Դատախազը պահանջեց Արմեն Բիլյանի համար 21 տարի, իսկ Սմբատ Բարսեղյանի համար՝ ցմահ ազատազրկում
Երևանի ընդհանուր իրավասության դատարանի՝ Շենգավիթի նստավայրում դատավոր Մեսրոպ Մակյանի նախագահությամբ ՊՊԾ գնդի գրավման գործով այսօր տեղի ունեցած նիստում մեղադրող դատախազները ներկայացրեցին մեղադրական ճառը։
«Պատիժ նշանակելիս պետք է հաշվի առնել վերագրվող արարքների հանրային վտանգավորությունը, բնույթը, հանցագործության կատարման եղանակը, հանցավոր մտադրության իրականացման աստիճանը, որոնք էական նշանակություն ունեն ամբաստանյալների անձի մասին ճիշտ պատկերացում կազմելու համար»,-մասնավորապես նշեց դատախազ Պետրոս Պետրոսյանը՝ շեշտելով հանցակիցների միջև տևական ժամանակ ամուր կապի առկայությունը, գաղտնապահության կանոնների խիստ պահպանումը, որի արդյունքում ոտնձգություն է կատարվել քրեաիրավական պաշտպանության տակ գտնվող կարևորագույն հասարակական հարաբերությունների դեմ, ինչի հետևանքով կյանքից զրկվել են բացարձակ անմեղ, հայրենիքի նկատամամբ իրենց պարտքը կատարող երեք ոստիկաններ։
Պետրոսյանը նկատեց, առկա են նաև ծանրացուցիչ հանգամանքներ, ուստի մեղադրանքի կողմը միջնորդեց՝
Ամբաստանյալ Արայիկ Խանդոյանի նկատմամբ ՀՀ Քր. Օր-ի 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով և 238-րդ հոդվածի 4-րդ մասի 1-ին ու 2-րդ կետերով իրականացվող քրեական հետապնդումը դադարեցնել Քրեական դատավարության օրենսգրքի 35-րդ հոդվածի 1-ին մասի 10-րդ կետով նախատեսված անձի մահվան հիմքով։
Ամբաստանյալ Էդվարդ Գրիգորյանին մեղավոր ճանաչել ՀՀ Քր. Օր-ի 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 185-րդ հոդվածի 3-րդ մասի 1-ին կետով, նրա նկատմամբ ՀՀ ՔՕ 218-րդ հոդվածի 3-րդ մասի 1-ին կետով որպես պատիժ նշանակել ազատազրկում 8 տարի ժամկետով։ 235-րդ հոդվածի 3-րդ մասով՝ ազատազրկում 3 տարի ժամկետով։ 185-րդ հոդվածի 3-րդ մասի 1-ին կետով՝ ազատազրկում 2 տարի ժամկետով։ ՀՀ ՔՕ 66-րդ հոդվածի կիրառմամբ նշանակված պատիժները մասնակիորեն գումարելով ամբաստանյալ՝ Էդվարդ Գրիգորյանի նկատմամբ վերջնական պատիժ նշանակել ազատազրկում՝ 8 տարի 6 ամիս ժամկետով։ Դրան հաշվեկցելով 2016-ից 2018-ը կրած պատիժը՝ 1 տարի 11 ամիս 3 օր կալանքը։
Ամբաստանյալ Արեգ Կյուրեղյանին մեղավոր ճանաչել Քր. Օր.-ի 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով և 238-րդ հոդվածի 4-րդ մասի 1-ին ու 2-րդ կետերով։ Նրա նկատմամբ ՀՀ ՔՕ 218-րդ հոդվածի 3-րդ մասի 1-ին կետով որպես պատիժ նշանակել ազատազրկում 8 տարի ժամկետով, 238-րդ հոդվածի 4-րդ մասի 1-ին ու 2-րդ կետերով ազատազրկում՝ 8 տարի ժամկետով և 235-րդ հոդվածի 3-րդ մասով՝ ազատազրկում 3 տարի ժամկետով։ ՀՀ Քր. Օր-ի 66-րդ հոդվածի կիրառմամբ նշանակված պատիժները մասնակիորեն գումարելով ամբաստանյալ Արեգ Կյուրեղյանի նկատմամբ վերջնական ազատազրկում նշանակել 8 տարի 6 ամիս ժամկետով։
Դատախազն առաջարկեց ամբաստանյալ Սեդրակ Նազարյանի ու Վարուժան Ավետիսյանի նկատմամբ ՝ 8 տարի 9 ամիս, Պավլիկ Մանուկյանի համար՝ 9 տարի ազատազրկում նշանակել, Արմեն Բիլյանի նկատմամբ՝ վերջնական պատիժ նշանակել 21 տարի ժամկետով։
Սմբատ Բարսեղյանի նկատմամբ վերջնական պատիժ նշանակել ցմահ ազատազրկում։
Հարակից հրապարակումներ`
- Ընթանում է «Սասնա ծռերի» գործով դատական նիստը
- «Սասնա ծռերի» աջակիցները պահանջում են ազատել Արմեն Բիլյանին և Սմբատ Բարսեղյանին
- Արմեն Բիլյանը՝ ՊՊԾ գնդի գրավման գործով մյուս մեղադրյալին. «Դու կեղծ ցուցմունք ես տվել»
- Դատարանը մերժեց «Սասնա ծռերի» գործով պաշտպանի՝ ՍԴ դիմելու միջնորդությունը
- Սմբատ Բարսեղյան. Հորդորում էի չկրակել
- «Սասնա ծռերից» Էդուարդ Գրիգորյանը հակադարձում է Պավել Մանուկյանին