Ձեր վստահելի աղբյուրը

Ֆրանսիայի արտաքին գործերի նախարար Ժան-Իվ Լը Դրիանը հայտարարություն է տարածել Լեռնային Ղարաբաղի վերաբերյալ գիշերով Հայաստանի, Ադրբեջանի և Ռուսաստանի իշխանությունների կողմից արված հրադադարի մասին հայտարարությունների վերաբերյալ։ Այս մասին տեղեկանում ենք Ֆրանսիայի ԱԳՆ կայքից։

«Մենք կարդացել ենք և վերլուծում ենք դրա պարամետրերը և հետևանքները: Սպասվում են պարզաբանումներ՝ դրանց շրջանակը գնահատելու համար:

Մարտերի ավարտը էական է: Դա կողմերի վերջին շաբաթներին մի քանի անգամ ստանձնած պարտավորությունն է, այն առաջնահերթ խնդիրն է, որին մենք վճռականորեն աջակցել ենք և մոբիլիզացված ենք մնում Մինսկի խմբի համանախագահության ներքո: Ուստի մենք ակնկալում ենք, որ Ադրբեջանի ստանձնած պարտավորությունները խստորեն կպահպանվեն, և որ նրա հարձակումները անմիջապես կդադարեն: Այս համատեքստում մենք պահանջում ենք Թուրքիայից՝ ոչինչ չանել, ինչը հակասում է այս գերակա նպատակին»,- ասել է Ֆրանսիայի ԱԳ նախարարը:

Լը Դրիանն ընդգծում է, որ «այս դժվարին ժամանակներում Ֆրանսիան վերահաստատում է իր ողջ բարեկամությունը հայ ժողովրդի նկատմամբ՝ հաշվի առնելով մարդկային, մշակութային և պատմական կապերի սերտությունը, որոնք մեզ կապում են Հայաստանին»։

«Այս դրամատիկ համատեքստում մենք նրանց կողքին ենք: Մասնավորապես, մենք կապահովենք, որ տրամադրենք անհրաժեշտ բոլոր մարդասիրական աջակցությունը: Տեղերում իրավիճակը, տեղահանված բնակչության հետ և քաղաքային կենտրոններում կռիվները, իրոք ունեցել է էական հումանիտար հետևանքներ: Վերջին շաբաթներին Ֆրանսիան մոբիլիզացվել է՝ քաղաքացիական հասարակության բազմաթիվ նախաձեռնությունների միջոցով: Դրան նպաստում են Ֆրանսիայի իշխանությունները՝ անցյալ շաբաթվա վերջին Երևան ժամանած բժշկական օգնությամբ, ինչպես նաև վիրաբույժների թիմեր: Առաջիկա օրերին ձեռնարկվելու են հետագա նախաձեռնություններ` Հայաստանին անհրաժեշտ օգնությունն ապահովելու համար»,- նշել է Լը Դրիանը:

Վերջապես, հակամարտության տևական կարգավորման շուրջ կողմերի միջև բանակցությունների վերսկսումը մնում է անհրաժեշտ` երեկ հայտարարված հրադադարի համաձայնագրից դուրս:

«Ֆրանսիան իր լիարժեք դերը կատարելու է ԵԱՀԿ Մինսկի խմբի համանախագահության շրջանակներում: Երկու կողմերի միջև քննարկումները պետք է վերսկսվեն առանց հապաղելու: Մասնավորապես, դրանք պետք է թույլ տան վերադարձնել վերջին շաբաթների ընթացքում հակամարտության արդյունքում տեղահանված մարդկանց և սահմանել Լեռնային Ղարաբաղի ապագա կարգավիճակը»,- ընդգծում է Ֆրանսիայի ԱԳ նախարարը:

Հիշեցնենք, որ ԵԱՀԿ Մինսկի խմբի մյուս համանախագահ ԱՄՆ-ը ևս հայտնել է, որ ի գիտություն են ընդունել Ռուսաստանի միջնորդությամբ պայմանավորվածությունը և շահագրգռված կլինեն ավելին իմանալ այս նոր պայմանավորվածության և դրա իրականացման մանրամասների մասին։ 

Հիշեցնենք, որ Հայաստանի վարչապետ Նիկոլ Փաշինյանն իր ստորագրությունն է դրել Արցախի յոթ շրջանները, այդ թվում Շուշի քաղաքն Ադրբեջանին հանձնելու մասին եռակողմ հայտարարության ներքո։ Բացի այդ, պարտավորվել է Հայաստանի տարածքով ցամաքային կապ ապահովել Նախիջևանի ու Թուրքիայի միջև։ Համաձայնության ներքո Փաշինյանը ստորագրել է գաղտնի պայմաններում։