Ձեր վստահելի աղբյուրը

Սեպտեմբերի 13-ին ավարտվել են Արագածոտնի մարզի Օրգով գյուղում՝ Արագածի գիտական կենտրոնում, ​ «Հերունու Ազգային Տիեզերական կենտրոն» (ՀԱՏԿ) նախագծի շրջանակում իրականացված նոր Հայաստանի վերածնվող նշանակալի գիտական կառույցներից մեկի՝ ՌՕԴ-54/2.6 ռադիոօպտիկական դիտակի​ վերագործարկմանը նպատակաուղղված փորձարկման վերջնական աշխատանքները: Միջոցառմանը ներկա են եղել  ՀՀ Վարչապետի աշխատակազմի, ԱԺ-ի  ներկայացուցիչներ,  գիտության, մշակույթի ​ ականավոր գործիչներ:​ ​ Այս մասին հայտնում են «Հայաստանի իրավազորություն» հիմնադրամից։ 

Իրականացվել են անտենայի կարդանային համակարգի առանցքների ներկա վիճակի զննում, կարգաբերումներ, անսարքությունների հետագա վերականգնման պլանավորման աշխատանք կատարվեց,  ռադիոդիտակի տեղանքից հեռավար կապ հաստատվեց ՀԱՏԿ միջազգային Խորհրդատվական խմբի  (AG) մի շարք անդամների հետ՝ Նիդերլանդներից, Գերմանիայից, Ավստրալիայից ռադիոաստղագիտության և անտենային տեխնիկայի ոլորտի համաշխարհային համբավ ունեցող մասնագետների հետ:  

Իսկ մինչև այդ սեպտեմբերի 2-ին կատարվել է Հերունու ռադիոդիտակի մեխանիկական կառուցվածքի ներկա վիճակի ուսումնասիրության և անտենայի երկարատև դադարից հետո առաջին փորձարկման աշխատանքը:  Համապատասխան ռադիոսարքավորման տեղադրման շնորհիվ 24 ժամվա ընթացքում գրանցվել է Տիեզերքի ռադիոճառագայթման աղմկային ազդանշանը ռադիոալիքների սանտիմետրային տիրույթում:                                            

Աշխատանքներն իրականացվել են «Հերունու ազգային տիեզերական կենտրոն»-ի կողմից ձևավորած միջազգային հեղինակավոր Advisory Group-ի՝ (AG, խորհրդատվական մարմին, որի անդամներն են աշխարհի 10 ռադիոաստղադիտարանների ինժեներական և աստղագիտական ոլորտի լավագույն առաջատար մասնագետները, փորձառու գիտնականներ Նիդերլանդներից, Գերմանիայից, Ավստրալիայից, Շվեդիայից, Իսպանիայից, Միացյալ Թագավորությունից) օգոստոսի 27-ի ընդլայնված հեռավար նիստի հանձնարարականով, ՀԱՏԿ թիմում ընդգրկված տեղական փորձառու մասնագետների մասնակցությամբ՝ նպատակ ունենալով հաստատել

- ՌՕԴ-54/2.6 ռադիոդիտակի պիտանելիությունը գիտական աշխատանքի համար,
​ - կարողությունն ու պատրաստվածությունը՝ ներգրավվելու համաշխարհային աստղագիտական համայնքի մեջ,
- միջազգային նախագծերի մասնակցության ​ հնարավորությունը:

Փաստում են, բոլոր հարցերի պատասխանները դրական են: Փորձարկումները փաստել են ակադեմիկոս Պարիս Միսակի Հերունու նախագծած և կառուցած ռադիոդիտակը հնարավոր է և պետք է վերագործարկել​

Մանրամասն գիտական զեկույցը կպատրաստվի այս փուլի ավարտին՝ մինչև սեպտեմբերի 18-ը, և կներկայացվի Advisory Group-ին, որից հետո AG-ի կողմից կուղղվի ՀՀ վարչապետին` ի լրումն 2020թ. հուլիսի 17-ի EVN/JIVE տնօրենների խորհրդի ղեկավար Rafael Bachiller-ի նամակի։

«Հայաստանի իրավազորություն» հիմնադրամը դեռևս​ 2017 թ-ից նախաձեռնել է «Հերունու Ազգային Տիեզերական կենտրոն»-ի ստեղծման և ՌՕԴ-54/2․6​ ռադիոօպտիկական դիտակի վերագործարկման նախագիծը, որը ենթակառուցվածքային​ զարգացման ծրագիր է։ Ծրագրով նախատեսված է ողջ համալիրը պահպանել որպես պետական սեփականություն։ ՌՕԴ-54/2․6 դիտակը ԱԶԳԱՅԻՆ ԱՐԺԵՔ է և անհարժեշտ է վերագործարկել։
Հիմնադրամը կայուն կապ է հաստատել ոլորտի միջազգային հայտնի գիտնականների և կառույցների, շահագրգիռ կազմակերպությունների և դոնորների հետ, ստորագրել փոխըմբռնման հուշագրեր, ծրագրի աջակցության վերաբերյալ տեղեկանքներ՝ ՌՕԴ-54/2․6 –ի վերագործարկման և ռադիոաստղագիտության կիրառության շրջանակում համագործակցության մեկնարկի համար, նաև՝ EVN ռադիոինտերֆերոմետրական միջազգային ցանցի համադրելիությանը հասնելու նպատակով։