հարցին։

«Անցած շաբաթվա ընթացքում ստացված հարցերի շրջանակում խոսել եմ տավուշյան մարտերում մեր բանակի փայլուն հաղթանակի ու Հայաստանից հնչող խաղաղասիրական անհեթեթ կոչերի, արտերկրում հայերի դեմ աճող ագրեսիայի, բիզնեսի խնդիրների ու ադրբեջանական լոբբիստների հարձակումներին դեմ անպաշտպան մնացած մեր հայրենակիցների, ինչպես նաև դիմակների համար 80.000 քաղաքացիների վճարած ապօրինի տուգանքները վերադարձնելու պարտավորության մասին»,- գրել է Մ. Մինասյանը։

Օգտատերերց մեկը հարցրել է՝ տավուշյան պատերազմում հայկական բանակը ցույց տվեց, որ ավելի մարտունակ ու հզոր է դարձել, քան Ապրիլյան պատերազմի ժամանակ, «հիմա բանակը չեն թալանում, հզոր գեներալներ ունենք, որոնք ապացուցեցին հայկական բանակի տարածաշրջանում ամենամարտունակությունը։ Դուք վերջերս ասում էիք, որ 80-ականների զենք ենք գնել։ Տեսա՞ք արդյունքը»։

Միքայել Մինասյանն իր պատասխանում նախ ընդգծեց, որ  հայկական բանակը հաղթել է Ապրիլյան պատերազմի ժամանակ և տավուշային դիրքային մարտերի ժամանակ։ Նա նշեց, որ եթե կոչում են իրերն իրենց անունով, ապա խնդրում է՝ Ապրիլյանը կոչել պատերազմ, տավուշյանը՝ դիրքային մարտեր, քանի որ համեմատել Ապրիլյան պատերազմը տավուշյան դեպքերի հետ, նույնն է՝ ինչպես համեմատալ կիլոգրամը կիլոմետրի հետ։

«Հայկական բանակը, հայկական սպայական անձնակազմը՝ գեներալից մինչև ենթասպա, զինվորներն, անշուշտ, կատարել են իրենց դեմ դրված  առաջադրանքը միշտ գերազանց, կամ ահավոր գերազանց, կամ ամենագերազանց։ Այո, ապրիլին եղել է հաղթանակ, այո, նաև եղել է հաղթանակ դիրքային մարտերում՝ տավուշյան դեպքերի  ժամանակ։ Փառք Աստծո, որ Նիկոլ Փաշինյանը դրանցից տեղյակ չէր, ինչպես կարող ենք միանշանակ տեսնել կառավարության նիստի ժամանակ իր տված մանկամիտ, կորցված հայացքով հարցերից, որ նա նույնիսկ չի իմացել, թե ինչ է կատարվում։ Փառք Աստծո, որովհետև միանշանակ նա կաներ այն, ինչ միշտ անում է վերջին երկուսուկես տարիների ընթացքում, այն է՝ չկրակելու հրաման կտար, կասեր՝ դե լավ զիջեք, ինչ եղավ Նախիջևանում, քանի որ Երրորդ կորպուսը  Տավուշում արեց այն, ինչ պարտավոր էին անել Նախիջևանի ուղղությամբ»,- ասաց Մ. Մինասյանը։

Խոսելով գեներալների մասին՝ նա նշեց. «Ես չգիտեմ նոր գեներալ, որ այնտեղ հայտնվել է։ Երրորդ կորպուսի հրամանատար գեներալ Գրիգորի Խաչատուրովը  Նիկոլ Փաշինյանի հետ Գյումրիից  քայլելով չի եկել, ոչ էլ Նիկոլն ու Աննան հորանց տնից են բերել։ Նույն գեներալ Գրիգորի Խաչատուրովն է, որն այնտեղ էր որպես Երրորդ կորպուսի հրամանատար մինչև Նիկոլ Փաշինյանի  իշխանություն զավթելը։ Նույն Գրիգորի Խաչատուրովն է, ում հորը՝ գեներալ Խաչատուրովին, Նիկոլ Փաշինյանն այդ օրերին դատում էր։

Ոչինչ չի փոխվել։ Ավելին ասեմ, եթե չեմ սխալվում, կարող է սխալվում եմ, խնդրում եմ ինձ ուղղեք, Երրորդ կորպուսը չի օտագործել ոչ մի զենք, որը գնված է վերջին երեք տարվա ընթացքում։ Հետևաբար, զենքերներն էլ է նույնը, զինատեսակներն էլ, սպայական անձնակազմն էլ է նույնը, գենշտաբն էլ։ Գիտեք՝ ի՞նչն է փոխվել։ Ձեր ընկալումը, որ դուք հիմա ընկալում եք ճիշտ ձևով, որ սա հաղթանակ էր, որովհետև հիմա չկա ընդդիմություն, որը քարոզի հակառակը։ Ապրիլյան պատերազմի ժամանակ, երբ հայկական Զինված ուժերը, Հայաստանը, հայ ժողովուրդը, Արցախը հաղթել էր, Նիկոլ Փաշինյանն ու իր ոհմակը քարոզում էին հակառակը։ Դրա մասին կան կոնկրետ փաստեր։

