Ձեր վստահելի աղբյուրը

Նախօրեին Բեյրութում տեղի ունեցած հզոր պայթյունից հետո աշխարհի բազում երկրների առաջնորդներ իրենց աջակցությունն են հայտնել Լիբանանին՝ առաջարկելով օգնություն։ Ըստ նախնական վարկածի պայթյունի պատճառ է դարձել նավահանգստին մոտ պահեստավորված մի քանի տոննա ամոնիումի նիտրատը։ Զոհերի թիվն անցել է 100-ից, վիրավորներինը՝ 4000-ից ավելի է։

Մեծ Բրիտանիայի վարչապետ Բորիս Ջոնսոնը հայտնել է, որ Մեծ Բրիտանիան պատրաստ է տրամադրել ցանկացած աջակցություն, որ կարող էր օգնել Բեյրութին:

«Բեյրութից նկարներն ու տեսանյութերը ցնցող են։ Իմ մտքերն ու աղոթքները այս սարսափելի միջադեպի մեջ հայտնվածների հետ են», - գրել է Ջոնսոնը։

Իրանը պատրաստ է օգնել Լիբանանին, թվիթերում գրել է Իրանի ԱԳ նախարար Ջավադ Զարիֆը։

«Մեր մտքերն ու աղոթքները Լիբանանի մեծ ու դիմացկուն ժողովրդի հետ են: Ինչպես միշտ, Իրանը պատրաստ է ցանկացած անհրաժեշտության դեպքում օգնություն ցուցաբերել: Մնա ուժեղ, Լիբանան», - գրել է Զարիֆը:

Իսրայելը մարդասիրական օգնություն է առաջարկում

Իսրայելն ասում է, որ Լիբանանին մարդասիրական օգնություն է առաջարկել օտարերկրյա ուղիներով, քանի որ երկու երկրները դիվանագիտական հարաբերություններ չունեն:

«Պաշտպանության նախարար Բենի Գանցի և արտաքին գործերի նախարար Գաբի Աշկենազիի գլխավորությամբ Իսրայելը միջազգային պաշտպանական և դիվանագիտական ուղիներով Լիբանանի կառավարությանը մարդասիրական օգնություն է առաջարկել», - ասված է համատեղ հայտարարության մեջ:

Թրամփն ասում է, որ պայթյունը «սարսափելի հարձակման է նման»

ԱՄՆ նախագահ Դոնալդ Թրամփը հայտարարել է, որ Բեյրութը ցնցած հսկայական պայթյունը նման է «սարսափելի գրոհի»:

«Մենք շատ լավ հարաբերություններ ունենք Լիբանանի ժողովրդի հետ, և մենք այնտեղ կլինենք օգնելու համար: Դա կարծես սարսափելի գրոհ լինի», - ասել է Թրամփը Սպիտակ տան լրագրողներին:

«Ես հանդիպել եմ մեր մի քանի հիանալի գեներալների հետ, և նրանք, կարծես, զգում են, որ սա ոչ թե ինչ-որ մի արտադրական պայթյուն է, այլ հարձակում: Դա ինչ-որ տեսակի ռումբ էր»,-ասել է Թրամփը, սակայն ասվածի համար ոչ մի ապացույց չի ներկայացրել։

Սաուդյան Արաբիան մեծ անհանգստությամբ է հետևել Բեյրութի պայթյունին։ Պետական լրատվական գործակալության փոխանցմամբ՝ Սաուդյան Արաբիայի արտաքին գործերի նախարարությունը հայտարարել է, որ մեծ մտահոգությամբ հետևում է Բեյրութի նավահանգստի պայթյունի հետևանքներին:

Հայտարարության մեջ ասվում է, որ թագավորությունն իր լիակատար աջակցությունն ու համերաշխությունն է հայտնում լիբանանյան ժողովրդին:

Ֆրանսիան Լիբանան օգնություն ուղարկելու գործընթացում է

Ֆրանսիան Լիբանան օգնություն ուղարկելու գործընթացում է, ասել է նախագահ Էմանուել Մակրոնը:

«Ֆրանսիան կողք-կողքի կանգնած է Լիբանանի հետ: Միշտ։ Ֆրանսիայի օգնությունն ու ռեսուրսները ներկայումս ճանապարհին են», - գրել է Մակրոնը:

Մակրոնի գրասենյակից հայտնել են, որ նա նաև զանգահարել է Լիբանանի նախագահ Միշել Աունին՝ արտահայտելու Ֆրանսիայի աջակցությունը լիբանանյան ժողովրդին:

Թուրքիայի նախագահ Էրդողանը օգնություն է առաջարկում

Էրդողանը զրուցել է իր լիբանանյան գործընկեր Միշել Աունի հետ և ասել, որ Թուրքիան պատրաստ է անհրաժեշտության դեպքում մարդասիրական օգնություն ցուցաբերել:

Կատարը դաշտային հիվանդանոցներ կուղարկի բժշկական արձագանքմանն աջակցելու համար։ 

Նշենք, որ ՀՀ վարչապետ Նիկոլ Փաշինյանը ևս իր աջակցությունն է հայտնել Լիբանանին, հեռախոսազրույց ունեցել Մեծի տանն Կիլիկիո կաթողիկոս Արամ Ա-ի հետ։ Իմ զորակցությունը հայտնեցի Արամ վեհափառին, հայ համայնքին, Լիբանանի եղբայրական պետությանը եւ ժողովրդին: