Ձեր վստահելի աղբյուրը

Ադրբեջանը հարձակումն իրականացրել է շփման ամբողջ գծով՝ Օմարից մինչև Արաքս։ Լրագրողների հետ հանդիպմանը հայտարարեց Արցախի Հանրապետության նախագահ Արայիկ Հարությունյանը՝ ավելացնելով, որ պաշտպանության բանակը ժամը 7։00-ի դրությամբ պատրաստ էր պատերազմի։

Նա ընդգծեց, պատերազմը սպասելի էր, դրա մասին էին վկայում ամիսներ շարունակ Ադրբեջանի և Թուրքիայի ԱԳ նախարարությունների ղեկավարների հայտարարությունները։

«Ժամը 7-ի կողմերը սկսվեց։ Արդյունքները. այո, ունենք կորցրած դիրքեր, հիմնականում Թալիշի ուղղությամբ ու հարավային թևում։ Ունենք 17 զոհ, ուզում եմ ցավակցել մեր հայրենակիցներին։ Ունենք տասնյակ վիրավորներ։ Տասնյակ վիրավորներ ունենք քաղաքացիական բնակչության շրջանում»,-հայտարարեց Ա. Հարությունյանը։
Արցախի նախագահն ասաց, քաղաքացիական բնակչության շրջանում զոհեր կան, առաջին զոհերը եղել են առավոտյան՝ տատիկն ու թոռնիկը։

«Կարծես թե ձեռագիրը նույնն է, ինչպես ապրիլյան պատերազմի օրերին, բայց մասշտաբներն անհամեմատելի են, ամբողջ երկայնքով մեկ են գործողությունները։ Բայց ուզում եմ հայտարարել, որ մեզ հետ կռվում է ոչ միայն Ադրբեջանը, այլև Թուրքիան։ Օգտագործում են Թուրքիայի բանակի ձեռքի տակ եղած ժամակակից զենքերն ու զինամթերքը, ԱԹՍ-ներ ու ոււղաթիռներ։ Այն նույն «Ֆ-16» կործանիչները, որոնք մեկ ամսից ավելի է, գտնվում են Ադրբեջանի տարածքում սովորական կամ համատեղ զորավարժության անվան տակ, առավոտից օգտագործել են մինչև այս պահը»,-հայտարարեց Արայիկ Հարությունյանն ու համայն աշխարահի համար մեկ անգամ ևս ընդգծեց, որ Արցախի դեմ Ադրբեջանի հետ կռվում է նաև Թուրքիան, ու խոսքը ոչ միայն անօդաչուների ու այլ տեխնիկայի մասին է, այլ զորամիավորումների, զինվորականների։

«Չեմ խոսում վարձկանների, չեմ խոսում այլ երկրներից կամավորականների մասին։ Արցախը կռվում է միայն օգտագործելով Արցախի ՊԲ ուժերը, և իհարկե, կլինեն կամավորներ միայն Արցախի Հանրապետությունից»,-նշեց նա՝ ավելացնելով, որ Արցախում սկսվել է համատարած մոբիլիզացիա։

Արայիկ Հարությունյանը հայտարարեց, որ Արցախի պաշտպանության բանակը կատարում է իր առջև դրված խնդիրը։

«Անդրադառնալով այն հարցերին, թե դիրք կորցրե՞լ ենք, ասեմ, դիրք կորցրել ենք, կարող է նաև կորցնենք, դիրքեր գրավելու ենք հաստատ։ Ուզում եմ հայտարարել, պատերազմի արդյունքները կոնկրետ մեզ համար  կանխատեսելի են։ Այն մտահղացումները, որ ունի թշնամին, ես իրավունք ունեմ արդեն այդպես անվանել, ձախողվելու են»,-ասաց Արցախի նախագահը։

Նա նշեց՝ թշնամին ունի հարուրավոր կորուստներ, տասնյակ անօդաչու սարքեր, տեխնիկա, ուղղաթիռներ, հայկական կողմն ունի հետախուզության տվյալներ, ինչպես նաև չհաստատված փաստ, որ խոցվել է թուրքական ինքնաթիռ։

Արցախի ղեկավարը շեշտեց, որ թուրքակիան ԱԹՍ-ները գործի են դնում թուրքական բանակի ներկայացուցիչները։

Հարությունյանն ասաց՝ արցախյան կողմն ունի իր նախանշած մարտավարությունը, երկու ժամ առաջ անվտանգության խորհրդի նիստ, որին հրավիրված են եղել նաև պատերազմի բովով անցած զինվորականներ։

«Սա կենաց-մահու պատերազմ է, և այն տալու ենք ամբողջ ազգով»,-ասաց Արցախի նախագահն ու շնորհակալություն հայտնեց քաղաքական ուժերին, սփյուռքի ներկայացուցիչներին ինչպես աջակցության, այնպես է մասնակցության համար։

Նա ասաց, որ այս պահին տասը հազար կամավոր ցանկություն է հայտնել մեկնել Արցախ։