Ձեր վստահելի աղբյուրը

Ավստրիայի խորհրդարանի մի խումբ պատգամավորների կողմից խորհրդարանի լիագումար նիստի քննարկմանն էր ներկայացվել բանաձևի նախագիծ Լեռնային Ղարաբաղում ստեղծված իրավիճակի վերաբերյալ։ Այս մասին տեղեկանում ենք Ավստրիայում ՀՀ դեսպանությունից։

Բանաձևի հեղինակները նշում են, որ սեպտեմբերի 27-ին վերսկսվեցին ռազմական գործողությունները և այդ ժամանակվանից ի վեր, շփման գծի ամբողջ երկայնքով և դրանից դուրս, ավելի ու ավելի ծանր մարտեր են ընթանում:

Բանաձևի հեղինակները մտահոգություն են հայտնում խաղաղ բնակչության վիճակի վատթարացման, գյուղերի և քաղաքների հրետակոծությունների, ծանր հրետանու կիրառմամբ քաղաքացիական ենթակառուցվածքների՝ այդ թվում կրթական հաստատությունների և հիվանդանոցների թիրախավորման, ինչպես նաև քաղաքացիական բնակչության շրջանում զոհերի վերաբերյալ լուրերի կապակցությամբ։

Բանաձևի առաջարկության մեջ նաև նշվում է տեղում չեզոք դիտորդների բացակայության պատճառով մանրամասն և անաչառ տեղեկատվության սակավության մասին, ինչպես նաև կորոնավիրուսային համավարակով պայմանավորված ԵԱՀԿ կողմից տեղում մոնիտորինգ իրականացնելու անհնարինության մասին:

Բանաձևի հեղինակներն անդրադառնում են նաև լրագրողներին թիրախավորելու փաստին:
Անդրադառնալով միջազգային հանրության արձագանքին, բանաձևի հեղինակները նշում են, որ Եվրամիությունը, ԵՄ արտաքին գործերի և անվտանգության քաղաքականության հարցերով Բարձր ներկայացուցիչը, ԵԱՀԿ Մինսկի խմբի համանախագահները, ՄԱԿ-ի գլխավոր քարտուղար Անտոնիո Գուտերեշը և ՄԱԿ-ի մարդու իրավունքների Գերագույն հանձնակատար Միշել Բաչելետը կողմերին կոչ են արել դադարեցնել մարտական գործողությունները, պաշտպանել խաղաղ բնակչությանը և անհապաղ վերսկսել բանակցությունները:

Անդրադառնալով Թուրքիայի դերակատարությանը, նշվում է, որ Թուրքիան, որը ռազմական ու քաղաքական աջակցություն է ցուցաբերում Ադրբեջանին, սրում է հակամարտությունը: Բանաձևի հեղինակները մտահոգիչ են համարում նաև օտարերկրյա զինյալների հավաքագրման մասին հաղորդագրությունները: Այս արտաքին միջամտությունը թեժացնում է հակամարտությունը և կարող է հանգեցնել հետագա՝ նաև տարածաշրջանային ապակայունացման:

Հոկտեմբերի 10-ին Մոսկվայում կայացած հանդիպման շրջանակներում համաձայնություն է ձեռք բերվել հումանիտար զինադադարի, գերիների և զոհված զինծառայողների փոխանակման և ԵԱՀԿ Մինսկի խմբի համանախագահների հովանավորմամբ բովանդակային բանակցությունների վերսկսման վերաբերյալ: Չնայած հրադադարի վերաբերյալ համաձայնության, հոկտեմբերի 12-ին մարտերը վերսկսվել են։

Այնուհետև Ավստրիայի խորհրդարանը՝ Ազգային խորհուրդը միաձայն ընդունեց հետևյալ բանաձևը։

«Ազգային խորհուրդը որոշում է`
Դաշնային կառավարությանը, մասնավորապես` Եվրոպական և միջազգային հարցերի դաշնային նախարարին առաջարկվում է շարունակել երկկողմ և բազմակողմ մակարդակներում աշխատանքը երկու կողմերի՝ մարտերի անհապաղ դադարեցման և միջազգային իրավունքի, մասնավորապես` քաղաքացիական բնակչության և քաղաքացիական ենթակառուցվածքների պաշտպանության միջազգային իրավունքի ներքո ստանձնած պարտավորությունների կատարման ուղղությամբ։ Այս համատեքստում Եվրոպական և միջազգային հարցերի դաշնային նախարարին առաջարկվում է եվրոպական մակարդակով ջանքեր գործադրել, որպեսզի Եվրամիությունը մարդասիրական օգնություն տրամադրի տուժած խաղաղ բնակչությանը և ևս մեկ անգամ իր ազդեցությունը գործադրի ԼՂ հակամարտությանը ներգրավված բոլոր դերակատարների վրա՝ ապահովելու համար մարդասիրական օգնության հասանելիությունը խաղաղ բնակչությանը:

Եվրոպական և միջազգային հարցերի դաշնային նախարարին առաջարկվում է ջանքեր գործադրել եվրոպական մակարդակով, որպեսզի Եվրամիությունն իր ազդեցությունը գործադրի բոլոր ներգրավված դերակատարների, մասնավորապես Թուրքիայի հանդեպ՝ արտաքին միջամտությունը, այդ թվում հակամարտության կողմերին զենքի մատակարարումները դադարեցնելու նպատակով; նպաստել իրավիճակի շուտափույթ դեէսկալացիային և կայուն հրադադարի հաստատմանը; քայլեր ձեռնարկել ԵԱՀԿ դիտորդների տարածաշրջան մեկնելու ուղղությամբ՝ պայմանով որ COVID-19 համավարակով պայմանավորված իրավիճակը դա թույլ է տալիս; հասնել բանակցությունների վերսկսմանը։ Եվրոպական և միջազգային հարցերի դաշնային նախարարին առաջարկվում է նաև աշխատանքներ տանել ԵՄ շրջանում՝ ներառական խաղաղ գործընթացին սատարելու և տարածաշրջանում տևական կայունություն հաստատելու ուղղությամբ։  

Բացի այդ, համապատասխան Դաշնային նախարարին առաջարկվում է աշխատանքներ տանել՝ ԼՂ հակամարտությունը ԵԱՀԿ Մինսկի խմբի համանախագահների հովանու ներքո բովանդակային բանակցությունների միջոցով կարգավորելու նպատակով, և, անհրաժեշտության դեպքում, նպաստել Հայաստանի և Ադրբեջանի միջև Վիեննայում ուղիղ բանակցությունների անցկացմանը»: