«Լավ եմ անում, ձենդ կտրի». հերթական մեղադրանքներն ԱԺ-ում
«Ռազմական դրությունն այսօր արդեն որևէ իրավական հենք չունի։ Ավելին, ներկայումս ռազմական դրությունն իր հետ բերում է մի շարք խնդիրներ ու խոչընդոտներ»,- խորհրդարանում ասաց ԱԺ փոխխոսնակ Վահե Էնֆիաջյանը։
Նրա խոսքով, իշխող քաղաքական ուժի ներկայացուցիչները, խոսելով այս զինադադարի մասին, հարցնում են՝ ի՞նչ է, դե՞մ եք ՌԴ-ի հետ համատեղ այս հայտարարությանը, Վլադիմիր Պուտինի ստորագրությանը.
«Էս ի՞նչ անհեթեթ ձևակերպումներ են, հարգելի ընկերներ։ Բացի այդ, իշխող քաղաքական ուժի պատգամավորների հայտարարությունները ԱԺ կայքում տեղադրվում են, ընդդիմադիրների քաղաքական հայտարարությունները՝ ոչ։ Էս ի՞նչ մոտեցում է, էս ի՞նչ վերաբերմունք է»։
Վահե Էնֆիաջյանի պնդմամբ, պահն իրոք օրհասական է, մինչդեռ քաղաքացիներին կեղծ տեղեկատվություն է հրամցվում։
«Խոսում եք, թե 121 համայնք է անցել Ադրբեջանի վերահսկողության տակ, բայց իրականում 181 համայնքի մասին է խոսքը։ Հենց այս պահին, երբ մենք քննարկում ենք ռազմական դրություն չեղարկելու հարցը, Լաչինի տարածքում տեղահանում են գյուղեր, մարդիկ իրենց բնակավայրերն են այրում, և անհուսալի վիճակում են հայտնվում։ Ո՞ւր են պետական այրերը։ Մարդիկ իրենց խնդիրների հետ միայնակ են մնացել, ո՞ւր է պետական անգործունակների հավաքածուն»,- նշեց պատգամավորը։
ԱԺ փոխխոսնակը մեջբերեց ՀՀ վարչապետ Նիկոլ Փաշինյանի մտքերից մեկը, որն ԱԺ ամբիոնից հնչել էր ռազմական դրություն հայտարարելու ժամանակ՝ եկեք պայմանավորվենք մի բան, որ ինչ էլ լինի, մենք մեզ երբեք պարտված չենք համարելու.
«Սա պատերազմի առաջին օրը հնչած թեզ է, էս ի՞նչ մեսիջ էր, ռազմի դաշտ գնացող քաղաքացուն էս ի՞նչ ուղերձ էր տրվում...։ Էդ, որ ընդդիմության մասին եք խոսում, մենք համերաշխության կոչեր ենք արել, միասնական ենք եղել, ոչ մի քննադատություն չի հնչել մեր կողմից, բարեգործություններ ենք արել, ջոկատներ կազմավորել։ Ի տարբերություն իշխանականների, ԲՀԿ-ի պատգամավորներն իրենց աշխատավարձներն ուղղել են հիմնադրամին։ Չի կարելի ընդդիմության հասցեին հիմա մեղադրանքներ հնչեցնել»։
Ըստ պատգամավորի, զավեշտ է, որ պարտված իշխանությունը մեղադրում է ընդդիմությանը։ Ապա, ձայնը փոքր-ինչ բարձրացնելով Վահե Էնֆիաջյանը նշեց՝ հազարավոր զոհեր ունենք, տարածքներ ենք կորցրել և ոչ մի հարց չենք լուծել։
Իշխանական պատգամավորներից մեկը տեղից արձագանքեց Վահե Էնֆիաջյանի խոսքին, որին ի պատասխան վերջինս ասաց.
«Լավ եմ անում, ձենդ կտրի, բան ունես ասելու, արի էստեղից ասա»։
Ապա, շարունակելով խոսքը, ԱԺ փոխխոսնակը վստահեցրեց, ինքը միշտ բոլորի հանդեպ հարգանքով է եղել, բայց այժմ պետք է արձագանքի հնչած մեղադրանքներին։
«Հայտնի օրը, ԱԺ խորհրդի անդամների հետ հանդիպման ժամանակ ՀՀ արտգործնախարարն ասաց՝ ես շտապում եմ, հնարավորություն չունեմ, գործեր ունեմ շատ կարևոր, պետք է մեկնեմ։ Նիկոլ Փաշինյանի հետ մոտավորապես մի ժամ ժամանակ ենք ունեցել քննարկելու, և մեր հարցերը եղել են շատ հստակ...։ Վստահ եմ՝ ժամանակ կունենանք բոլոր մանրամասներին ավելի հանգամանալից անդրադառնալու, թե խի էր էդ իրավիճակը և ինչ ձևակերպումներ են եղել։
Երբ ասում եք, որ Նիկոլ Փաշինյանի վրա է պատասխանատվությունը, դա միանշանակ է։ Ինչքան պետք է այս պարտված, ձախողված իներցիան շարունակվի։ Դավաճանական գործողություններ են եղել, մե՞կն ենք ունեցել, երկո՞ւսը, երե՞քը..., դրա հետևանքով հազարավոր մահեր են եղել...։ Էդքան խոսում ենք, որ հակապետական, հակահայկական կառույցներ կան ՀՀ-ում, ե՞րբ է վերջ դրվելու այդ ամենին, որքա՞ն են այսպես շարունակելու»,- նշեց ԱԺ փոխխոսնակը։
Եվ խոսքի վերջում, Վահե Էնֆիաջյանը նշեց՝ պետք չէ հեգնանքով խոսել ընդդիմության մասին այն դեպքում, երբ որևէ մեկը հաշվի չի առել ընդդիմախոսների կարծիքը, երբ օպոնենտների դեմ քրգործեր են հարուցվում.
«Փառք ու պատիվ հայ զինվորին, փառք ու պատիվ հայրենիքի համար իրենց կյանքը զոհածներին։ Իսկ նրանք, ովքեր ունեցան բացթողումներ ու ձախողումներ, և այս խայտառակ իրավիճակը արձանագրեցին որպես իրողություն, պատասխան են տալու»։
Հարակից հրապարակումներ`
- Ռազմական դրության պահպանումը կմեկնաբանվի որպես քաղաքական նպատակ. Արկադի Խաչատրյան
- Հայ գերիներին ստորացումնից զերծ պահելու համար մենք պետություն ունե՞նք. Սրբուհի Գրիգորյան
- Մինչ տարածքներն ափալ-թափալ հանձնելը, ՀՀ իշխանությունը պետք է լուծեր ռազմագերիների, անհետ կորածների հարցը. Արթուր Ղազինյան
- Մարուքյան. Մեզ հասած լուրերով Ադրբեջանը ծրագրում է շքերթ, որտեղ պատրաստվում է քայլերթի հանել նաև հայ ռազմագերիներին
Լրահոս
Տեսանյութեր
«Ազատություն քաղբանտարկյալներին». ակցիա՝ Հայաստանում ԵՄ պատվիրակության գրասենյակի դիմաց