Բանակը հիմա են թալանում, որի մասին կոնկրետ փաստերով խոսել եմ, որոնք կրկնում եմ՝ չեն հերքվել»։

Մ. Մինայսանի խոսքով, տավուշյան դեպքերի ժամանակ բանակը կատարում էր իր պարտքը, ընդդիմությունը կատարում էր իր պարտքը՝ չխանգարելով բանակին կռվել։

«Բոլորն իրենց տեղերում էին։ Ի դեպ, Նիկոլ Փաշինյանն էլ էր իր տեղում, որովհետև ինքն էլ կատարում էր իր պարտքը՝ իր կնոջ միջոցով ծառայում էր իր պատվիրատուներին, որովհետև ուրիշ կերպ Աննա Հակոբյանի՝ քարերի վրա կանգնած խաղաղասեր ելույթները, ես չեմ կարող բացատրել, քանի որ Աննա Հակոբյանը  շատ լավ հասկանում է, որ չի կարելի, պետական դավաճանություն է, երբ Հայաստանը դե ֆակտո պատերազմի մեջ է, ծաղիկները ձեռքին քարոզել խաղաղություն։

Քարոզել խաղաղություն, ո՞ւմ հետ։ Նրանք եկել են մեր երեխեքին սպանել, գյուղերը ռմբակոծել։ Դուք խոսում եք մեզ հետ Ադրբեջանի մայրերի մասին, որ ի՞նչ անեք։ Մեզ անհետաքրքիր են Ադրբեջանի մայրերը։ Ավելին՝ մեզ անհետաքրքիր են Ադրբեջանի զինվորները։ Մեզ հետաքրքիր են մեր եղբայրները։ Նրանք թշնամի են, հասկացեք»,- ասաց Սուրբ Աթոռում ՀՀ նախկին դեսպանը։

Անդրադառնալով արտերկրում հայերի դեմ աճող ագրեսիային, բիզնեսի խնդիրներին, նա նախ ասաց, երբեք չի եղել և չէ «Սպայկա» ընկերության համասեփականատերը և գործընկերը,  ապա հավելեց, որ եթե այն ժամանակվա «Սպայկա»-ն լիներ, ծիրանների խնդիրը չէր լինի, իր իմանալով՝ «Սպայկան» կարողանում էր մատակարարել հայկական գյուղմթերքն ուղիղ ցանցերին։

«Հայկական ապրանքները դարձան ադրբեջանական շուկաների զոհ, երբ «Սպայկան» բառի լայն իմաստով վերացավ, որովհետև Փաշինյանը պատերազմ է հայտարարել հայկական բիզնեսին»,- ասաց Մ. Մինասյանը։

Նա վստահեցրեց, որ շուտով գալու է ՌԴ-ում հայերի բիզնեսի նկատմամբ ոտնձգությունները։

«Հայաստանը գարանտ է հայ ժողովրդի անվտանգության՝ լինեն հայերը ՌԴ-ում, Պարագվայում, թե ԱՄՆ-ում։ Ինչքան Հայաստանը իրանցով չզբաղվի, այնքան լինելու է պրոբլեմ»,- նշեց Մ. Մինասյանը։

Նրա խոսքով, առաջին դեպքը չէ, որ ՀՀ-ում և Ղարաբաղում կա ռազմական սրացում, բայց առաջին դեպքն է, որ ՌԴ-ում  կա այսպիսի խայտառակ դրություն, որովհետև Հայաստանում  ոչ ոք չի զբաղվում այդ հարցով՝ չի ուզում, չի կարող, պետք չի կամ չգիտի։

Մ. Մինասյանը խնդրեց արագ ինքնակազմակերպվել։

Ինչ վերաբերում է դիմակներ չկրելուն ու տուգանվելուն, նա  ասաց, որ երբ գործում է  արտակարգ դրություն, գործում է նաև արտակարգ իրավիճակ, համապատասխան օրենքի համաձայն՝ երբ գործում է  արտակարգ իրավիճակ, ՀՀ իշխանությունները պարտավոր են անվճար տրամադրել պարագաներ բնակչության անվտանգության համար։

«Հայաստանի օրենքներով՝ ինչքան կա արտակարգ ռեժիմ, հատուկ դրություն, Հայաստանը եթե ասում է, որ պետք է կրեք դիմակ, ըստ օրենքի, պարտավոր է այդ դիմակն անվճար տրամադրել։ Դրանից ելնելով, եթե իրենք տուգանում են դիմակ չկրելու համար, տուգանում են մի բանի համար, որ իրենք պետք է անեին»,- ասաց Միքայել Մինասյանը՝ միաժամանակ խնդրելով իր իրավաբաներին հերքել կամ հաստատել այն, ինչ ասաց։ 

Մանրամաները՝ տեսանյութում։