Սադրանք էր անձամբ իմ նկատմամբ. Իշխանյանն՝ իրեն բերման ենթարկելու մասին
Իրավապաշտպան Ավետիք Իշխանյանը բերման է ենթարկվել կառավարության շենքի դիմացից ծեծի ենթարկելու կասկածանքով։ Այս մասին ասաց Իշխանյանը ոստիկանության Կենտրոնականի բաժնից դուրս գալուց հետո։
Նա ներկայացրեց, թե իրականում ինչ է տեղի ունեցել. «Ես կառավարության շենքի առջևով գնում էի դեպի Նալբանդյան փողոց՝ մեր գրասենյակ բարձրանալու համար։ Ոստիկանների մեջ կանգնած էր իմ ծանոթներից մեկը, որին մեր գրասենյակում բազմիցս աջակցել են բնակարանային հարցով, թե ինչ... Քրեական անցյալ ունեցող մեկն էր։ Նա այդ ոստիկանների մեջ կանգնած էր։ Երբ որ անցնում էի, բավական ագրեսիվ ձևով ասաց՝ իմ գործն ի՞նչ եղավ։ Ես էլ շտապում էի, հատկապես արդեն երկար ժամանակ իր գործով զբաղել ենք, արդյունքներ չեն եղել առանձնապես, մութ գործ էր, ասացի՝ Ղարաբաղը կորցրել ենք, դու դեռ գործով ես զբաղվում։ Նա ամենախայտառակ հայհոյանքները հնչեցրեց Ղարաբաղի և իմ հասցեին։ Զարացած շուռ եկա, հարցրեցի՝ ինձ ես ասո՞ւմ։ Հարձակվեց, բռնեց և սկսեց ինձ կոպիտ ձևով քաշքշել։ Այդ ժամանակ եկան քաղաքացիներ, ոստիկաններ, նրան քաշեցին մի կողմ։ Ոստիկանները երկուսիս էլ բերման ենթարկեցին։
Հետաքրքիրն այն է, որ բերման ենթարկելու որոշման մեջ նշված էր ծեծի ենթարկելու կասկածանքով։ Այսինքն ես ծեծի ենթակելու կասկածանքով բերման եմ ենթարկված եղել։ Սա է իրականությունը։ Իսկ իմ կարծիքն այն է, նախ՝ ի՞նչ գործ ուներ այդ քրեական անցյալ ունեցող մարդը ոստիանների մեջ կանգնած, երկրորդ՝ համարում եմ, որ սա սադրանք էր անձամբ իմ նկատմամբ»։
Նա զգուշացրեց հասարակական, քաղաքական գործիչներին, որ, հավանաբար, այսպիսի սադրանքներ առաջիկայում ևս կլինեն, պետք է զգույշ լինել։
Հարցին՝ վերջին շրջանում հաճախ են բերման ենթարկվում ընդդիմադիր գործիչները, ինչո՞վ է դա պայմանավորված, Ա. Իշխանյանն ասաց. «Փաշինյանի կողմից խնդիր է դրված՝ ցանկացած գնով պահել իշխանութունը։ Ցավով եմ ասում, որ նրա անօրինական հրամաններին ենթարկվում են իրավապահ կառույցները։ Պատճառներից մեկն էլ այն է, որ դե յուրե այդ կառույցները գտնվում են նրա ենթակայության տակ, այդ կառույցների ղեկավարներին ում չի վստահում, ձեռնոցի պես փոխում է մինչև իր համար վստահելի լինեն և անօրինական հրահանգները կատարեն։ Հանրապետության նախագահը կնիքի դեր է կատարում, ստորագրում է այդ բոլոր հրամանները։
Եթե նայենք նախկին ոստիկանապետի, ԱԱԾ տնօրենների հայտարարությունները, բացահայտ ասում են, թե ինչ անօրինական հրամաններ են տրված եղել և շարունակվում են։ Իսկ այդ հայտարարություններին ընթացք չի տրվել, քանի որ իրավական պետության մեջ չենք ապրում։ Եթե իրավական պետություն լիներ, կառույցները՝ դատախազություն, քննչական մարմին, լինեին անկախ, ոչ թե վարչապետին կից և նրա գրպանում, բնականաբար, քրեական գործ կհարուցվեր»։