Առաջարկվում է առողջապահական կազմակերպությունների մասնավորեցման ժամանակ դրանց պրոֆիլը չպահպանել
«Առաջարկում ենք, որպեսզի առողջապահական պրոֆիլի հիմնարկների մասնավորեցման ժամանակ Կառավարությանը հնարավորություն տրվի որոշելու՝ այդ պրոֆիլը պահպանվում է, թե՞՝ ոչ »,- այսօր ԱԺ տնտեսական հարցերի մշտական հանձնաժողովի նիստում ասաց պետական գույքի կառավարման կոմիտեի նախագահի տեղակալ Վարդան Կոստանյանը ՝ ներկայացնելով «Պետական գույքի մասնավորեցման մասին 2017-2020 թթ. օրենքում» լրացումներ կատարելու մասին օրենքի նախագիծը։
Նշենք, որ ներկայում գործող օրենքով, առողջապահական հիմնարկների մասնավորեցման դեպքում դրանց պրոֆիլը պարտադիր պահպանվում է, սակայն այժմ անհրաժեշտություն կա ճկունություն ապահովելու։
Թեև ըստ խորհրդարանականների, այս նախագծով խորհրդարանի դերը նվազում է, և այն որոշումը, որը պետք է ընդունի օրենսդիրը, գործադիրը վերցնում է նրանից, այնուամենայնիվ, Կառավարությունն առաջարկում է, անհրաժեշտությունից ելնելով, ընդունել այն։
Վարդան Կոստանյանը նշեց, որ 2017-ից հետո թվով 11 բժշկական կազմակերպություններ մտել են մասնավորեցման ցանկի մեջ։ Եվ այժմ մասնավորեցման ծրագրի վերջին փուլն է, ու թվով հինգ առողջապահական կազմակերպություններ դեռևս չեն մասնավորեցվել։
«Բայց այս կազմակերպությունների հետ կապված բազմաթիվ խնդիրներ են առաջ եկել, և դա ստիպել է, որպեսզի Կառավարությունը նման հարցով դիմի խորհրդարանին։ Մենք առողջապահության նախարարությունում ոլորտի մասնագետների հետ քննարկումներ ենք ունեցել, և եկել ենք այն եզրակացությանը, որ այդ թվով հինգ կազմակերպություններից չորսի պրոֆիլի պահպանության խնդիրը չկա։ Միայն «Ռադիոիզոտոպերի արտադրության կենտրոնի» պրոֆիլի պահպանության հարցն է այժմ առկա»,- ներկայացրեց պետական գույքի կառավարման կոմիտեի նախագահի տեղակալը։
ԱԺ «Իմ քայլը» խմբակցության պատգամավոր Գևորգ Պապոյանը հետաքրքրվեց, թե ի՞նչ կլինի, եթե խնդրին մասնակի լուծում տրվի, և կոնկրետ դեպքերի հետ կապված հնարավորություն տրվի Կառավարությանը՝ որոշելու մասնավորեցված կազմակերպությունների պրոֆիլը։
Պատասխանելով պատգամավորի հարցին՝ Վարդան Կոստանյանն ասաց, որ խնդիր չկա, թվով հինգ ընկերություններ են, և դրանից յուրաքանչյուրի հարցով կարելի է քննարկում կազմակերպել, թեկուզ հենց այսօր.
«Դա ավելի ճկուն գործելու հնարավորություն կտա, որ մենք հիմա որոշենք՝ որի պրոֆիլն է անհրաժեշտ պահպանել, որինը՝ ոչ»։
ԱԺ «Բարգավաճ Հայաստան» խմբակցության պատգամավոր Միքայել Մելքումյանն էլ հիշեցրեց, որ դեռ 2004 թվականից մարզային բժշկական կազմակերպությունները պետական կարգավիճակ պետք է ունենային՝ ելնելով նրանից, որ ամեն մի տարածաշրջանում մեկ ընդհանուր պրոֆիլի ԲԿ պետք է պահպանվի. «Կա՞ն տարածաշրջանային հիվանդանոցներ, որոնք կարող են արագ մասնավորեցվել»։
Վարդան Կոստանյանն էլ արձագանքեց, որ այդ հարցին պետք է Առողջապահության նախարարությունը պատասխանի։