Ձեր վստահելի աղբյուրը

«Այսօրվա դրությամբ ոչ ոք ոչ մի ժամկետ չի նշել, քանի որ սա այն հարցն է, որ կարող է հինգ րոպե հետո լուծվի, կարող է՝ հինգ օր հետո։ Այսինքն՝ ամեն ինչ կախված է նրանից, թե երբ Ադրբեջանի ղեկավարությունը թույլ կտա մտնել իր տարածքներ՝ երեխաներին փնտրելու»,- ՀՀ-ում ՌԴ դեսպանատան դիմաց անցկացվող ակցիայի ընթացքում ասաց անհետ կորած զինծառայողներից մեկի հարազատը։

Նրա խոսքով, իրենց ասել են, որ, ըստ ստորագրված հայտարարության, այս ամբողջ գործընթացը պետք է դեկտեմբերի մեկին վերջացած լինի, բայց այսօր արդեն նոյեմբերի 24-ն է.

«Մինչև դեկտեմբերի մեկը, եթե հելնեն երկինք, իջնեն, էլի չեն կարողանա լուծել, դեռ էն ժամանակ, երբ մենք Տոնոյանի (նախկին Պնախարար, խմբ.) հետ հանդիպեցինք, ինքն ասաց՝ երբ թույլ տան մտնել այս տարածքներ, այդ օրից սկսած երկու շաբաթում որոնողական աշխատանքները կավարտվեն։ Դե հիմա հասկանում եք՝ օրերը գնում են, ժամանակը քչանում է, բայց արդյունք դեռ չունենք»,- նշեց նա։

Ինչ վերաբերում է երեկ վարչապետ Նիկոլ Փաշինյանի հետ հանդիպմանը, ապա անհետ կորած զինծառայողի հարազատը հայտնեց՝ իրենց ասվել է, որ աշխատանքներ կատարվում են.

«Վարչապետը ներողություն խնդրեց բոլոր հարազատներից ու ծնողներից, ասաց, որ աշխատանքներ կատարվում են։ Նա մի 40 րոպե մեզ հետ խոսեց, գնաց։ Իսկ մենք հանդիպումը շարունակեցինք փոխվարչապետ Տիգրան Ավինյանի հետ։ Ինքն էլ լսել է մեզ»։

Անհետ կորած զինծառայողի հարազատը տեղեկացրեց, որ փոխվարչապետ Ավինյանին իրենք պատմել են նաև այն սպաների մասին, որոնք ճիշտ չեն կատարել իրենց ծառայությունը, և հենց իրենց սխալների պատճառով են նման խնդիրներ առաջացել։

Մեկ այլ զինվորի հարազատ էլ նշեց, որ ոչինչ չի արվում՝ երեխաներին գտնելու համար։

«Մենք երեխա ենք տվել ՊՆ-ին, թող բարի լինեն մեր երեխեքից տեղեկություն տրամադրեն։ Երեք ամսվա ծառայողին իրենք իրավունք չունեին տանել սահմանի բերան՝ Ջաբրայիլ, ի՞նչ իրավունք ունեն։ Մենք Տոնոյանին ենք տվել մեր երեխեքին, պահանջում ենք, որ Տոնոյանը հրաժարական չտար և մեր հարցերին լուծում տար։ Ոնց է ինքը հրաման տվել երեք ամսվա ծառայողին տանել սահմանի բերան, այնպես էլ պարտավոր է գլուխը կախել, քիթը գենտին քսել ու մեր երեխեքին բերել ու մեզ տալ։ Ոչ թե մենք էս մորգից մյուսը գնանք, ծնող ենք, չէ՞։ Ու մեր երեխեքին ողջ պիտի բերենք, դի՞ ենք տվել, որ դի բերեն։ Ջաբրայիլ, Կուբաթլու և Հադրութ, ջարդն էս հատվածներում է եղել»,- նեղսրտեց նա։

Մեկ ուրիշն էլ վրա բերեց. «Երեխեքին խմացրել են, դուխովացրել, բերել կռվի դաշտ։ Իջևանից միանգամից Ջաբրայիլ են տարել երեխեքին, հիմա 35 երեխա չկա։ Թող մեր երեխեքին բերեն՝ ողջին ողջ, մահացածին էլ՝ մահացած»։