Ե՞րբ է «ԲՀԿ»-ն պահանջելու Նիկոլ Փաշինյանի հրաժարականը
«Ես «Բարգավաճ Հայաստան» կուսակցության հիմնադիր եմ և ոչ մի դեպքում դուրս չեմ գալու կուսակցությունից»,- այսօր ԱԺ-ում լրագրողների հետ զրույցում ասաց ԱԺ «Բարգավաճ Հայաստան» խմբակցության պատգամավոր Միքայել Մելքումյանը՝ պատասխանելով հարցին, թե արդյո՞ք հնարավոր է, որ նա լքի կուսակցությունը։
Պատգամավորը նշեց, որ ինքը ոչ միայն քաղաքականություն վարող, այլ նաև՝ մշակող գործիչ է, և չի հասկանում, թե ինչու պետք է դուրս գա։
Դիտարկմանը, որ մինչ «Բարգավաճ Հայաստանը» պատրաստվում է հանրահավաք անել, իշխանական խմբակցության ղեկավարը մեղադրում է կուսակցությանն այլ ուժերի ազդեցության տակ լինելու մեջ, Միքայել Մելքումյանն արձագանքեց, որ չի պատրաստվում մեկնաբանել որևէ մեկի հայտարարությունը։
«Իրենց կարծիքն է, մենք էլ ենք տարբեր բաներ ասում։ Բացի այդ, առաջին անգամ չէ, որ «Բարգավաճ Հայաստանը» հանրահավաք է անում, միշտ էլ արել է։ Ինքնուրույն օրակարգ ենք մշակում, ինքնուրույն ուժ ենք, տարբեր ուժեր կգան-կգնան, «Բարգավաճ Հայաստանը» միշտ մնալու է։ Այնուամենայնիվ, ինձ համար անընդունելի է, որ ասում են, թե ուղղորդվում ենք ինչ-որ մեկի կողմից»,- ասաց պատգամավորը։
Հարցին, արդյո՞ք 2015-ին Լևոն Տեր-Պետրոսյանն է Ծառուկյանին համոզել պահանջել իշխանությունների հրաժարականը, Մելքումյանը պատասխանեց․ «Համոզելը քաղաքական կատեգորիա չէ: Եթե ուզում եք հետ գնալ 2015, ապա այն ժամանակ իրավիճակն այլ էր: Եթե հիշում եք, պայքարն ավելի վաղ սկսվեց, բերեց հանգեցրեց Տիգրան Սարգսյանի հրաժարականին ու շարունակություն եղավ»:
Հարցին, թե «ՀՅԴ» և «Հայրենիք» կուսակցությունների հետ համատեղ «ԲՀԿ»-ն այժմ համագործակցում է, և կարծես թե, ամեն ինչ գնում է դեպի իշխանափոխություն, ի՞նչն է քաղաքական ուժերին հավատ ներշնչում, որ հնարավոր է իշխանափոխություն անել, Միքայել Մելքումյանը պատասխանեց՝ որևէ բան ինքնանպատակ չի արվում, և եթե ԲՀԿ-ն քննադատում է իշխանության վարած քաղաքականությունը, նշանակում է, որ շատերն են տեսնում թերացումները։
«Մենք ասում ենք, թե որոնք են իշխանության սխալները, և այն ուժերը, որոնք մեզ հետ համակարծիք են, սկսում են մեզ հետ քննարկումներ անցկացնել՝ ընդհանուր օրակարգ ունենալու համար։ Բայց այդ համագործակցությունն ինչ շանսեր կունենա, կյանքը կթելադրի ու ցույց կտա։ Աշխարհը արագ փոփոխվում է, և մենք չպետք է լռենք։ Մենք պետք է մատնանշենք խնդիրները։ Հո չենք լռելու, ծափ տանք, ասենք էս ինչ է կատարվում, էս ինչ լավ է։ Չափ կա վատ լինելու, շեղվելու, եթե ողջամիտ աստիճանից շատ է շեղումը, արդեն բարձրաձայնում ենք»,- պատասխանեց պատգամավորը։
Դիտարկմանը, որ իմքայլական պատգամավոր Հրաչյա Հակոբյանը կարծիք է հայտնել, թե քաղաքական երեք ուժերի օրակարգը ձախողման է դատապարտված, քանի որ այն նեղ կլանային օրակարգ է, Միքայել Մելքումյանն արձագանքեց՝ կարող են հնչել տարբեր կարծիքներ, բայց դա չի նշանակում, որ ամեն արտահայտված կարծիք ճիշտ է։
«Քաղաքական պայքարը ասֆալտի վրա հանգիստ, սպիտակ ձեռնոցներով քայլելը չի։ Կան դժվարություններ, կան խնդիրներ։ Եվ պարզ է, որ իշխանությունը փորձում է պահել իշխանությունը։ Կարող են նաև սրումներ լինել, բայց կարևորը ժողովրդի վիճակը լավացնելն է։ Կարևորը, պայքարից ելնելով, մարդկանց կյանքի որակի լավանալն է»,- նշեց պատգամավորը։
Հարցին, թե ե՞րբ է «ԲՀԿ»-ն պահանջելու Նիկոլ Փաշինյանի հրաժարականը, Միքայել Մելքումյանը պատասխանեց՝ հունիսի հինգին հնչեցված բոլոր հայտարարություններն ուժի մեջ են. «Կա օրակարգ, որի մասին կիմանաք։ Պահը կգա, ամեն ինչ կտեսնեք»։
Հարակից հրապարակումներ`
- Եթե Ծառուկյանին ձերբակալելով ժողովրդի աշխատավարձը բարձրանա, Ղարաբաղի հարցը լուծվի, թող էլի ձերբակալեն. ԲՀԿ ղեկավար
- Իվետա Տոնոյան. Գագիկ Ծառուկյանի անհանգստությունն ավելի գլոբալ է, քան առանձին չափորոշիչները
- Գագիկ Ծառուկյան. Սիրտս տրաքում է, սարքոցի է, անբարոյականություն