Ձեր վստահելի աղբյուրը

«Եղան բազում հայտարարություններ, որ չինական տարբերանշանով անհասկանալի համազգեստով մարդիկ ոստիկանության հետ որևէ կապ չունեն։ Դրանք կրիմինալի, օլիգարխների թիկնազորներն են, կրիմինալի ներկայացուցիչներ են»,-այսօր կառավարության շենքի դիմաց լրագրողների հետ զրույցում հայտարարեց ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանը։

Լրագրողների այն հարցին, թե կարո՞ղ է Ա. Վանեցյանը փաստեր ներկայացնել, ծառայության նախկին տնօրենը պատասխանեց. «Անգամ փաստեր ներկայացնելու կարիք չկա։ Եթե աշխատում ես իրավապահ համակարգում, տեսնում ես գործողություններ, ապա հասկանում ես ամեն ինչ։ Օրինակ, միտինգ ցրելու ձև կա, կանոնակարգված է, երեք հոգի առաջ են գնում, չորս հոգի հետևից են գնում, մեկը ոտքից է բռնում, մեկը՝ ձեռքից։ Չինական հանդերձանքով այդ մարդիկ գործել են ոչ պրոֆեսիոնալ ու չպատրաստված»։

Նա նաև ուշադրություն հրավիրեց մեկ այլ հանգամանքի վրա. այդ մարդկանց դիմակների տակից մորուք է երևացել։ 

«Գտեք մի ոստիկան, որ մորուք ունի, գտեք, մի սպա, ենթասպա, կամ ծառայող, որ մորուք ունի։ Չկա նման բան։ Մամուլում հրապարակումներ եղան, նկարեցին, որ կառավարական առանձնատուն գնում են հրոսակախմբեր։ Արձագանք չկա։ «Պետական պահպանության մասին» օրենքով կառավարական առանձնատները համարվում են պետական պահպանության օբյեկտներ, այդ տարածք մուտք ու ելք չի կարելի։ Հարյուրներով, երկու հարյուրներով գնում են, գալիս են, գնում են, գալիս են»,-ասաց Վանեցյանը։

Նա նկատեց, որ առանձնատան մոտ նստում են մշակած մորուքով, նոր զինվորական  համազգեստով մարդիկ, ասում են՝ դիրքերից իջել են, տուն չեն գնացել, եկել են Նիկոլին պաշտպանելու։

«Այ լակոտ, դու դիրքերի տեղը գիտե՞ս, դու ֆորմա ես հագել կյանքումդ զինվորական»,-նշեց Վանեցյանը։

ԱԱԾ նախկին տնօրենն ընդգծեց՝ հատկապես սպայի համար պատվից թանկ մեկ էլ հայրենիքն է, կյանքը պատվի ու հայրենիքի համեմատ արժեք չունի։

«Ես դիմում եմ իմ ընկերներին, ոստիկաններին, ԱԱԾ աշխատակիցներին, զինվորականներին, դատախազության, քննչական մարմինների աշխատակիցներին, առհասարակ ուսադիր կրող մարդկանց։ Տղեք ջան, ես ձեզնից մեկն եմ եղել, նկատել եք, որ հակապետական որևէ քայլ չեմ անում, խնդրում եմ, սթափվեք, հասկանում եմ, որ ունեք ընտանիք պահելու խնդիր։ Ես գիտեմ, որ մեծ մասն իրական կյանքում չեն ողջունում Նիկոլ Փաշինյանին, նրա գործողությունները։ Էս ամենը վերջանալու է, գալու եք՝ ասեք, չէինք հասկանում։ Բայց մեր՝ սպաների  առաքելությունը հայրենիքի վտանգված լինելու ժամանակ գործուն քայլեր ձեռնարկելն է։ Դուրս եկեք, հայտարարեք, որ էս մարդը ծախել է մեր երկիրը, քանդել է մեր երկիրը և շարունակում է քանդել մեր երկիրը։ Թուրք-ադրբեջանական զինված ուժերն արդեն Հայաստանի սահմանին են, որևէ մեկը հասկանո՞ւմ է, որ ունենք ավելի քան 400 կմ չպաշտպանված սահման։ Ժողովուրդ, հասկացեք, սա մեր երկրի, մեր ապագայի խնդիրն է, մենք չենք պայքարում իշխանության համար, այս բարդ ժամանակաշրջանում դա մեծ պատասխանատվություն է։ Ինձ համար կոնկրետ իշխանությունը վայելք չէ, չի եղել, եթե վայելք լիներ, կմնայի այնտեղ։ Դուրս եկեք կոմֆորտի զոնայից, հարգելի սպաներ, ենթասպաներ, զինվորականներ, դուք բոլորդ ինձ ճանաչում եք, խնդրում եմ մի արեք հակաօրինական բաներ, սա մեր երկիր ու մեր ապագայի հարցն է»,-ասաց նա։

Հիշեցնենք, ընդդիմադիր «Հայրենիք» կուսակցության նախագահն այսօր  այցելել էր Նիկոլ Փաշինյանի հրաժարականի պահանջով կառավարության շենքի դիմաց անժամկետ հացադուլ հայտարարած դաշնակցական գործիչ Գեղամ Մանուկյանին, ՍԴ նախկին անդամ Կիմ Բալայանին։