Ձեր վստահելի աղբյուրը

«Այսօր  հայ ժողովուրդը, համյան հայությունը ունի մեկ կարևոր նպատակ՝ փրկել Արցախը»,- Ազատության հրապարակում կայացած հանրահավաքում ունեցած ելույթում ասաց ՀՅԴ Գերագույն մարմնի ներկայացուցիչ Իշխան Սաղաթելյանը։

Նա նշեց, որ Արցախը փրկելու համար պետք է սկսել ազգային ազատագրական պայքար։

«Այս պահին ձևավորում ենք  հայրենիքի փրկության կոմիտե։ Ողջ հայ ժողովորդին, համայն հայությանն ասում ենք՝ ոտքի կանգենք, փրկեք Արցախը։ Արցախը փրկելու համար կա մեկ գլխավոր խոչընդոտ, նրա անունը Նիկոլ է։ Պետք է արագ, անհապաղ ազատվել Նիկոլից, ազգի չարիքից»,- ասաց ՀՅԴ-ական գործիչը։

Նա շեշտեց, որ սա անձերի պայքար չէ, իշխանության համար պայքար չէ, կուսակցական պայքար չէ, Արցախը փրկելու պայքար է։

«Թուրքի առաջ կզած Հայաստանի ղեկավարը պետք է հեռանա։ Այս մի կինն իր տունն է ուզում Հադրութ, մյուսը՝ Ասկերանում, Նիկոլ, տուր այս մարդկանց տները»,- ասաց Ի.Սաղաթելյանը։

Նա նշեց, որ Արցախը փրկելու համար երկու կարևոր գործողություն կա՝ պետք է ազատվել Արցախը հանձնող իշխանություններից,  պետք է ձևավորվի ազգային համաձայնության կառավարություն։

«Համախմբվենք, վերջ տանք պառակտումներին, ջլատումներին, որ փրկենք Արցախն ու Հայաստանը։ Սա է մեր ծրագիրը։ Այս պահից գործում է հայրենիքի փրկության կոմիտեն, որն ունի  երկու կարևոր գործողություն՝ կոչ ենք անում ժողովրդին ոտքի կանգնեն։ Այո, սա նաև անհնազանդության շարժում է։ Չենք կարող թուրքի առաջ կզած ղեկավարին հանդուրժենք։ Այս մարդն անելիք չունի։ Պատերազմը բերել է Նիկոլն իր անհետևողական քաղաքականության արդյունքում, փչացրել է մեր հարաբերությունները մեր ռազմավարական դաշնակիցների Ռուսաստանի, Թեհրանի հետ, ամբողջ աշխահից մեկուսացրել է  իր ստի, կեղծիք, անվստահության պատճառով, մեզ հանգեցրել է պատերազմի, իսկ պատերազմի ողջ ընթացքում մատնված է եղել անգործության, դավաճանության։ Այս պահից սկսած՝ Հայաստանի իշխանությունը գոյություն չունի, պետք է հեռանան, որպեսզի փրկենք Հայաստանն ու Արցախը։ Նիկոլը չի կարող սա կանգնեցնի։ Սա կանգնեցնելու համար պետք է ձերբակալի երեք միլիոն բնակչության, ուրիշ տարբերակ չունի։

Այս ամեն ինչի համար իր պատասխանատվության բաժինն ունի քաղաքական մեծամասնությունը, արագ հրավիրել ԱԺ արտահերթ նիստ ու հեռացնել Նիկոլին։ ԲՀԿ-ն արդեն դա նախաձեռնել է, «Լուսավոր Հայաստանը» պարտավոր է րոպեների ընթացքում միանալ այս նախաձեռնությանը, այլ տարբերակ չկա։ Նիկոլը քաղաքական, բարոյական որևէ իրավունք չունի ղեկավարի մեր ժողովրդին, նա մեզանից խլեց մեր արժանապատվությունը, ինքնասիրությունը, նա պետք է հեռանա ու պատասխանատվություն կրի դրա համար»,- ասաց Ի. Սաղաթելյանը։

Նա հիշեցրեց Նիկոլ Փաշինյանի վերջին «լայվերից» մեկը, երբ ասել է, որ ստիպված է ստորագրել։

«Որ Ստեփանակերտը չի հանձնել, փորձում է մեզ վրա լավություն  ներկայացնի, փորձում է  մեղադրի բանակին, կուսակցություններին, ժողովրդին։ Այս ամեն ինչի համար կա  մեկ գլխավոր պատասխանատու՝ Նիկոլն ու իր անմեղսունակ թիմը, պետք է հեռանան ու վերջ։

Նիկոլն առավոտյան ասում էր՝ սիրում եմ ժողովրդին, հպարտանում եմ ժողովրդով, պատրաստ է ծառայել ժողովրդին։ Հիմա թույլ տվեք ժողովրդի անունից հայտարարել՝ Նիկոլ, ժողովուրդը զզնվում է  քեզնից, ամաչում է  քո համար, քո ծառայություններից թուրքերի համար, հեռացիր և վերջ»,- ասաց Ի. Սաղաթելյանը։ 

Հրապարակում հավաքված ժողովուրդն արձագանքեց՝ այո, այո, գոռացին՝ «Նիկոլ, հեռացիր»։

«Ամբողջ պատերազմի ընթացքում մենք ունեցել ենք ոչ թե գերագույն գլխավոր հրամանատար, այլ գերագույն գլխավոր խրտվիլակ, ով իր գործունեությամբ ամեն կերպ խոչընդոտում էր սահմանում կռվող զնվորին ու բանակին»,- ասաց նա։ 

Իշխան Սաղաթելյանն ասաց, որ այս պայքարը չի կանգնելու՝ ինչքան ուզում են ձերբակալել, ում ուզում են ձերբակալել։