Ձեր վստահելի աղբյուրը

Ռուսական և սիրիական զինված ուժերը լայնամասշտաբ գործողություն են իրականացրել Սիրիայի կենտրոնում, այսպես կոչված, «Սպիտակ անապատում» գտնվող զինված խմբավորումները ոչնչացնելու համար:   «Ինտերֆաքս»-ը գրում է, որ երեքշաբթի այդ մասին հայտնել է Սիրիայում ռուսական ռազմական խմբի ներկայացուցիչը:

«Օգոստոսի 18-ից 24-ն ընկած ժամանակահատվածում, Ռուսաստանի ռազմական խորհրդականների անմիջական մասնակցությամբ, Սիրիայի Արաբական Հանրապետության կառավարական ուժերը նախապատրաստել և իրականացրել են լայնածավալ գործողություններ՝ անօրինական կազմավորումները ջախջախելու համար: ՌԴ օդատիեզերական ուժերի և Սիրիայի օդուժի օդային հարվածներով, հրետանային կրակով և «Սպիտակ անապատում» հատուկ հետախուզական և որոնողական խմբերի գործողությունների արդյունքում ոչնչացվել է 327 գրոհային, 134 ապաստարան, 17 դիտակետ, յոթ նյութատեխնիկական և հինգ ստորգետնյա զենքի և զինամթերքի պահեստ»,- ասել է խմբի խոսնակը:

Նա նշել է, որ անօրինական զինված խմբավորումների մնացորդներից «Սպիտակ անապատը» մաքրելու գործողությունը կշարունակվի մինչև այդտեղ գործող ԱՄՆ-ի կողմից վերահսկվող զինված խմբավորումների ամբողջական ոչնչացումը:

«Անցած ամսվա ընթացքում, այսպես կոչվող «Սպիտակ անապատում»՝ Սիրիայի Արաբական Հանրապետության կենտրոնական մասում, նկատվում է Իսլամական պետության նախկին զինյալների գործունեության զգալի աճ»,- ասել է ռուսական խմբի ներկայացուցիչը:

Նա նշել է, որ գրոհայինների մեծ մասն այդ տարածքում հայտնվել է ԱՄՆ-ի կողմից վերահսկվող այսպես կոչված «Սիրիայի հյուսիսարևելյան ինքնավար վարչակազմում» անցկացված համաներումից հետո:
«Սպիտակ անապատում ցրված Իսլամական պետության բանդաները համալրվում են գրոհայիններով, ովքեր հատուկ պատրաստություն են անցել Սիրիայի հարավում և հարավ-րևելքում՝ ԱՄՆ-ի կողմից գրավված Էթ-Թանֆ գոտում և Սիրիայի տրանս-եփրատյան տարածքներում»,- ասել է գործակալության աղբյուրը:

«Սիրիայի նավթի և գազի օբյեկտներում դիվերսիաներ կատարելով, տրանսպորտային հաղորդակցությունները խաթարելով, սիրիական բանակի պարեկային ծառայության և զինվորների վրա հարձակվելով, զինյալները ապակայունացնում են տարածաշրջանի իրավիճակը: Օրինակ՝ օգոստոսի 18-ին, Դեյր էր-Զորի նահանգում ահաբեկիչների կողմից տեղադրված ինքնաշեն պայթուցիկ սարքի միջոցով սպանվել էր ռուս ավագ ռազմական խորհրդատու գեներալ-մայոր Վյաչեսլավ Գլադկիխը», - ասել է նա: