Շանս ունենք աշնանը հաղթահարած վիճակում լինելու՝ անկախ նրանից, թե աշխարհում ինչ վիճակ կլինի. Փաշինյան
Մեկնարկել է Կառավարության արտահերթ նիստը. օրակարգում ՀՀ-ում հայտարարված արտակարգ դրության ռեժիմի երկարաձգման հարցն է։
Նիստի մեկնարկին ՀՀ վարչապետ Նիկոլ Փաշինյանը խնդրեց, որ ՀՀ առողջապահության նախարար Արսեն Թորոսյանը ներկայացնի նախորդ օրվա զարգացումները։
Առողջապահության նախարար Արսեն Թորոսյանն էլ հայտնեց, որ երեկվա դրությամբ հաստատված նոր 201 դեպք կա, կատարվել է 1710 հետազոտություն։ Նրա խոսքով, յուրաքանչյուր հաջորդ շաբաթվա ընթացքում օրական արձանագրված դեպքերի թիվը մոտավորապես 50-100-ով ցածր է, քան նախորդ շաբաթ այդ օրը արձանագրված դեպքերը։
«Մենք ունենք ռեալ հնարավորություն՝ թվերը նվազեցնելու։ Նաև մենք ունենք թեթև վիճակ կորոնավիրուսով հիվանդներին սպասարկող հիվանդանոցներում։ Ինչպես նաև ունենք ծանր և ծայրահեղ ծանր վիճակում գտնվող պացիենտների թվի նվազում։ Այդ թիվը դեռ տատանվում է 300-ի շրջանակներում, բայց այս միտումը նույնպես պահպանվում է, իհարկե, ոչ 50-100-ի շրջանակում։ Սրա բացատրությունն էլ այն է, որ ծանր վիճակում գտնվող հիվանդները բավականին երկար են պառկում ռեանիմացիաներում։ Մինչև 60 օր պառկող պացիենտներ ենք ունենում»,- ներկայացրեց նախարարը։
Այնուամենայնիվ, Արսեն Թորոսյանի խոսքով, պետք չէ 0 թվին մոտենալու նպատակ ունենալ. «Դեպքերը 50-100 թվերի շրջանակում պահելը պետք է ընդունելի լինի, այն իմաստով, որ շատ դժվար է լինելու 0-ին հասնելը»։
Նիկոլ Փաշինյանն էլ նշեց, որ պետք է հետագծել Կառավարության գործողությունները՝ կապված նոր տեսակի կորոնավիրուսի հետ։
Նրա խոսքով, երկամսյա խիստ սահմանափակումների ընթացքում արձանագրվեց, որ սոցիալական և տնտեսական խնդիրները շատ արագ տեմպով խորանում են։
«Ապրիլին մենք 50 հազար աշխատատեղի կրճատում ունեցանք, մյուս կողմից, մենք տեսնում էինք, որ այնուամենայնիվ, հակահամաճարակային որոշ կանոններ հնարավոր էր լինում պահել, միևնույն է, ամբողջ հանրապետության տարածքում կանոնները ոչ մի կերպ չէին պահվում։ Մենք տեսնում էինք, որ նոր դեպքերը կուտակված են բնակավայրի կոնկրետ հատվածներում։ Այսինքն՝ հասկացանք, որ առաջնաբեմում կանոնները պահելով՝ ետնաբեմում իրավիճակը չի կարգավորվում։ Մյուս կողմից, մենք եկանք այն արձանագրման, որ անհնար է առանց քաղաքացիների շահագրգռվածության և նրանց կողմից պատասխանատվության կիսման խնդիրը լուծել»,- նշեց վարչապետը։
Նիկոլ Փաշինյանը շեշտեց՝ ապրիլ-մայիս ամիսներին իրավապահ մարմինները անհրաժեշտ կոշտություն չէին ցուցաբերում՝ իրավիճակը վերահսկելու համար.
«Մենք եկանք եզրակացության, որ Կառավարությունն, այո, պատասխանատվության իր հատվածը պետք է կրի, բայց հնարավոր չէ հակահամաճարակային իրավիճակը պահել՝ առանց քաղաքացիների մասնակցության։ Մենք հստակ խնդիր դրեցինք, որ քաղաքացիներին պետք է ուղիղ ներկայացնենք իրավիճակը։ Իսկ կառավարությունն էլ որոշեց՝ որևէ քաղաքացի չպետք է մնա առանց պատշաճ բուժօգնության»։
Վարչապետն ընդգծեց՝ իրավիճակը կարգավորելու շանս կա։ Նա շեշտեց, որ հիվանդության դեպքերի թվի նվազմանը զուգահեռ աճում է դիմակ չկրող և տուգանվող քաղաքացիների թիվը։
«Եթե հիմա ճիշտ չկառավարենք իրավիճակը, հետ կգլորվենք հուլիսի վիճակին։ Իսկ այժմ ունենք շանս՝ հիվանդությունն արմատապես հաղթահարելու։ Մենք շանս ունենք աշնանը հաղթահարած վիճակում լինելու՝ անկախ նրանից, թե աշխարհում ինչ վիճակ կլինի։ Դիմակի կրման բացառիկ կարգապահություն է պետք: Առաջ ասում էինք՝ կրի'ր դիմակ, փրկի'ր կյանքեր, հիմա կասենք՝ կրի'ր դիմակ, մի' տուգանվիր»,- ասաց Նիկոլ Փաշինյանը։
Հարակից հրապարակումներ`
Լրահոս
Տեսանյութեր
Ի դեմս Ադրբեջանի՝ այսօր աշխատում է Թուրքիան, սա նոր երևույթ է, որը պետք է գիտակցենք. Դեմոյան
