Ձեր վստահելի աղբյուրը

«Եթե պետք է գան Հայաստան, մեզանից իմանան,  դրա կարիքը չկա, մենք իրենց ամեն ինչ փոխանցում ենք, իրենք եթե գալու են, գալու են Արցախ»,- ԱԺ Տարածաշրջանային եւ եվրասիական ինտեգրման հարցերի մշտական հանձնաժողովում կազմակերպված քննարկման ժամանակ հայտնեց ՀՀ մարդու իրավունքների պաշտպան Արման Թաթոյանը՝ անդրադառնալով միջազգային իրավապաշտպան կառույցների աշխատանքներին: Նրա խոսքով, այդ կառույցների ներկայացուցիչները պետք է իրենց աչքերով տեսնեն հրետակոծությունների կասետային ռումբերի օգտագործման հետևանքները: Թաթոյանը գտնում է, որ այդ միջազգային իրավապահ կառույցները պետք է  հանդիպեն Արցախի մարդու իրավունքների կայացած ինստիտուտների ներկայացուցիչների՝ մասնավորապես ԱՀ օմբուդսմեն Արտակ Բեգլարյանի հետ:

«Ադրբեջանի և Թուրքիայի կողմից Արցախի խաղաղ բնակչության նկատմամբ իրականացվող հանցագործությունները և Ադրբեջանի իրավական պատասխանատվությունը», խորագրով քննարկմանը Արման Թաթոյանը հայտնեց, որ մի քանի միջազգային կազմակերպություններում հայկական կողմի դիմումների հիման վար Արցախում ահաբեկիչների գործողությունների վերաբերյալ պաշտոնապես հարուցված են վարույթներ:

«Մենք շարունակում ենք աշխատել և ապացույցներ ներկայացնել, որոնք փակ գործընթացներ են»,- հայտնեց Արման Թաթոյանը և նկատեց, որ ավելին չի կարող ասել:

Հայաստանի օմբուդսմենը  հայտնեց, որ ամենօրյա կապի մեջ է Եվրոպայի խորհրդի հանձնակատար Դունյա Միյատովիչի և ՄԱԿ-ի գլխավոր հանձնակատարի գրասենյակի հետ,  աշխատանքներ են տարվում նաև անհատական մարկարդակով:

Արման Թաթոյանը տեղեկացրեց, որ կասետային ռումբերի կիրառման փաստով արդեն կան  Կարմիր խաչի, ՄԱԿ-ի մարդու իրավունքների հանձնակատարի քննադատությունները, իսկ լրագորղների դեպքերով կա եվրախորհրդի հանձնակատարի խիստ քննադատությունը: Օմբուդսմենի խոսքով, հրապարակվել է նաև եվորոպական օմբուդսմենների ինստիտուտի գլխավոր քարտուղարի հայտարարությունն ու քննադատությունը: Թաթոյանը շեշտեց, որ Արցախում պետք է աշխատի օբյեկտիվ անաչառ աշխատող միջազգային խումբ, որը տեղում կտեսնի, կարձանագրի  և կգնահատի կատարվածը: