Արման Ղուկասյան. Եթե այդ ուժերն ունեն ավելի լավ, խելամիտ առաջարկ, թող անեն
Հայաստանյան 13 կուսակցությունների՝ ռազմաքաղաքական հարցերի օպերատիվ կառավարման շտաբ, պետական հատուկ մարմին ստեղծելու առաջարկին միացած «Հանուն սոցիալական արդարության» կուսակցության նախագահ Արման Ղուկասյանը կարծում է՝ իշխանությունները պատերազմի հենց սկզբից պետք է ազգային մոբիլիզացիայի, կոնսոլիդացիայի կոչով հանդես գային:
«Պետք է մի կողմ դնել ներքին տարաձայնությունները: Պատերազմի հրամայականն է՝ լինել միասնական»,- Panorama.am-ի հետ զրույցում ասաց Ա.Ղուկասյանը:
Նա նշեց, որ հենց պատերազմի առաջին օրվանից իրենք տարբեր քաղաքական ուժերով պարբերաբար հանդիպել են, քննարկել ստեղծված իրավիճակը, մտքեր փոխանակել, թե ինչով կարող են օգտակար լինել պետությանն այս դժվարին պահին:
«Կասկած չկա, որ բոլորն անելիք ունեն: Չկա ընդդիմություն, իշխանություն տարանաջատումը, նախկին ու ներկա պիտակավորումները: Այսօր կա միայն թիկունք ու սահման հասկացությունը: Եկել ենք եզրակացության, որ պետք է լինի ազգային մոբիլիզացիա, կոնսոլիդացիա, որպեսզի բոլոր կարող ուժերը, նախկին, ներկա պաշտոնյաները, բոլոր մարդիկ, ովքեր ունեն փորձ, հմտություններ, հնարավորություններ, պետք է օգտակար լինեն ու նման առաջարկով ենք հանդես եկել: Մեր քաղաքական ուժը նույնպես միացել է այդ միասնականության տրամաբանությունից»,- ասաց քաղաքական գործիչը:
Նա ընդգծեց՝ հայտարարության միացած քաղաքական ուժերը, իհարկե, ներքին օրակարգային հարցերի շուրջ ունեն տարաձայնություններ, բայց դրանք մի կողմ են դրվել ու ընդհանուր հաղթանակ կերտելու նպատակով նման առաջարկությամբ են հանդես եկել: Հիմա սպասում են կառավարության արձագանքին:
Ինչ վերաբերում է այս առաջարկության դեմ հանդես եկողներին, դեմ արձագանքողներին, Ա. Ղուկասյանն ասաց. «Բացասական եմ գնահատում այն հայտարարությունները, երբ խոսում են՝ իշխանության գալու, իշխանություն վերցնելու քաղաքական ամբիցիաներ ունեն: Իհարկե, այս պահին դա անհեթեթություն է: Այս պահին խոսել դրա մասին, կարծում եմ, դավաճանություն է, որովհետև ինչպես կարելի է նման ժամանակահատվածում, երբ պետությունը նման մարտահրավերի առաջ է կանգնած, խոսել այդպիսի բաների մասին:
Այն մարդիկ, որոնք իբր թե կոչ են անում լինել միասնական, իրենց նման գնահատականներով, ծայրահեղ մոտեցմամբ այս նախաձեռնությանը, հենց իրենք են մտցնում պառակտում»:
Ըստ նրա, նման գնահատական տվողները հիմնականում այն մարդիկ են, որոնք միշտ ծառայել են օտարերկրյա շահերին, դրամաշնորհներ են ստացել օտար երկրերից կամ փորձել են յուրաքանչյուր իշխանության ժամանակ հաճոյանալ նրանց:
«Պետք է մի կողմ դնել նման գործելաոճը: Եթե այդ ուժերն ունեն ավելի լավ, խելամիտ առաջարկ, թող անեն այդ առաջարկը: Բայց իրենք տարիներ շարունակ հանդես են գալիս ուղղակի քննադատողական դիրքերից, իրենցից երբևէ կոնստրուկտիվ բան չեմ լսել»,- ասաց Ա. Ղուկսյանը:
Նա նշեց, որ լավ կլիներ՝ իշխանություններն առաջարկի դետալներն ուղղակի պարզելու համար հանդիպեին կուսակցությունների ներկայացուցիչների հետ ու քննարկել:
«Չեմ հասկանում՝ ինչպես կարող է լինել բացասական կամ դրական արձագանք, եթե դեռևս դետալները չեն քննարկվել: Առնվազն ակնկալիք ունեմ, որ վարչապետը կհանդիպի քաղաքական ուժերի հետ, կքննարկի դետալները, կլսի բոլոր քաղաքական ուժերի տեսլականը:
Օպերատիվ շտաբը հնարավորություն է վարչապետի՝ նույն երկրի գերագույն գլխավոր հրամանատարի գլխավորությամբ, համակարգել հարցերը դիվանագիտական, ռազմական, քաղաքական դաշտերում: Մենք տեսնում ենք անելիքներ բոլոր ուղղություններով»,- ասաց Ա. Ղուկասյանը:
Ըստ նրա, ապատեղեկատվություն է բացասական գնահատականներ հնչեցնողների այն հայտարարությունները, թե այս առաջարկը կոչ է իշխանություններին լիազորությունները փոխանցել օպերատիվ շտաբին. «Նման կոչ չկա այդ հայտարարության մեջ, այլ օգտակար լինելու, միասնական ֆրոնտով հանդես գալու կոչ է: Իհարկե, եթե օպերատիվ շտաբ է ձևավորվում, որոշակի լիազորություններով պետք է օժտվի այդ շտաբը»:
Հարցին՝ «Իմ քայլը» խմբակցության պատգամավոր Վահագն Թևոսյանն ասում է՝ 13 կուսակցությունների առաջարկը հակասահմանադրական է, ինչպե՞ս կարձագանքեք այդ հայտարարությանը, Ա. Ղուկասյանն ասաց, որ նախ կցանակա լսել հիմնավորում, ապա հավելեց՝ օրենքը թույլ է տալիս: Միաժամանակ նշեց, որ եթե պետք լինի, կարելի է օրենք փոխել, տեխնիկական հարց է, եթե լինի կամք, ցանկություն, միասնական լինելու մոտեցում:
«Բազմիցս ենք ականատես եղել, թե ինչպես է Ազգային ժողովը մի գիշերվա մեջ օրենքներ փոխել»,- ասաց «Հանուն սոցիալական արդարության» կուսակցության նախագահ Արման Ղուկասյանը:
Հարակից հրապարակումներ`
- Ներքին թշնամու որոնման ձեր ճիգերն ուղղված են մեր ազգային պետականության թուլացմանը. Գալստյան
- Մենք ընդամենը ուզում էինք հայրենիքին օգնել. Հրանտ Բագրատյան
- Իշխան Սաղաթելյան. Գլուխները պատին են տալիս
- Ավետիք Չալաբյան. Կուսակցությունների հայտարարությունը կառավարությանը մեկնած բարի կամքի ժեստ է
- Մեկ տասնյակից ավելի կուսակցություններ կառավարությունից պահանջում են օպերատիվ կառավարման շտաբ ստեղծել
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