Զոհրաբ Մնացականյանը՝ մոսկովյան բանակցությունների մասին
«Բավական բարդ գործընթաց էր։ Մեզ համար, իհարկե, առաջնային խնդիրները վերաբերվում էին հետևյալին, որպեսզի մենք կարողանանք հասնել մի իրավիճակի, երբ որ կարողանանք վերջ դնել այս ագրեսիային»,- գրեթե 11 ժամ տևած մոսկովյան բանակցությունից հետո Հանրային հեռուստաընկերության «Լուրերին» տված հարցազրույցում ասել է ՀՀ արտաքին գործերի նախարար Զոհրաբ Մնացականյանը։
Հիշեցնենք, որ երեկ Մոսկվայում հանդիպել էին Հայաստանի, Ադրբեջանի և Ռուսաստանի արտաքին գործերի նախարարները Լեռնային Ղարաբաղում տիրող իրավիճակի շուրջ խորհրդակցություններ անցկացնելու համար։ Հանդիպումից հետո արտաքին գործերի նախարարները հանդես են եկել հայտարարությամբ, մասնավորապես այսօր ժամը 12:00-ից մարդասիրական նպատակներով հայտարարվում է կրակի դադարեցման մասին` ռազմագերիների և պահվող այլ անձանց, զոհվածների մարմինների փոխանակման համար` Կարմիր Խաչի Միջազգային Կոմիտեի միջնորդությամբ և վերջինիս չափանիշների համաձայն։
Նա նշեց, որ ագրեսիան այս պարագայում առանձնահատուկ իրավիճակ էր, երբ որ Ադրբեջանի գործողությունները համալրված էին Թուրքիայի՝ բավականին բաց և ուժգին աջակցությամբ, նաև միջազգային ահաբեկչական խմբավորումների ներգրավմամբ. «Փաստորեն մեր հայրենակիցները Լեռնային Ղարաբաղում կռվում էին բավական յուրահատուկ պայմաններում, երբ բացի Ադրբեջանից կար նման ուժգին հարձակում նման ուժերի ներգրավմամբ»։
ԱԳ նախարարի խոսքով, իրավիճակը տարածաշրջանում մնում է բավական փխրուն։
«Մեզ անհրաժեշտ է հասնել կրակի դադարի, որովհետև սա ուղղակի տարածաշրջանի, առաջին հերթին Լեռնային Ղարաբաղի համար դարձել է բավական լուրջ մարտահրավեր, և որևէ առաջընթացի մասին խոսելն առանց ավարտ, վերջնակետ դնելու այս իրավիճակին, իհարկե, անհնար կլիներ։ Այն, ինչ բավական երկար բանակցությունների ընթացքում մենք կարողացանք արձանագրել, այն է, որ մեզ անհրաժեշտ է դադարեցնել կրակը, այս պատերազմը, վայրագությունը, ամրագել, ամրապնդել այս դադարը և հետո նոր խոսել խաղաղ գործընթացի մասին, նաև վերահաստատել, որ Մինսկի խմբի համանախագահությունը մնում է միակ այն ձևաչափը, որը միջազգայնորեն ճանաչված հարթակն է, ձևաչափն է բանակցությունների և խաղաղ գործընթացի համար և որևէ այլ ուժ, մասնավորապես, Թուրքիան, այդ առումով որևէ դերակատարություն չի կարող ունենալ։ Հիմա առաջին խնդիրն ուղղակի այս ճգնաժամն ավարտին հասցնելն է»։
Զ.Մնացականյանն ասաց, որ այստեղ նշանակություն ուներ համանախագահության դերակատարությունը, առաջին օրվանից բավական մեծ ու կարևոր դերակատարություն ունեին համանախագահ երկրների, այդ երկրների նախագահների, ԱԳ նախարարների մակարդակով եղել են հայտարարություններ, առանձին նախագահների քայլերը, գործողությունները։
«Այդ առումով և Ֆրանսիայի դերակատարությունը, և ԱՄՆ կողմից հայտարարությունները, էական էին ի ցույց դնել այն մտահոգության խորությունն ու իրավիճակի լրջության խորությունը, ներգրավածությունը։ Առանձնահատուկ ընդգծեմ այն դերակատարությունը, որ ՌԴ-ն ստանձնեց և ՌԴ նախագահն այդ առումով անձամբ իր ներուժը ներդրեց սրա մեջ ինչպես և մյուսները, բայց մենք այսօր հավաքվել էինք, որպեսզի փորձեինք իրական գործնական արդյունք ստանալ այն երկխոսությունը, որ տեղի էր ունենում ՌԴ նախագահի և Հայաստանի վարչապետի, Ադրբեջանի նախագահի միջև առանձին-առանձին: Մեր հանձնարարությունն էր, բնականաբար, հասնել դրանց իրականացմանը։
Հույս ունեմ, որ կկարողանանք հոկետմեբերի 10-ին ժամը 12։00-ից հետո կանգնեցնել այս իրապես շատ լուրջ մարտահրավերը, իրավիճակը, որը սպառնում է մեր հայրենակիցներին։ Այս ամենը ևս մեկ անգամ ընդգծեց, որ ֆիզիկական անվտանգության մեր մտահոգություններն ամբողջովին արդարացված են, դրանք անմիջապես ուղղակի գոյություն ունեն։ Այդ առումով է, որ խաղաղ բանակցությունների գործընթացում եղել և մնում է մեզ համար առանջնային մեր հայրենակիցների անվտանգության գերակայությունը, առանձնահատուկ նշանակություն ունի մեզ համար իրենց ինքնորոշման իրավունքի արտահայտման այդ իրավունքի ճանաչումն ու իրականացումն այդ իրավունքը, որը Լեռնային Ղարաբաղում մեր հայրենակիցներին կբերի հասնելու այն կարևոր նպատակին, որն ամրագրում է իրենց ինքնորոշման իրավունքը, այդ իրողությունը, որ նրանք պետք է ապրեն ազատ, իրենց կյանքը, ճակատագիրը որոշող կարգավիճակում, որպես մի միավոր, որը ճանաչված լինի բոլորի կողմից այն բոլոր առումներով որպես անկախ պետություն»,-ասաց ՀՀ ԱԳ նախարարը։
Ինչ վերաբերում է հումանիտար հրադադարին, Զ.Մնացականյանն ասաց, որ Կարմիր խաչի միջոցով անհրաժեշտ է լինելու իրականացնել որոշ գործողություններ, որպեսզի հումանիտար բնույթի հարցեր լուծվեն։
«Մյուս կարևորագույն խնդիրը, որը բխում է մեր այս համաձայնությունից, ամրագրելն է կրակի դադարը, ամրագրելն է մեխանիզմները, որոնք ապահովում են կրակի դադարը, ամրապնդում են բացառումն այս գործողությունների վերսկսման։
Համաձայնեցված հայտարարությունը քայլեր են մեկը մյուսից բխող, որոնք ենթադրում են իրավիճակի կայունացում, տարածաշրջանում կայունության վերականգնում, Արցախում մեր հայրենակիցների անվտանգության համակարգի վերականգնում և ամրապնդում ու խաղաղ գործընթացի շարունակությունը, որը, բնականաբար, եղել է մեզ համար առանջնային նպատակ»,- ասաց ՀՀ ԱԳ նախարար Զոհրաբ Մնացականյանը։
Հարակից հրապարակումներ`
- ՀՀ, ՌԴ և Ադրբեջանի ԱԳ նախարարների հայտարարությունը
- Հոկտեմբերի 10-ին, ժամը 12:00-ին հայտարարվում է հումանիտար հրադադար
- Մոսկվայում ՀՀ, ՌԴ և Ադրբեջանի ԱԳ նախարարների հանդիպումը դեռ չի ավարտվել
- ԱԳ նախարարների հանդիպումից առաջ Պուտինը հեռախոսազրույցներ է ունեցել Փաշինյանի ու Ալիևի հետ
- Զոհրաբ Մնացականյանն այսօր կմեկնի Մոսկվա
- Պեսկով. Ռուսաստանի, Հայաստանի և Ադրբեջանի ղեկավարների հանդիպում չի նախատեսվում