«Այս կարգի անարխիա դեռ ոչ մի անգամ չի եղել». բողոքում են քաղաքացիները
«Ասում են՝ եթե ուզում եք երկիրը վերացնել, ամենաառաջինը վերացրեք բիզնեսը»,- նշում են կառավարության դիմաց բողոքի ակցիա իրականացնող քաղաքացիները, որոնք տարբեր երկրներից, մասնավորապես Չինաստան, Թուրքիա, ապրանք են ներկրում Հայաստան։
Նրանք պահանջում են չբարդացնել իրենց կյանքը, շարունակել ապրանքը մաքսազերծել այն գնով, ինչ նախկինում, ինչ նախորդ շաբաթ, «պանդեմիայի պայմաններում գոնե ունենանք արտոնություններ, մինչև այս վիճակից դուրս գանք»։
«Հիմնականում կոշիկ, հագուստ ենք ներկրում։ Նախկինում մաքսազերծումը եղել է 3 դոլար 25 ցենտ, հիմա, փաստով ցույց ենք տալիս, մոտավորապես առնվազն 6 անգամ ավելանում է մաքսային արժեքը, 3000 դրամանոց ապրանքը կդառնա 10 հազար դրամ։
Հետևանքները լինելու են՝ ապրանքների թանկացում, մեր գործունեությունը կարող է դադարեցնենք։ Այս վիճակում են հազարավորներ, որոնք մանրածախ առևտրով են զբաղվում, ունեն աշխատողներ, հարկ են մուծում»,- ասում է ակցիայի մասնակիցներից մեկը։
Նրանք հստակեցրին, որ խոսքը վերաբերում է հավաքական բեռներին, ոչ ԵԱՏՄ երկրներից ներկրվող բեռներին։
«Հիմա, որ մաքսային բեռն ավելացնում ես՝ անունը ի՞նչ ես դնում։ Դուրս չեն գալիս պատասխանելու համար, ասում են՝ գրավոր գրեք։ Ձեր լոլոները լավ գիտենք, թող մեկն իջնի, պատասխանի։ Ուրեմն այսքան մարդը, որ եկել է, իրենց համար ոչինչ է։ Սրա ժողովրդավարությունն է՞լ որն է, ռեպրեսիվ մեթոդներով ասում են՝ սա է ու վերջ»,- ասում են բողոքող քաղաքացիները։
Օրինակի համար նշեցին՝ ներկայացնելով փաստաթուղթ, որ նախկինում նույն քանակի ապրանքի համար 54 հազար դրամ են վճարել, հիմա մուծել են 316 հազար դրամ։
Նշում են, որ իրենք էլ լավ չեն հասկանում, թե ինչ փոփոխություններ են։
«Հավաքական բեռները մաքսազերծվում էին կիլոգրամներով։ Հիմա փոխել են հատով՝ ամեն ապրանք իր տեսակից, նյութից, չափսից, որակից, տարիքային և սեռից, տարբեր են մաքսազերծման գները։ Զանգում եմ, ինձ հստակ չեն պատասխանում, ասում են՝ բացեք այս որոշումը։ Բայց ինձ ու իմ նմանների համար նման աշխատելաոճը խնդիր է։
Անհնար է այդպես աշխատել։ Հիմա ոչ մեկ չգիտի՝ որ ապրանքն ինչ գին է լինելու։ Եթե նախկին գները չլինեն, ապրանքը թանկանալու է, նույնիսկ մեկին մեկ կարող է թանկանալ»,- նշեց ակցիայի մասնակիցը։
Քաղաքացիներից Լիլյա Մարդոյանն ասաց, որ տաս տարի է օրինական ճանապարհով բեռ է բերում՝ հավաքական, բոլոր իշխանությունների ժամանակ աշխատել է, ամեն մեկն էլ ունեցել են իրենց թերությունները, բայց այս կարգի անարխիա դեռ ոչ մի անգամ չի եղել։
«Փաստի առաջ եմ կանգնած, քանի որ չեն տեղեկացրել, թե ինչքանով կբարձրանա մաքսային արժեքը մեզ համար։ Բերածս ընդամենը 34 կիլոգրամ բեռ է Թուրքիայից, որը 12 օրվա ընթացքում հազիվ հավաքել եմ, նկարներով, օն-լայն աշխատելով, ուզել եմ՝ ռիսկի դիմելով։ Շատ անգամ, ինչ նկարագրված է նկարի մեջ, նույնը չէ, քանակը գալիս է սխալներով։ Այս ամեն ինչը թողնենք մի կողմ, հիմա եկել, հասել է մաքսային, ասում են՝ գիտեք, ձեր բեռը չենք կարող մաքսազերծել, որովհետև պետք է ներկայացնեք ապրանքի որակը։ Որակը ես ի՞նչ իմանամ, եթե ես ապրանքը նայում եմ նկարով, ինքս չեմ շոշափել։ Երբ ասում են, որ կենթարկվեք տուգանքների, և այլն, վերցրեցի թղթերս հետ վերադարձա պահեստ, նայեցի, թե իմ ապրանքի մեջ ինչ է գրված։ Ապրանքը փռում եմ փոշոտ գետնին, բացում եմ, մեջերն ինչ պիտակներ են, նկարում եմ, ապրանքն էլ նկարում եմ, որ հավաստիանան, թե ինչ ապրանք է, գնում եմ մաքսային։
Այն, ինչ պարոն Փաշինյանը մեզ խոստացել էր, որ հավաքական բեռների ներկրողների, փոքր և միջին ձեռնարկատերերը կունենան զեղչ, արտոնությունները, կիլոգրամով կմարքսազերծեն, կիլոգրամի արժեքը կլինի 3 դոլար 25 ցետ, բեռնափոխադրման արժեքն առանձին բեռանափոխադրող ընկերություններին կվճարենք, ասեցինք՝ բարի, ամեն ինչ անում էինք, հիմա կանգնել ենք փաստի առաջ։ Հիմա ինձ մոտ փաստացի 1 կիլոգրամի արժեքը կազմելու է 11 դոլար, այսինքն 3,5 անգամ թանկ, նայած ապրանքի տեսակից»,- պատմեց Լիլյա Մարդոյանը։
Նրանք ընդգծում են՝ այլևս աշխատելու տարբերակ չունեն։
«Մենք պետք է աշխատենք։ Ինչո՞ւ չպետք է աշխատենք։ Ստացվում է, այսինքն իրենք ոնց ուզեն, պետք է անեն, մեզ չպետք է լսեն, մենք էլ չպետք է աշխատե՚նք։ Պետք է աշխատենք»,- ասաց բողոքող քաղաքացին։
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում
